العمالقة.. كُبارات كوكب الأرض!
كتب: أحمد حسين
بعد إنقراض الديناصورات والماموث والحيتان الضخمة، احتفظت الأرض ببعض العمالقة، نقدر نسميهم كُبارات الكوكب، موجودين بيننا حتى هذه اللحظة، العمالقة دول أنواع، فيهم الحيوان والنبات والحشرات وغيرهم كتير.. واللي يعيش طبعًا ياما يشوف.
أكبر الكائنات على الأرض:
– أكبر فيروس: فيروس بيثو (Pithovirus sibericum)
أكبر فيروس معروف لحد دلوقتي عايش على وجه الأرض. الفيروس اكتشفوه من حوالي 35 ألف سنة في جبال سيبيريا التلجية. حجمه 1.5 ميكرومتر (0.00015 سم)، ده كبير آه بالنسبة للفيروسات، أينعم ماتقدرش تشوفه بالعين المجردة، بس برضه بالنسبة لهم كبير.
– أكبر عنكبوت: العنكبوت آكل الطيور (Goliath bird-eating spider)
وزن العنكبوت ده حوالي 120 جرام وممكن يوصل لـ170 جرام، وتقريبًا لما بتيجي الإنثى تضع بيضها، بتضع من 100 إلى 400 بيضة، شوف إنت العدد بقى، ده غير إن أنيابه ممكن تخترق جلد الإنسان. بس الحقيقة العنكبوت ده _ولله الحمد_ مش مضر/مؤذي للبشر خالص، هو مؤذي للطيور بس.
– أكبر فاكهة: جاك فروت أو الجاكية (Jackfruit)
تقريبًا دي الفاكهة الوحيدة اللي ماتقدرش تطلبها بالكيلو، يعني فكرة هات لنا منها 10 كيلو مثلًا دي مش متوفرة، لأن الواحدة منهم وزنها حوالي 36 كيلو. بتنمو في الأجواء الاستوائية، هي عبارة عن خليط من الموز والمانجو والأناناس، حلو.. بس برضه 36 كيلو كتير!
– أكبر ضفدع: ضفدع الجولياث (The Goliath Frog)
بيعيش في الكاميرون وأفريقيا الوسطى، وهو ضفدع نادر الوجود. وزنها بيتراوح بين 600 لـ 3250 جرام، وطولها بين 17 و32 سم، في أنثى لقوها في غينيا الاستوائية تقريبًا 3 ونص كيلو، وطولها حوالي 43 سنتيمتر، تقدر تقول قرّبت على نص متر كده، بسيطة يعني.
– أكبر زهرة: رافليسيا أرنولدية (Rafflesia Arnoldii)
موطن الزهرة الأصلي أندونيسيا. قطر الزهرة دي تقريبًا متر، ووزنها 11 كيلو! هي نوع من النباتات اللي مابتتباعش، يعني بتنمو في الغابات في أندونيسيا بس، بالذات الغابات المطيرة.
– أكبر طائر: النعامة (Ostrich)
بتعيش في أفريقيا والشرق الأوسط. وعلى الرغم من إنها غير مهددة بالانقراض، إلا إن الصيد بيقضي على أعداد كبيرة منها. النعامة وزنها بيتراوح بين 100 إلى 150 كيلو، وطولها حوالي 2.5 متر. بس مايغرّكش الكلام ده، سريعة جدًا وممكن توصل سرعتها لـ50 كيلو في الساعة.
– أكبر الزواحف: تمساح المياه المالحة (Saltwater crocodile)
بيعيش في أماكن كتير منها مثلًا شمال أستراليا وجنوب شرق آسيا والساحل الشرقي للهند. نوع مفترس جدًا من الحيوانات، تقريبًا بياكل أي حاجة يطولها غزلان بقى، خنازير وقرود وتعالب وجواميس وثيران!
الذكور من الحيوان ده بيوصل حجمها لـ6.7 متر، ووزنها بيكون 2000 كيلو تقريبًا، بس ده في حالات نادرة، لكن المنتشر بين طوله من 4.3 إلى 5.2 متر ووزنه من 400 إلى 1000 كيلو.
– أكبر حيوان بري: الفيل الأفريقي (African Elephant)
الوريث الشرعي للماموث. طول الواحد بيتراوح من 3.2 إلى 4 متر، ووزنه من 4.700 إلى 6000 كيلو! وعلى الرغم من منظره الطيّب الوديع ده، إلا إنه ممكن يفتك بأي شيء قريب منه لو احتاج الأمر لذلك.
– أكبر اللافقاريات: الحبار العملاق (Giant Squid)
بعيدًا عن شكله الغريب، وعينيه اللي تقدر تشوف اللي ورا ضهره، السبيدج ده ممكن يوصل طوله لأكتر من 10 متر. آخر واحد عثروا عليه كان تقريبًا معدّي الـ 14 متر!
– أكبر حيوان مائي ذو أسنان: حوت العنبر (Sperm Whale)
حوت مهدد بالانقراض بسبب الصيد، لذلك منعت بعض الدول صيده في مياهها الاقليمية. طول الحوت تقريبًا 16 متر، وممكن يوصل ساعات لـ 20. اسمه حوت العنبر علشان في مادة شمعية بيطلق عليها العنبرية موجودة في راسه، البشر بيستخرجوها علشان يعملوا منها أنواع العطور والزيوت والصابون.
– أكبر كائن حي معروف حتى الآن: الحوت الازرق (Blue Whale)
تقريبًا مفيش أي حيوان حالي يقدر يتخطى طول الحوت ده، اللي بيوصل لـ 30 متر، ووزنه اللي بيكون حوالي 170 طن. للأسف، الحوت الازرق هو كمان مهدد بالانقراض، بسبب صيد الحيتان له، وعلى الرغم من إن المجتمع الدولي سن قوانين تحميهم، إلا إنهم بيقلّوا كل سنة عن اللي قبلها برضه!
المصادر: whalefacts sperm whale ocean africageographic discoverwildlife britannica worldatlas animals healthline nationalzoo nature
