.
حيّ يرزق

ليه الحشرات حوالينا كتير ”أوي“ ؟!

كتبت : مها طه

تخيل كده لو كل حشرات العالم اتحدوا وعملوا كيان كبير ليهم وأعلنوا الحرب على الكوكب، تخيلت؟! ساعتها أضمن لك إن العواقب مش هتكون لطيفة خالص، المعركة دى خسرانة خسرانة، حضرتك الحشرات بتمثّل 75% من الحيوانات اللي عايشة على سطح الأرض، بص لعددهم وعددنا، عدد الحشرات على وجه الأرض يقدر حوالي بـ10 كوينتليون حشرة! مش فاهم كوينتليون؟ ولا أنا بس عموما هي 1 وجنبه 19 صفر، حاجة تخض يعني!

عدد البشر على الأرض حوالي 7 مليار، فأكيد يعنى مفيش مقارنة بين عددنا وعددهم، لو أخدناها بالتقريب هنلاقي قصاد كل مليار حشرة فى إنسان واحد. أما من الناحية التصنيفية للحيوانات، فالحشرات برضه ليها نصيب الأسد لأنه فى الوقت اللى فيه أعداد  أنواع الفقاريات المعروفة بيوصل لأكتر من 60 ألف نوع، أنواع الحشرات لوحدها تقدر بحوالي مليون نوع معروف، ونحط تحت معروف خط لأن فى أنواع تانية لسه مش داخلة فى التصنيف؟

وهنا ييجي السؤال الأهم:

يا ترى إيه هو سبب انتشار الحشرات الفظيع ده؟

رغم إن الحشرات بتواجه مخاطر كتير ممكن تهدد حياتها، عددها ده يثبت إنها واحدة من أكتر المخلوقات مقاومة وتكيف مع البيئة اللي حواليها. بدايةً من قدرتهم الرهيبة على التكاثر، بعض الأنواع بتقدر تتكاثر مئات المرات خلال فترة حياتها اللى للعلم مابتكونش طويلة بالمعنى، معظم النسل ده بيموت لكن العدد اللى بيفضل على قيد الحياة بيكون كفاية أوى لإنه يوصل لمرحلة البلوغ ويتكاثر هو كمان.

نسل الحشرات بيوصل للبلوغ بسرعة عشان كده دورة التزاوج عندهم بتبقى سريعة، وبتحصل بشكل متواصل. النسل الجديد بيبلُغ بسرعة، وينتج نسل جديد تاني اللي هيبلُغ بسرعة وينتج نسل جديد تالت وهكذا، وده بيكون نتيجته مش بس أعداد كبير من الحشرات، لأ ده كمان بسبب إنهم بيتكاثروا جنسيًا بيبقى فيه تنوع وراثى رهيب فى الأجيال الجديدة لأن جيناتهم جاية من أب وأم، فبنلاقي عندهم كنز من الجينات والطفرات الجديدة اللي بتخليهم يتمتعوا بتنوع كبير يخليهم يواجهوا بيه كل الظروف القاسية والمتغيرة الموجودة على سطح هذا الكوكب.

يعني مثلا، خنفسة اللحاء ”flat bark beetle“ ممكن تعيش فى درجة حرارة 40 تحت الصفر، فى حين إن النمل اللى بيعيش فى الصحراء الكبرى ممكن يعيش فى درجات حرارة توصل لـ68 درجة مئوية، ده غير بعض أنواع النحل اللي بتقدر تعيش على ارتفاع 5500 متر تقريبًا.

الهيكل الخارجى للحشرات عامل بالظبط كأنه درع بتحمى بيه جسمها من أى خطر خارجى ممكن يهدد حياتها، وهو صاحب الفضل فى تأقلمها على البيئات المختلفة اللي ماتقدرش كائنات تانية تعيش فيها، حتى صغر حجم الحشرات واللى ممكن يُعتبر عيب فيها هي بتستخدمه لصالحها لأن معظم الحشرات صغيرة أوي، وده اللي يخلي عدد الحشرات اللى بتحتل بيئة واحدة ممكن يوصل لملايين بتستفيد من كل الموارد المتاحة في البيئة دي.

أكيد في مرة قررت تتقصى النملة رايحة فين ومشيت فيها وراها هي وأصحابها لحد ما وصلت للجُحر بتاعهم اللي بالنسبة لك هو مجرد حفرة صغيرة فى الحيطة لكنه بيت كبير لعدد رهيب من النمل اللي عايشين جواه.

مش هنبقى بنبالغ لو قولنا إن الحشرات فعلًا بتحتل الكرة الأرضية، وبتتغذى على أى حاجة فعليًا، مثلًا بعض الأنواع منها بتتغذى على جذور النباتات والسيقان والأوراق والبذور وحبوب اللقاح وحتى رحيق الأزهار نفسها. بعض الأنواع التانية زى الدبابير بتخدر ضحياها من الحشرات التانية، ولأ مش بتاكلهم، لكنها بتحط جوه جسمهم البيض بتاعها عشان لما البيض يفقس، الدبابير الصغيرة تلاقى التغذية المناسبة، خطة فى منتهى الذكاء.

طبعًا هييجي الكلام عن أكتر حشرة مستفزة ممكن تقرفنا فى عيشتنا بعد الدبانة، وهي الناموسة اللى كلنا عارفين إنها بتتغذى علي الدم، وده طبعًا بيخلي مصدر تغذيتها متاح طول الوقت، مفيش أكتر من البشر والحيوانات يعنى، ده غير إن الدم بيتجدد أصلًا داخل أجسامنا.

فى أنواع تانية من الحشرات بتعتمد بقى بشكل رئيسى على الفضلات (البراز)، الذباب مثلًا بيضع البيض فيها، وبعض أنواع الخنافس ممكن تعمل كرات كبيرة من روث الحيوانات، واللي بتستخدمه كمصدر للغذاء وكمان مكان لوضع البيض.

 القدرة العظيمة للحشرات على التحوّل

عملية ”التحوّل“ فى الحشرات معناها إن نفس الحشرة بتاخد مراحل حياة مختلفة، بتتغذى فيها على مصادر مختلفة، فمثلًا بعض الحشرات بعد ما تفقس من البيض، تتحول ليرقة ثم عذراء ثم حشرة بالغة، الميزة دى بتُتيح للحشرات إنها تكتر من الموارد الغذائية المتاحة فى البيئة حواليها.

الفراشة أشهر مثال نعرفه للحشرات اللى بتتحول، في مراحلها الأولى بتتغذى على أوراق الشجر بشراهة، عشان تقدر تنمو بسرعة وتكوّن حواليها الشرنقة، واللى بتخرج منها بعد فترة وهى متحولة لفراشة كاملة، وفي الوقت ده بتتغذى فقط على رحيق الأزهار. ده معناه إن نفس النوع من الحشرات ممكن البالغ منه يتغذى على مصدر غير اليرقة، بالتالى ممكن يتواجدوا فى نفس البيئة من غير أى تنافس على مصادر الغذاء، العملية دى عظيمة جدًا، لأن حوالى 86% من أنواع الحشرات، بتقوم بعملية التحوّل الكامل بمراحلها دي.

خليك بقى دايما فاكر إنك كبير وهما صغيرين، وإنك عادي جدًا بتفتري عليهم وتدوسهم وتقتلهم وتغرقهم بالمية، ادعي ربنا بقى إنهم ما يحاولوش يتجمعوا ويقرروا يغزوا العالم لأن فى الحالة دى كلنا رايحين فى داهية بسبب عمايلنا السودة طبعًا. ونصيحة مني في الأخر، لو حضرتك مش بتحب الحشرات، اتفرج على فيلم ”bug’s life“، والنبي هتحبهم أوى.


المصادر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى