.
نوّرها

الفيبروميالجيا: “آه يا عضمك ويا عضلاتك يا رضا!”

كتب: أحمد حسين

ساعات كتير كلنا بنحس إننا تعبانين وهلكانين، حاسين بإرهاق في مناطق مختلفة من الجسم، زائد إن في صداع طول الوقت وعدم تركيز، ومش بس كده، ده بييجي معاهم كمان ألم سارح في الجسم كده لا تبقى عارف هو فين ولا عاوز إيه ولا حاجة خالص. أهُه كل ده بقى، ممكن يبقى بسبب مرض “جديد” ظهر من كام سنة اسمه الفيبروميالجيا أو الالتهاب العضلي الليفي المزمن.

الفيبروميالجيا كل حاجة مش سليمة ولا لوحدها

المرض ده بدأ تشخيصه من قريب، يعني من حوالي 10 سنين مثلًا مش أكتر، ومن كتر ما هو مجهول مالوش تعريف مُحدد لحد دلوقتي، لكنه ببساطة اضطراب بيؤدي لألم وإرهاق في العضلات في الجسم كله، وبيسبب آلام مُزمنة في العضلات تفضل معاك العمر كله.

سبب من أسباب غموض المرض ده إن أسبابه مش معروفة، شوية تلاقي أبحاث تقول إن سببه هو التوتر والضغط العصبي، وشوية أبحاث تانية تقول إن سببه الاكتئاب، مع إن في أبحاث بتقولك العكس وإنه هو اللي بيسبب اكتئاب مش الاكتئاب اللي بيسببه.

اعرف أكتر| مرض “الاكتئاب”.. نفسي ولا عضوي؟

في شوية أبحاث بقى متسقين تمامًا مع ذواتهم وبيقولوا إنه مش معروف أسبابه لحد دلوقتي، بس كل اللي نعرفه إنه بيجي للستات/البنات أكتر من الرجالة، وأحد الدراسات اقترحت إن ده بسبب إن الرجالة بيقدروا يفرزوا السيرتونين (هرمون السعادة) بشكل أسرع 50 مرة من الستات.

الصورة: Fibromyalgia Treatment Group

طيب إحنا مانعرفش حاجة عن المرض، بس على الأقل نعرف أعراضه، والأعراض هي اللي بتخلي الأطباء يشخصوه على الأقل. الأعراض دي بتتضمّن اللي ذكرناه فوق زي التعب والإرهاق وغيره، في كمان الأرق وعدم النوم بشكل مُنتظم، وفي تصلّب العضلات لفترة طويلة من اليوم، وصعوبة التفكير والتركيز والذاكرة بتكون بعافية كمان، ده غير وجع البطن/المعدة، والإحساس بالدوخة والغثيان، وزوّد عليهم كمان ألم الفك والأسنان، واختمها بقى بالاحساس بالتنميل في الوجه والدراعات والإيدين والرجلين والقدمين.

مرض ده ولا إرهاق ولا وهم ولا إيه؟!

متخيل بقى كمان إنك بعد كل ده، هتكون عُرضة للاكتئاب والقلق وده اللي بيكون أصعب من المرض نفسه، لأنه في النهاية المرض العضوي أسهل إلى حدٍ ما من المرض النفسي في الحالة دي. وعلشان نزيد الطين بلّة، بلّة كمان بقى، المرض ده لحد دلوقتي في أطباء كتير مايعرفوش عنه حاجة، ومالوش تخصص مُعين، يعنى لما تبقى مريض بيه مبتبقاش عارف تروح لدكتور إيه بالظبط، وبعد ما تروح للدكتور غالبًا هيحتار في المرض وهيوصف علاج للأعراض اللي عندك مش أكتر.

بمناسبة العلاج، المرض ده بحسب الأبحاث اللي اتعملت عليه بيتعالج عن طريق الأدوية المُسكنة للألم، بس قبل ما الطبيب يوصف أي دواء من دول لازم يعمل فحوصات كتير، بالذات اختبارات وتحاليل الدم، على الرغم من إن برضه تحاليل الدم ممكن ماتكونش السبيل لتشخيص المرض بصورة صحيحة، إلا إنها ضرورية على الأقل علشان صحة المريض ومدى جاهزيته لإنه ياخد أدوية مُسكنة.

الفيبروميالجيا
الصورة: pinterest

علشان كده المفروض يعني، إنه ماحدش ياخد الأدوية دي بشكل عام كده من غير إشراف الطبيب، لأن آثارها على الجسم خصوصًا إنها غالبًا بتكون أدوية بتعالج أمراض الأعصاب، وبتغيّر في كيمياء المخ، أو مستويات الهرمونات، لذلك الأفضل الابتعاد عن تناولها من غير إشراف الطبيب.

وعلشان نكون واضحين ونقول بشكل أدق، ممكن الأعراض دي تكون مجرد وهم، أو توهّم من المريض نفسه بإن الأعراض دي موجودة أو لها علاقة بمرض الفيبروميالجيا مثلًا، لذلك لازم يكون في طبيب مُشرف على الموضوع، لتجنب الوقوع في خطر الأثار الجانبية السيئة للأدوية اللي عمّالين ناخدها عمّال على بطّال كده. وفي النهاية عايزين نحاول نبعد عن التوتر ومسببات الضغط العصبي لحد بس ما نشوف حل لموضوع الأمراض الجديدة دي.


المصادر:  webmd  webmd  health  dw

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى