أفضل 5 أفلام خيال علمي لسنة 2018
كتب: أحمد حسين
كل سنة هوليوود بتنتج عدد كبير من أفلام الخيال العلمي، يليها شركات الإنتاج المختلفة من أوروبا. أفلام الخيال العلمي خاصةً بيكون ليها شهرة عالمية، لذلك فكرنا نعمل ليستة لطيفة كده بأفضل أفلام خيال علمي صدرت سنة 2018. طبعًا احترت أقيّم الأفلام على أساس إيه، وبما إن ناس كتير بتقيّم الأفلام على حسب مواقع “IMDB” و”Rotten Tomatoes”، فقررنا ننشر أكتر أفلام واخدة تقييم عالي، من ناحية آراء النقاد وكمان تقييم الجمهور.
لكن اعتمدت على رأيي الشخصي في حاجة، وأنا بكلمكم بصراحة، الحاجة دي هي إني ماعتبرتش أفلام القصص المصورة (Comic Books) باعتبارها أفلام خيال علمي، أو على الأقل مش كلها، يعني مثلًا أفلام زي “Ghost in a shell” وغيرها من اللي واخدين أفكار ونظريات علمية وبنوا عليها القصة المصورة، زي أول فيلم هنبدأ بيه القايمة بتاعتنا.
أفضل أفلام خيال علمي 2018
فيلم “I Kill Giants”
الفيلم إخراج أندريس والتر عن رواية مصورة لـ جو كيلي، بطولة ماديسون وولفي وزوي سالدانا. الفيلم إنتاج 2017 لكنه اتعرض لأول مرة للجمهور سنة 2018، وبيحكي عن بنت اسمها “باربرا” بتحاول تهرب من المصاعب اللي في حياتها عن طريق إنها تدخل عالم فانتازي مليء بالسحر والوحوش. أراء النقاد كان أغلبها إيجابي على موقع روتن توميتوز بـ 78%، وعلى موقع IMDB واخد تقييم 6.2 عن طريق حوالي 20 ألف شخص. الفيلم مش واخد شهرة كبيرة لكن أغلب التعليقات كانت إن فكرته حلوة والتمثيل فيه جيد لكن ماتعملّوش حملة دعايا كويسة توصّله للناس.
فيلم “Prospect”
الفيلم إخراج وسيناريو كريستوفر كالدويل وزييك إيرل، عن فيلم قصير كانوا عملوه سنة 2016 بنفس الاسم، من بطولة بيدرو باسكال وصوفي تاتشر. بيحكي عن بنت وأبوها سافروا لقمر غريب وبعيد عن الأرض علشان يزرعوا ويدوّروا في نفس الوقت على شيء اسمه “مخبأ الملكة”، وبيلاقوا راجل تاني من الأرض بيدور عليه ويبدأ الصراع بينهم وبينه وبين كمان سكّان الكوكب الأصليين. الفيلم الآراء فيه إيجابية جدًا لكنها قليلة جدًا جدًا، يعني هو واخد تقييم 86% على روتين توميتوز، و7.0 على IMDB من حوالي 400 شخص فقط، مما يعني إنه ممكن يكون حلو فعلًا، وممكن لما يزيد العدد مايفضلش التقييم على حاله، لكنه في النهاية فيلم يبدو واعد وجيد على الأقل.
فيلم “Ready Player One”
الفيلم الجديد لـ ستيفن سبيلبيرج المخرج الشهير، عن رواية بنفس الاسم لإيرنست كلين، وبطولة تاي شيرديان وأوليفيا كوك. بيحكي عن عالم افتراضي -زي لعبة كده- اسمه “Oasis” بيحل محل العالم الحقيقي المُدمّر عام 2045، مخترع العالم الافتراضي ده بيموت، فبيعلن في فيديو عن إنه اللي هيلاقي سر اللعبة (Easter Egg) هيقدر ياخد ثروته كلها. ستيفن سبيلبيرج مخرج مش محتاج شهادة، بس بقاله كام سنة بيعاني شوية مع النجاح الجماهيري والنقدي، لكن الفيلم واخد تقييم 72% على روتين توميتوز، و7.6 على IMDB عن طريق حوالي 230 ألف شخص. لازم برضه أذكر إن الفيلم عامل آراء منقسمة، ما بين إنه جميل وممتع وما بين إنه سيء وممل، وفي النهاية الحكم ليكم لما تتفرجوا عليه.
فيلم “Annihilation”
واحد من أكتر الأفلام اللي عملت ضجة لما صدرت. الفيلم من إخراج وسيناريو أليكس جارلاند، عن رواية جيف فاندرميير. بطولة ناتالي بورتمان وجينفر جاسون لي وتيسا تومسون. بيحكي عن عالمة بيولوجية بتدوّر على جوزها، فبتروح لمكان غريب وسري وغامض جدًا ولا تنطبق عليه قوانين الطبيعة المعروفة. الفيلم عمل انقسام بين رأي النقاد ورأي الجمهور، يعني هو واخد تقييم 88% على روتين توميتوز، أما على IMDB فواخد 6.9 من حوالي 180 ألف شخص، وبعضهم قال إن الفيلم عبقري وجميل ومؤثر، والبعض الآخر قال الفيلم مُدّعي وبيحاول يعبّر عن حاجات مش مفهومة والسيناريو مش متماسك، وعمومًا -مرة تانية- الرأي الخاص بيكم هو الأهم، والحكم بعد المشاهدة (ههه).
فيلم “Upgrade”
رغم إنه ماعملش ضجة كبيرة زي Annihilation لكن الآراء فيه كانت إيجابية أكتر. الفيلم من إخراج وسيناريو لي وانيل (Leigh Whannell)، بطولة لوجان مارشال جرين وميلاني فاليجو وستيف دانلسِن. بيحكي قصة “جراي” شخص بيتعرض لمصيبة كبيرة من مجرمين بتتوفى على إثرها مراته وهو بيواجه صعوبات صحية، بعدها بيعرض عليه شخص إنه يعالجه بشريحة ذكية اسمها “Stem”، والشريحة دي بتزود له ذكاؤه وقدراته القتالية علشان يقدر يلاقي المجرمين دول. الفيلم من أكتر الأفلام اللي ماعملتش انقسام -الحمد لله المرة دي- بين النقاد والجمهور، وواخد تقييم 86% على روتين توميتوز، أما على IMDB فواخد تقييم 7.6 من حوالي 65 ألف شخص. الفيلم يُعتبر برضه مركز على مشاهد الأكشن ودي حاجة يمكن مخلياه واخد تقييم كويس، طبعًا مع كون القصة نفسها حلوة.
لو بتحبوا الخيال العلمي وبتفكروا تتفرجوا على فيلم إيه في ليلة الكريسماس، هتلاقوا الأفلام متاحة وبعضها موجود على قنوات المشاهدة أونلاين (زي نيتفليكس) تقدروا تشتركوا وتشوفوها وتتفرجوا عليها وتحكموا بنفسكم..مشاهدة ممتعة.
اعرف أكتر|
فيلم ولا علم: حقائق علمية دمرتها السينما
أفضل 10 أفلام خيال علمي: كثير من المتعة قليل من الهري
أفضل خمسة أفلام عن الخيال العلمي
المصادر: IMDB rottentomatoes
