للموسوسين .. والنبي ما له لازمة اللي بتعملوه ده!
كتبت: يارا كمال
لو إنت من البشر الموسوسين اللي بيمسكوا الأوكرة بمنديل، وبيستحموا بجردلين مطهر عشان العيا والجراثيم، وبعدين يقوموا يصبنوا الصابونة العادية بصابونة مطهرة، للأسف إحنا جايين النهاردة ندمّر لكم بعض معتقداتكم اللي تلاقيكم بتعملوها.
1. شد السيفون:
ممكن تكون بتدوس السيفون أو الـFlusher بكوعك أو برجلك، وفعلًا بيكون عليه جراثيم، بس المشكلة إنك لما هتيجي تفتح باب الحمام أو باب الكابينة لو ده حمام عام، هيكون حد قبلك داس على الـ flusher بإيده وفتح بيها الباب، يعني لو لمست الباب، الجراثيم اللي عليه هتوصلك بشكل أو بآخر. الأفضل والأسهل إنك بعد ما تخرج من الحمام تغسل إيدك.
2. متلمسش الأوكرة:
فيه ناس بقى ناصحى أكتر وبالتالي بتمسك الأوكرة بمنديل من باب الاحتياط وزيادة التأكيد، وأحيانًا بيمتد بيهم الموضوع لمرحلة إن أي جسم زي عمود الحديد اللي بنمسكه في المترو أو الأوتوبيس عشان مانقعش ممكن برضة يمسكوه بمنديل، على أساس إن بيبقى فيه بكتريا وجراثيم كتير عليها.
لو قارننا الجراثيم اللي موجودة على أوكر الباب، واللي موجودة في إيدين الناس وبيتبادلوها بالسلام، هنلاقي إن الميكروبات اللي على الأوكر وعلى أسطح المترو مش بالضرورة تكون مضرة، في حين إن لو سلمت على حد إيده مش نضيفة، ممكن تتنقل لك بكتريا مضرة. المشكلة كمان إنك لو فاكر إن المنديل بيحميك، فأنت في الغالب بتستخدمه وترجع تحطه في جيبك يعني بتحطه في مكان يخلي احتكاكك بالبكتريا دي أكتر.
3. غطا القاعدة:
أنا ماقصدش غطا القاعدة اللي بيقفلها خالص، لأ فيه قعدات بلاستيك كدة بتحدد القاعدة نفسها، بتتحط عشان القاعدة متنقلش العدوى بين الناس اللي بيستخدموها. الكلام ده مش مظبوط، لإن الفيروسات بتكون ضعيفة جدًا، ما لم تكن جوا جسم إنسان بتهيّص، وبالنسبة للبكتريا والميكروبات زي البكتريا العقدية والإشريكية القولونية (E.coli)، فدي مش هتتنقل من القاعدة مباشرة إلا لو لمست القاعدة مباشرة وبعدين لمست بوءك أو عينك قبل ما تغسل إيدك، وبالتالي أهم حاجة لازم تعملها إنك تغسل إيدك بعد استخدام الحمام على طول. وصفة بسيطة وسهلة وهتوفر عليك فلوس ووسوسة كتير ملهاش أي لازمة
اعرف أكتر|عن الميكروبات وأنواعها: مافرقتش .. أهو كله بيجيب العلل!
4. طلّع المطهّر:
طبعًا برضة اللي فات ممكن تكون واخد بالك منه، وعامل احتياطك كمان وكل ما تسلم على حد أو تلمس حاجة تطلّع مطهّر الإيدين اللي بتبقى شايله في الشنطة ده وفاكر إنه هيحميك، اسمحلي أقولك تبقى غلطان. المطهّر ده مبيقتلش كل الجراثيم، يعني مثلًا النوروفيروس ده ميكروب بيتنقل عن طريق الأكل الملوّث وبيسبب الإسهال، الميكروب ده بيقدر يقاوم الجيل المطهّر. من الآخر، المطهّر ده ميفرقش عن الميه والصابون في أي حاجة.
5. اكتم نَفَسَك:
لو إنت من الناس اللي بتكتم نفسها لما حد بيعطس أو بيكح قصادهم، فده مش هيعمل لك حاجة برضة للأسف. لو واحد عطس أو كح من غير ما يغطي بوءه أو مناخيره، البكتريا هتنطلق في الهوا على طول. جزيئات العطسة بتنطلق بسرعة 321 كم في الساعة، وجزيئات الكحة بتنطلق بسرعة 80 كم في الساعة، وبالتالي صعب جدًا تمنعها تدخل عن طريق بوءك أو مناخيرك أو عينك حتى (هي كدة كدة هتلاقي طريقها ليك).
6. متركبش مواصلات .. أقول لك؟ اقعد في بيتكم:
ما هو ده اللي ناقص. يا جدعان كفاية وسوسة. فيه فريق من علماء الوراثة عملوا توثيق للميكروبات اللي موجودة في مترو مدينة نيويورك ولقوا إن فيه 600 نوع من الميكروبات، أغلبهم مش مضرين. خلينا نكون واقعيين. البكتريا بتغطي العالم اللي حوالينا ده كله، إحنا نفسنا عباارة عن مستعمرات بكتريا كبيرة ماشية على الأرض. يعني لو عقّمونا هننزل كام كيلو بكتيريا ولا الحوجة للدايت، بس الفكرة إننا محتاجين البكتيريا دي عشان نعيش. وبالتالي فكرة إن حاجة تكون نضيفة 100% دي أقرب للمستحيلات.
اعرف أكتر|الميكروبيوم البكتيريا اللي بتحتل جسم حضرتك!
المصادر: businessinsider sciencealert cdc bbc
