هناكل إيه تصبيرة؟
كتبت: يارا كمال
كلنا بنشتغل حوالي 8 ساعات. لو بنفطر قبل ما ننزل من البيت (يعني مثلًا قبل الساعة 9)، هنفضل قاعدين الـ8 ساعات من غير أكل؟ ساعتها بنضطر يا إما نعك من بره (على رأي ماما) أو نجيب حاجة خفيفة كده نتصبّر بيها وفي الغالب بتبقى عك برضه. ماظنّش إن فيه حد بييجي بأكل من البيت، لإن لا المواصلات ولا الوقت يسمحوا ولا ينفع نشيل الأكل ده في حاجة عشان ناخده معانا الشغل، ده غير تريقة زمايلك اللطاف عليك والبرشطة!
إحنا محتاجين تصبيرة كده تبقى مفيدة وتشبّع، وفي نفس الوقت تفيد العقل اللي داير في الساقية الـ 8 ساعات شغل. ممكن ناكل خضار وفاكهة طبعًا، بس فيه أسباب كتير تخلي عين الجمل هو أفضل تصبيرة ممكن تاكلها في الشغل.
ليه ”عين الجمل“ ؟!
أغلب المكسرات فيها مركبات مضادة للأكسدة اسمها البوليفينول، والمادة دي غير إنها مضادة للأكسدة، هي كمان بتقلل معدلات أمراض الأوعية الدموية. من بين كل المكسرات، عين الجمل فيه أكبر قدر من البوليفينول، وفقًا لدراسة اتعملت سنة 2011 في الجمعية الملكية للكيمياء.
عين الجمل أفضل من مكسرات تانية في احتوائه على أحماض دهنية متعددة غير مشبعة، ودي دهون ضرورية لتحسين التمثيل الغذائي زائد إنها بتحسسك بالامتلاء، زائد إن فيه أدلة على إن النوع ده من الأحماض الدهنية بيساعد في منع الإصابة بالسكر النوع التاني (diabetes type 2). كمان جمعية القلب الأمريكية ربطت أنواع من الأحماض الدهنية المتعددة غير المشبعة اللي موجودة في عين الجمل بانخفاض معدلات أمراض القلب والسكتة الدماغية وبإن صحة الخلايا تكون أفضل، وكمان الملح اللي في عين الجمل قليل أوي.
ده غير بقى إنه عملي أوي، يعني أنت مش هتحتاج لا أطباق ولا شوك ولا معالق عشان تاكله، وكمان عين الجمل مش ناشف على الأسنان.
أهم حاجة في الموضوع بقى إن عين الجمل بيدعم مخك. فيه دراسة عملتها دكتورة لينور آراب، أستاذة الطب والوقاية من الأمراض في جامعة كاليفورنيا، هي وزمايلها عن العادات الغذائية والحياتية بين آلاف البالغين. الدراسة توصلت لإن الناس اللي بياكلوا عين جمل تفوقوا على الناس اللي مابياكلوهوش في الذاكرة والتركيز وسرعة معالجة المعلومات، ده بعد ما الباحثين ظبطوا النتايج على السن وممارسة الرياضة والعِرق وأي عوامل تانية ممكن تأثّر في أداء العقل.
أحسن حاجة بقى إنك عشان توصل للفوايد دي مش محتاج تاكل منه كتير، كفاية تاكل 6 أو 7 ثمرات عين جمل. المشكلة بقى بالنسبة للناس اللي عاملين ريجيم لإن المعروف إن المكسرات فيها سعرات حرارية كتير. ”دكتور دافيد كاتز“، مدير مركز بحوث الوقاية بجامعة ييل، هو وزمايله حبوا يعملوا دراسة يعرفوا بيها إذا كانت فوايد المكسرات بتفوق السعرات الحرارية اللي فيها ولا لأ. (مع إن الدراسة دي اللي مولها كانت لجنة كاليفورنيا للجوز أو للعين جمل (California Walnut Commission)، إلا إن كاتز قال إن الممولين ماأثّروش خالص على النتايج).
فريق كاتز جمع 112 مشارك المفروض إن كلهم عرضة للإصابة بالسكر (سواء لإنهم بيعانوا من وزن زيادة أو مستوى السكر في دمهم ينبئ بإنهم في مرحلة ما قبل الإصابة بالسكر، أو ضغطهم عالي وغيره). الفريق أضاف عين الجمل للنظام الغذائي بتاع المشاركين لمدة 6 شهور، وبعدين شالوه من النظام الغذائي لمدة 6 شهور كمان. الدراسة توصلت لإن جودة النظام الغذائي بتاع المشاركين اتحسّنت، زائد إن فيه بعضهم بطلوا ياكلوا حاجات مش مغذية زي الأكل المغلّف، لإنهم استبدلوها بعين الجمل، كمان مفيش حد من المشاركين في الدراسة وزنه زاد. وعمومًا أصلًا المكسرات بتلكم وتشبّع عشان الدهون والألياف اللي فيها، وبالتالي محدش هيقدر ياكل أكتر من 350 سعر حراري مكسرات فوق اللي هو بياكله في العادي.
المصدر
