عن فوائد الخل للتنظيف “الحل في الخل”
كتبت: مها طــه
بعد ما كسرت حاجز الـ25 سنة، بدأت أحس إن حياتي بتتغير، بس مش نضوج لأ، أصحابي معظمهم اتجوزوا أو في طريقهم للجواز، وبعد ما كان جروب الواتس آب مليان بأسئلة وحوارات من نوع “شعري مقصف أوي أجيبله إيه كريم؟” أو “معرفش محل إيه منزل خصم 50% على الشنط الجلد”، فجأة الكلام كله بقى رايح في سكة “إيه الأكل اللي ينفع للبيبي بعد سن 6 شهور؟” و”أنا عايزة حاجة حلوة ورخيصة أنضف بيها عشان الميزانية؟”.
اعرفِ أكتر| أواني الطهي: معادلة صعبة بين الصحة والراحة
وعشان أنا بحب أصحابي وكل الستات الحلوات المهتمات بالنظافة والميزانية في نفس الوقت، وعشان كل ست موسوسة ناقص تحمي عيالها وتنقع البيت كله في منظفات، وكمان كل واحدة خايفة من الآثار الضارة لاستخدام المنظفات الكيمائية على صحتها وصحة ولادها، قلت أرجعكم معايا للطبيعة وأقولكم إن الحل في الخل.
نظافة وتطهير وتوفير
مفيش بيت مصري يخلو من الخل حيث إنه له استخدامات كتير؛ أكل ماشي، نغسل بيه الفراخ والخضار والفاكهة أحيانًا كنوع من أنواع التعقيم والتنظيف، ومن زمان كانت الجدات بتستخدمه في حاجات كتير كمطهر، وطبعًا ده كله لأن الخل رخيص نسبيًا وعلى عكس معظم المنطفات طبيعي وغير سام.
الخل مادة طبيعية عبارة عن محلول مخفف من حمض الخليك، وبيتم الحصول عليه عن طريق تخمير ثمار كتير من الفواكه زي التفاح والعنب وغيرهم. الخل له أنواع كتير لكن طبعًا أشهرهم الخل الأبيض المصنوع إما من مادة الإيثانول الناتجة عن تخمير الحبوب أو من حمض خليك متصنع معمليًا. بالإضافة لخل التفاح اللي له فوايد كتير مرتبطة بالتخسيس والهضم.
أما عن فوائد الخل للتنظيف والتطهير، فالخل الأبيض هو المرشح الأقرب. تركيز حمض الخليك في الخل الأبيض حوالي 5%، من المعروف عن الأحماض إن ليها قدرة على قتل البكتيريا والفيروسات عن طريق تغيير التركيب الكيميائي للبروتينات والدهون اللي بتدخل في تركيب خلايا الكائنات الممرضة دي كلها.
بعد مجموعة من الدراسات لمقارنة منتجات التنظيف التجارية المعروفة ببدائل منزلية زي الخل وبيكربونات الصوديوم (الكربوناتو)، كانت النتيجة إن الخل قادر على القضاء على كتير من مسببات الأمراض المنزلية زي بعض أنواع البكتيريا اللي بتسبب النزلات المعوية والدمامل وأحيانًا التسمم.
وكجزء من الأبحاث المرتبطة بالخوف المتزايد من حدوث وباء الأنفلونزا وجد مجموعة من الباحثين البريطانيين إن خل الشعير قادر على القضاء على فيروس الأنفلونزا وقتله بسرعة عن طريق استخدام الخل في الغسيل والتنظيف. مؤخرًا كمان أضاف مجموعة من الباحثين الأمريكيين، في كلية ألبرت آينشتاين للطب، إن الخل قادر على قتل البكتيريا المسببة للإصابة بالسل بعد تعرضها لمحلول حمض الخليك بتركيز 6%.
اعرف أكتر| مرض السل وجرثومته الخفية!
وتعليقًا على النتايج دي صرح البروفيسور “بيتر كولينون” طبيب الأمراض المعدية في كلية الطب بالجامعة الوطنية الاسترالية بإن بكيتيريا السل بتتصنف كبكتيريا صعب القضاء عليها، وبالتالي طالما الخل قادر على قتلها، يبقى في الأغلب هيقدر على كتير من أنواع البكتيريا المسببة للأمراض.
كل اللي فات ده يخلينا نقول بقلب جامد إن الخل أحسن بكتير من أنواع كتير من المنظفات الكيميائية اللي نعرفها واللي معظمها داخل في تركيبه بعض المواد المسرطنة ده غير الدراسات والأبحاث اللي بتطلع كل فترة عن أضرار الإفراط في استخدام المطهرات اللي مش بتفرق ما بين البكتيريا النافعة والضارة.
الخل كمان مش بس بديل جيد للمنظفات لكنه كمان أرخص بكتير من حيث السعر، لأنه عشان تجيبي إزازة من المطهر الفلاني مع المنظف العلاني في الأغلب هتدفعي ما لا يقل عن 40 : 50 جنيه في الانواع المعروفة – أكيد من الأنواع الرديئة – ويدوبك هيقعد معاكي أسبوعين مثلًا، في حين إن ممكن لتر من الخل – أحسن الأنواع – هتكلفك بس 10 جنيه وممكن تقعد معاكي شهرين وتلاتة ويمكن أكتر.
هوس التنظيف: الأمور أبسط من كده
معظم المتخصصين في الصحة العامة بينصحوا حاليًا بإننا لازم نبطل هوس التنظيف والتعقيم المفرط ده، ونكتفي أوي بالماء الساخن والصابون للتنظيف.
وبعد ما ننظف الأسطح عمومًا بالماء والصابون مع الاعتماد على الاحتكاك (الدعك) نشوف هل محتاجين أصلًا للتعقيم ولا لأ، لإن حالة الاحتكاك دي بتسمح للمطهرات زي الخل بإنها تشتغل بشكل أفضل.
طبعًا كل الكلام ده لا ينفي إن أوقات هنكون محتاجين المنظفات التقليدية والمطهرات، ولذلك قبل ما نبدأ في التنظيف ضروري نسأل نفسنا محتاجين إيه، يعني مجرد تنظيف عادي روتيني يبقى مياه وصابون كفاية.
اعرف أكتر| الصابون المضاد للبكتيريا: بكتيريا أقوى ومناعة أقل!
ولو عايزين نطهر أسطح في المطبخ أو الحمام الأول نتجه للخل كمنتج أقل سمية ومؤدي للغرض وقابل للتحلل كمان في البيئة، لو بقى عندنا حد في البيت مصاب بمرض معدي ما أو عنده جرح مفتوح ممكن وقتها نلجأ لمطهرات الجروح والمطهرات التجارية في العموم.
المصادر: mayoclinic howstuffworks mbio journals ncbi webmd
