الصرع: أعراض مختلفة وأسباب مجهولة.. ووصمة اجتماعية واحدة!
كتبت: مها طــه
– عريس بيقابل عروسة في قعدة تعارف باين عليه القلق والتوتر ووالدته شكلها بتحاول تخبي حاجة.
– طفل جاب درجة وحشة في الامتحان، والدته بتجري وراه، استفزها، قامت ضرباه بغطا الحلة على دماغه.
– أب واقف قدام الحضّانة بيسأل الدكتور: “هو ابني ممكن يبقى عنده نفس المرض؟”
– الولد جاتله حمى وإحنا خايفين الأمر يتطور!
من بعيد يبدو إن كل الجمل دي ملهاش علاقة ببعضها، لكن اللي بيجمع كل المواقف دي كلمة واحدة بس: الصرع.
رابع أكثر الأمراض العصبية شيوعًا
الصرع يعتبر اضطراب عصبي مزمن وشائع. بيتسبب في نوبات متكررة وغير مبررة في الأغلب. والنوبة هي زيادة مفاجئة في نشاط كهرباء المخ. والنوبات نوعين: النوبات الكلية اللي بتؤثر على المخ ككل، النوبات البؤرية اللي بتؤثر على بؤرة (جزء) معين في المخ. الصرع بيصيب حوالي 65 مليون شخص في العالم.
الصرع ممكن يصيب أي حد في أي عمر، لكنه أكثر شيوعًا بين الأطفال وكبار السن – وهنوضح أسباب ده كمان شوية. لحد اللحظة دي الصرع زيه زي كتير من الأمراض العصبية يعتبر مالوش علاج متخصص، لكن طبعًا المصابين بيه بيستخدموا أنواع معينة من الأدوية بتساعد في تحسين الحالة، لكن مفيش شفاء تام منها، لأنه زي ما قولنا بيعتبر اضطراب مزمن.
اعرف أكتر| ما بين المرض النفسي والعقلي والعصبي
أسباب الصرع
للصرع أسباب كتير ومختلفة، لكن خلينا نقول إن تقريبًا بنسبة 6 من أصل 10 مصابين بالصرع بييجي لهم لسبب غير معلوم. لكن خلينا نتكلم عن أهم الأسباب المحتملة واللي منها نقدر نتجنبه. من أهم أسباب الإصابة بالصرع بين صغار السن والمراهقين:
- إصابات الدماغ المختلفة، وده بالمناسبة مش معناه الإصابات الناتجة عن الحوادث بس، دي ممكن تكون ضربتك لابنك/ بنتك على الدماغ سواء بإيديك أو الأخطر بحاجة تانية صلبة زي ما بنشوف كتير حوالينا للأسف، وده سواء دماغه حصلها جروح أو لأ، في الحالتين ممكن يتسببوا في الإصابة بالصرع.
- الإصابة بالحمى الشديدة ممكن يؤدي لزيادة كهرباء المخ، وبالتالي يؤدي للصرع.
- تعاطي الأم للمخدرات في أثناء فترة الحمل، من أهم الأسباب للصرع. كل دي أسباب بتخليه أكثر انتشارًا بين الأطفال.
أما عن انتشاره بين كبار السن فالسبب الرئيسي للإصابة بالصرع عند الأشخاص فوق 35 سنة هو الإصابة بالسكتة الدماغية، وأمراض الأوعية الدموية زي جلطة المخ ونقص الاكسجين في المخ، وأورام المخ، وأحيانًا بيكون السبب هو تدهور حالة المخ بسبب الخرف أو الإصابة بألزهايمر.
أما عن الوراثة فحدث ولا حرج، الصرع للأسف ممكن تورث بعض أنواعه، في العموم ممكن الصرع يصيب الأشخاص في سن ما قبل العشرين بنسبة 1 %، لكن في حالة إن أحد الأبوين عنده صرع، فخطر الإصابة بيزيد ما بين 2 لـ 5%. كمان وجود عامل وراثي مع وجود بعض المحفزات التانية يخلي نسبة الإصابة أعلى.
عادةً الصرع مش من الأمراض المؤثرة على القدرة الإنجابية، لكن لو حضرتِك مصابة بالصرع فممكن الأدوية نفسها المستخدمة لعلاجك، يكون ليها تاثيرها على الجنين، ومع ذلك برضة مينفعش تتوقفي عن تناول العلاج، استشيري دكتور النسا ودكتور الأمراض العصبية في حالتك وخليهم على تواصل، سواء من قبل الحمل، أو أول ما تعرفي إنك حامل.
أشهر أعراض الصرع
العرض الأساسي في حالات الصرع هو النوبات، واللي بتختلف من شخص للتاني على حسب نوع النوبة نفسها، وهل هي نوبة خفيفة (بتستمر لثواني معدودة بدون ما يتم ملاحظتها) ولا نوبة قوية (في الأغلب بيحصل فيها فقدان للسيطرة على العضلات وبتتسبب في فقدان الوعي أحيانًا ونسيان كل ما حدث أثناء النوبة).
- النوبات البؤرية:
ودي ليها نوعين، منها البسيط وفي الأغلب لا ينتج عنها فقدان وعي، وبتشمل أعراض زي تغيرات في قدرات الحواس زي الشم والرؤية والسمع واللمس، ده غير الدوخة وشعور التنميل خصوصًا في الأطراف. أما النوع القوي من النوبات البؤرية بينتج عنها فقدان في الوعي وأداء متكرر للحركات وعدم تجاوب في أثناء النوبة.
- النوبات الكلية:
ودي ليها 6 أنواع، منها نوبات الغياب: ودي بتُسمى نوبات الصرع الصغيرة، وأشهر أعراضها هي التحديق في الفراغ، وممكن تتسبب في حدوث حركات متكررة زي التواء الشفايف، حركة الجفون السريعة (البربشة)، وأحيانًا بيحصل فقدان للوعي لمدة قصيرة.
والنوبات الارتجاجية وبتتسمى “نوبات الصرع الكبرى”، واللي ممكن بعدها ممكن المريض مايفتكرش أي حاجة أصلًا منها ومن وأعراضها واللي منها:
- تصلب الجسم كله.
- ارتجاف الجسم (الرعشة الشديدة).
- فقدان السيطرة على المثانة أو الأمعاء، وبالتالي فقدان السيطرة على عملية الإخراج والتخلص من الفضلات.
- عض اللسان.
- فقدان الوعي
في حالة إن حضرتك أو حد من أهلك مصاب بالصرع، بعد التشخيص وأخد العلاج المناسب، لازم تتجنب بعض الحاجات اللي ممكن تكون محفز للإصابة بنوبة صرع جديدة زي: ارتفاع درجة الحرارة أو الإصابة بالحمى، صدمات الرأس، انخفاض سكر الدم (الهبوط)، انسحاب الكحوليات.
ولأن الصرع مرض خاص، بيختلف من شخص للتاني، فتجنب اللي أنت نفسك بتحس إنه قد يكون محفز، ومن أكثر المحفزات شيوعا بين مرضى الصرع: قلة النوم والضغط العصبي، التعرض لأضواء ساطعة، تناول كميات كبيرة من الكافيين أو الكحوليات والمخدرات، بعض أنواع الأدوية اللي بتتعارض مع علاج الصرع زي المنبهات، ده غير عدم انتظام وجبات الأكل، سواء بالتقليل أو الإفراط أو حتى الاعتماد على أنواع محددة من الأكل طول الوقت.
في النهاية، الصرع من الأمراض اللي ممكن التعايش معاها عن طريق اتباع تعليمات الدكتور بالحرف، ومراقبة الظروف حواليك بحيث دايما تكون في أمان وعارف إيه ممكن يسبب نوبة جديدة، والأهم لو حضرتك أب/ أم خدوا بالكم إن شوية عصبية على إبنك ممكن تخليك تضربه وتتسبب له في مشكلة تعيش معاه باقي حياته.. أولادكم أمانة.
اعرف أكتر| متلازمة «كلنا اتربينا كده» وحتمية كسر الدايرة!
