أنثى الكانجارو: ماكينة إنجاب الأطفال في عالم الحيوان!
كتبت: مها طـه
الست المصرية في نظري بطلة، تعب وشقا جوا البيت وبراه كمان، يعني مثلًا كانت ليا واحدة جارتي، عندها طفلة عمرها 6 سنين، وطفل 3 سنين وكانت حامل. توصل الحضانة والمدرسة وتروح الشغل وترجع تقوم بكل واجبات البيت، كل ده من غير أي تقصير ولا تهاون.
لكن دايمًا كان بيتقال على جارتي ”أرنبة“ أحب أقولهم إن أنا و أنتوا كنّا طيبين وظالمين الأرانب لأنها مهما كانت مش هتكون زي أنثى الكانجارو ، وده اللي عرفته لما قابلت معلومة أثارت اهتمامي جدًا، وهي إن أنثى الكانجارو (الكنغر) عندها بدل المهبل الواحد تلاتة!
الثدييات غير المشيمية: من الرحم مباشرة للكيس!
مبدئيًا خلينا نقول إن الكنغر من الثدييات لكنه من الثدييات غير المشيمية، بمعنى إن الجنين مش بينمو داخل الرحم وبيتغذى عن طريق المشيمة زي ما بيحصل في كل أنواع الثدييات المشيمية، واللي منها الإنسان.
الثدييات غير المشيمية فيها الجنين بيتكون داخل الرحم، لكنه بيخرج منه في مرحلة مبكرة من مراحل النمو، وبيكمل باقى فترته داخل كيس موجود عند بطن الأم عشان يرضع من مامته ويكمل نموه. أشهر أمثلة للحيوانات غير المشيمية هي: الكانجارو ودب الكوالا والفأر الجرابي.
جهاز تناسلي مختلف!
الثلاث أنواع دول كمان بتختلف عن الثدييات المشيمية في حاجة تانية، وهو إنهم معندهمش ثدي بالمعنى، لكنها مجرد فتحة بيخرج منها السائل اللي بيتغذى عليه الصغار.
الأغرب بقى هو إنهم كمان مختلفين عن الثدييات المشيمية من حيث الجهاز التناسلي للأنثى. أنثى الثدييات غير المشيمية عندها بدل الرحم اتنين وبدل المهبل تلاتة! أما الذكر فيها فغالبًا بيبقى العضو الذكري فيه كأنه مقسوم لاتنين! إيه الأرقام العجيبة دي.
وللتوضيح أنثي الثدييات المشيمية ماعندهاش 3 فتحات للمهبل، هي فتحة خارجية واحدة، لكنها من جوا بتتفرع لتلات قنوات مهبلية. القناتين على الأطراف هما اللي بيوصلوا الحيوانات المنوية للرحم عشان يحصل الإخصاب ويتكون الجنين، أما القناة اللي في النص، فهي دي اللي بيتولد منها الجنين الصغير، اللي زي ما قلنا بيكون غير مُكتمل النمو وبيكون حجمه صغير.
يعني مثلًا في حالة الكنغر، فالجنين لما بيخرج من الرحم بيبقى في حجم بذرة الفول تقريبًا، ومن المستحيل إن حجمه يبقى أكبر من كده وإلا مش هيعرف يخرج من جسمها. مدة الحمل في الكانجارو بتمتد لحوالي 33 يوم بس.
طبعًا دلوقتي عرفنا ليه ذكر الثدييات غير المشيمية بيبقى العضو الذكري فيه متقسم لنصين، عشان بقدر يوصل الحيوانات المنوية للقناتين المهبليتين اللي على الأطراف. وبالرغم من وجود القناتين دول واللي بيفتحو جوا رحمين منفصلين، إلا إن الحمل بيحصل في رحم واحد بس، وهو الرحم اللي بتكون موجودة فيه البويضة.
أنثى الكانجارو: ماكينة إنجاب أطفال
وهنا خلينا شوية نتكلم عن الكنغر أو الكانجاور باعتباره المثال الأشهر في ذهننا، الكانجارو بيُعتبر ”ماكينة“ إنتاج للصغار. السبب في ده هو الاختلافات الكبيرة دي، والتركيب الوظيفي المدهش ده. أنثى الكنغر ممكن تبقى حامل في جنين، وفي نفس الوقت عندها جنين تاني جوا الكيس بتاعها، وعندها كنغر صغير مولود ولسة بيرضع منها! تخيلوا كده.
بمجرد ما الجنين الصغير اللي جوا الرحم يتولد، بيخرج من الرحم مرورًا بالقناة المهبلية اللي في النص ومنها يتسلق جسم الأم، وهو لسة مفيهوش أي تركيب مميز اللهم إلا عينين وأيدين بس، الجنين بيوصل لحد الكيس ويستقر جواه، ويبدأ يلتصق بواحدة من الحلمات عشان يتغذى ويكمل نمو ويخرج للحياة الطبيعية بعد حوالي من 6 لـ9 شهور جوا الكيس.
لما الكانجارو بيخرج من الكيس بيبقى مُكتمل النمو تمامًا، وبيقضي حوالي من 4 لـ11 شهر بيرضع من أمه، أول ما الجنين بيتولد ويدخل الكيس، ممكن الأم بمنتهى السهولة تحمل في جنين تاني، وبكده ممكن في نفس اللحظة تبقى الأنثى بتغذي جنين جوا الرحم، وجنين تاني جوا الكيس، وكنغر صغير بيرضع منها.
كمان من المثير للاهتمام إن نوع اللبن اللي بيتغذى عليه الجنين اللي في الكيس مختلف عن اللبن اللي بيرضعه الكنغر الصغير اللي برة الكيس، وهتلاقوا هنا فيديو بيوضح عملية ولادة حية لكانجارو، ودخوله جوه الكيس ونموه جواه، وأخيرًا الحمدلله إننا كستات مش كانجروات والله 😀
https://www.youtube.com/watch?v=2lCKc8tURtc
المصادر: discoverwildlife study.com bust.com blogs.discovermagazine
