مشاركات حرة

بين الدقة والتكرار العلوم ممكن تجيب أجلك وتموتك!

كتب: حسين مجدي القزاز

في واحدة من المناطق الشعبية، طفل عنده 11 سنة، صحي من النوم واشتكي إن بطنه وجعاه جدًا. كرد فعل مصرى أصيل من الأم انطلقت بيه للصيدلية عشان ياخد حقنة أو دوا يخفف الوجع. لما دخلوا  الصيدلية، الصيدلي سأل الولد عن المنطقة اللي بتوجعه، قاطعته الأم وردت: “معدته واجعاه يا دكتور”. وكان رد الفعل من الصيدلي إنه إداها دوا يخفف ألم المعدة، ومشيت الأم هي وابنها.

بعد عدد بسيط من الساعات، والطفل لازال بيعاني من الألم، الأب بيكون رجع من الشغل، وشاف الوضع، وبيقرر هو ياخد ابنه للصيدلية، ويقول لهم يدوله حقنة بدل الدوا اللي مجابش نتيجة. كالعادة الصيدلي بيسأل الطفل بطنه وجعاه فين؟ الأب قال للولد يشاور للصيدلي، ويقوله الوجع فين. هنا الطفل شاور على جنبه اليمين من تحت. وقتها الصيدلي طلب من الأب إنه ياخد الطفل على أقرب مستشفى؛ لأنه مش متطمن من منطقة الألم، والأفضل إن الطبيب يكشف عليه. وفعلًا الأب سمع الكلام وراح لدكتور، واكتشفوا إن سبب الألم هو الزائدة الدودية، وإن الولد لازم يعمل عملية فورا عشان يتم استئصالها قبل ما تحصل مشاكل والطفل ييجي له تسمم.

السبب بقى في إنقاذ الطفل أو تسممه _السيناريو التاني_ هو مبدأ الدقة أو الاتساق “Accuracy and Precision”.
ولو إنهم يبانوا حاجة واحدة، لكن الفرق بينهم ماينفعش أبدا نغفله.

مبدأ الـaccuracy (الدقة)

بيعني قد إيه إجابتك على أي سؤال قريبة من الإجابة الصح بعيدا عن أي حاجة تانية. فمثلًا لو عندنا شخصين بيقيسوا ارتفاع مبنى، فواحد منهم طلعه 60 متر، والشخص التاني طلعه 60.5 متر، والارتفاع الحقيقي طلع 61 متر. وقتها هنقول إن الشخص التاني accurate أو دقيق، بغض النظر عن أي إجابة تانية، لأن المبدأ هنا هو أقرب إجابة للصح.

مبدأ الـprecision (الاتساق)

تعريف مبدأ الـprecision هنا معناه إلى أي مدى إجابتك كانت متسقة/متوافقة مع إجابات الآخرين أو بمعنى أصح الإجابة بتاعتك اتكررت كام مرة. فلو عندنا نفس الشخصين، وطلبنا منهم قياس مبني تاني مختلف، فالأول طلعه 40 متر، والثاني طلعه 40 متر، والقياس الصح لطول المبنى كان 50 متر، فالشخصين هنا precise.

في الصورة دي مثلا، الدايرة اللي على الشمال بتتميز بـaccuracy/ دقة عالية في التصويب، ولكن precision ضعيف لأن النقط بعيد عن بعض. أما الدايرة على اليمين بتتميز بـprecision عالي، لأن النقط جنب بعض، ولكن accuracy/ دقة ضعيفة لأنهم بعيد عن المنتصف.

نرجع بقى للقصة اللي حكيناها في الأول خالص. في أول مرة، الطفل اشتكي إن بطنه وجعاه، والأم قالت للصيدلي إن ابنها معدته وجعاه. في المرة التانية، الأب طلب من ابنه يشاور على المكان اللي واجعه للصيدلي، والطفل فعلا شاور على مكان الألم.

المرة الأولى

الطفل لما اشتكى للأم كان بيستخدم مبدأ الـprecision، ولما الأم راحت للصيدلي بردو استخدمت نفس المبدأ، وهنا ماكنش قدام الصيدلي مع تكرار نفس الإجابة غير إنه يديله دوا لأن ده عَرض شائع بين الأطفال.

المرة التانية

الأب كان عاوز يساعد الصيدلي في معرفة السبب عشان كده طلب من الطفل إنه يشاور علي المكان اللي واجعه عملًا بمبدأ الـAccuracy/ الدقة. الطفل يا عيني تعبان ماشي بين المبدأين، وبيسمع الكلام مش فاهم اللي بيحصل. لكن وقتها نفس الصيدلي لاحظ إن المكان خطر، مش مجرد ألم في المعدة، لأن المرة التانية اتشاورله على المكان، وساعتها نصحه إنه يروح المستشفى عشان يتطمنوا.

امتى أبقى precise وامتى أبقى accurate؟

طبعا بعد الكلام ده ممكن حد يقول يعني الصح إني أبقى دقيق أو accurate، وما أبقاش precise. بس في الحقيقة في حاجات كتير ماينفعش نستخدم فيها مبدأ واحد بس. فمثلا مبدأ الـprecision بيحصل في الصحة والطب من خلال رصد الأعراض المتشابهة عن طريق إجراء تجارب لعدد من المرات، ومنها بيقدر الدكتور يوصل لصورة أولية لإيه ممكن يكون المرض، وإحنا كمرضى لازم نكون دقيقين في شرح الحالة والوضع اللي بنمر بيه عشان نعطي أفضل معطى ومنه نوصل لأحسن نتيجة/ علاج.

في حياتنا عموما بنستخدم الـprecision كتكرار، وإحنا بنطبخ أو وإحنا بننضف أو حتى وإحنا بنتفق على معاد. بس اعرف أي مبدأ هتستخدمه لما تيجي تتأخر على أصحابك ويتصلوا بيك. هل هتبقي accurate وتقولهم إنك لسه عالسرير ولا هتبقى precise وتقولهم إنك نازل عالسلم؟

بس خد بالك هنا العلوم ملهاش ذنب لو عرفوا الحقيقة وقرروا يزعلوك 😀


المصادر: thoughtco labwrite sciencenotes

الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق