.
حيّ يرزق

الجهاز العصبي المعوي: مخ تاني بيتحكم فيك وفي الاولاني!

كتبت: مها طـه

المخ هو غرفة التحكم المركزية، كل حاجة بنحسها وبنفكر فيها، أي وظيفة بيقوم بيها أي عضو في الجسم، أي فعل إرادي أو لا إرادي، كل ده خاضع لسيطرة المخ عليه، المشكلة الحقيقة _بالنسبالي على الأقل_ إننا ولحد دلوقتي مازلنا مش فاهمين المخ أوي أصلًا.

مخ الإنسان اللي بيتكون من حوالي 100 مليار خلية عصبية، بيتواصلوا مع بعض عن طريق الاشارات الكهربية اللي بتحمل أوامر معينة وتنقلها من خلية لخلية، شبكة التواصل العظيمة دي هي السبب في كل اللي قولناه ده. بكدة فالمخ هو العضو الأكثر تعقيدًا ومش هتبقى مبالغة لو قولنا الأهم على الإطلاق بين كل أعضاء الجسم، ومش بس في جسم الإنسان لكن كمان كل الفقاريات. بس في المقال ده مش هنتكلم عن المخ اللي كلنا عارفينه، انا بس هقولك إنك ببساطة عندك مخ تاني !.

الجهاز العصبي المعوي .. مخ تاني وتالت كمان

الجهاز العصبي المعوي ده هو مخك التاني، وأهم جزء في الجهاز العصبي المعوي هو العصب الحائر أو العصب المبهم، وده واحد من الأعصاب القحفية _أيوة اسمها كدة_، ودي الأعصاب اللي بتنشأ من المخ وتروح لمناطق مختلفة في محيط الرأس والرقبة، زي العصب البصري والعصب السمعي والعصب المسئول عن تحريك الرقبة.

الجهاز العصبي المعوي

العصب الحائر هو الوحيد في الأعصاب القحفية اللي بيمتد من المخ لأماكن تانية في الجسم، من أول الأحبال الصوتية للقلب والرئة ومعظم أجزاء القناة الهضمية، ومش بس كدة لكن العصب ده هو المسئول عن توصيل رسائل “الهروب أو المواجهة” لجميع أنحاء الجسم، وده اللي بيفسر تأثير الحالة دي من التوتر على صوتك وضربات قلبك ومعدل تنفسك وأحيانًا المغص وكركبة البطن.

اعرف أكتر|التوتر فيه سمٌ قاتل!

على الرغم من إنه المفروض إن العصب الحائر بينقل الأوامر والاشارات العصبية من المخ لكل الأعضاء دي، إلا إن العلماء اكتشفوا إن من 80 لـ90% من ألياف الجهاز العصبي المعوي هي اللي بالعكس بتبعت الإشارات من الامعاء للمخ.

في الحقيقة الجهاز العصبي المعوي عبارة عن شبكة كثيفة ومتداخلة من الأعصاب، اللي بتتحكم في كل أجزاء القناة الهضمية من أول المرئ ولحد فتحة الشرج، بمعنى أوضح غالبًا بيكون مش محتاج المخ أصلًا في حاجة، حتى لو حصل قطع في العصب الحائر، بيفضل الجهاز العصبي المعوي قادر إنه يقوم بوظايفه وينظم كل العمليات الحيوية المتعلقة بالهضم زي الانقباضات والانبساطات اللازمة للهضم، وده لأنه بيتمتع بشبكة معقدة من الأعصاب.

طريق السعادة رايح جاي 

الجهاز العصبي المعوي هو مخك التاني  اللي بيتحكم فيك بشكل إنت نفسك مش متخيله. من المنظور التطوري وقبل ظهور فكرة الأكل الآمن، كان أحد أكبر المشاكل اللي بتواجه الإنسان الأول هل يا ترى الأكل اللي هياكله آمن؟ هل ممكن يخليني أتعب؟ هل هيديني الطاقة الكافية؟، وكان ده هو السبب في وجود اتصال مباشر بين المخ والجهاز الهضمي.

الدهون والسكريات مثلًا بتُعتبر مصادر جيدة جدًا للحصول على الطاقة في الجسم، وعشان كدة الجهاز الهضمي طور آليات تخليه يقدر يقول للمخ يحس بالسعادة لما ناكل سكريات أو دهون، وبالتالي المخ يفرز هرمون الدوبامين (أحد هرمونات السعادة والراحة) لما تاكل النوعية دي بالذات من الأكل، وللأسف هو ده السبب في الميل البشري الرهيب لأكل السكريات والدهون.

الأغرب بقى في موضوع الجهاز العصبي المعوي، لما تعرف إن الميكروبات الموجودة في جهازك الهضمي بالفعل بتفرز حوالي 50% من كميات الدوبامين (هرمون الحب) وحوالي 90% من السيراتونين (هرمون السعادة) الموجودين في جسمك، وده اللي بيفسر وقوعك في حب سندوتش الشاورما إكسترا تومية، وامتنانك الشديد للشوكولاتة ومحاولاتها لظبط الموود.

المشكلة الحقيقية بقى في الكلام ده إن بكدة بقى الميكروبات دي قادرة إنها تغير في ميولك الغذائية، وتدفعك دفعًا ناحية سلوكيات غذائية مختلفة ممكن تكون مضرة في الأكل، وكل ده بهدف الحفاظ على بقاءها مش عشانك ولا حاجة. نوع النظام الغذائي اللي بتتبعه بقى هو اللي بيحدد نوع البكتيريا اللي بتعيش في جهازك الهضمي، وكمان بتتحكم في مدى نموها وتكاثرها، وده اللي بيدفع البكتيريا لإرسال إشارات عصبية للمخ عن طريق العصب الحائر، عشان تؤمر المخ بإنه يخليك تاكل نفس نوعيات الأكل اللي هي بتحبها.

اعرف أكتر|الميكروبيوم.. وعمليات نقل الفضلات!

فكرة التوجيه دي هي اللي دفعت بعض العلماء لاقتراح العلاج بالبروبايوتكس (أنواع من البكتريا الجيدة اللي بتعيش في الجهاز الهضمي) أو عمليات نقل الفضلات كحل فعّال لمشكلة زيادة الوزن والميل للأكل، عن طريق التخلُص من أنواع مُعينة من البكتيريا، واللي بتخلي الشخص عنده ميل زيادة للأكل وخصوصًا اللي بيحتوي على نسب عالية من السكريات والدهون.

الجهاز العصبي المعوي

بكتيريا الأمعاء صاحبة القرار

حاليًا العلم بيُشير للبكتريا الجيدة في الجهاز الهضمي كدليل على سلامة الصحة العقلية والعاطفية، مثلًا الفئران اللي بتنمو في بيئة مُعقمة بحيث ميكونش عندهم بكتيريا في الجهاز الهضمي، بتظهر عليها سلوكيات مماثلة لسلوكيات البشر المصابين بالتوحد، العلماء كمان لما فحصوا مخ الفئران دي لقوا تغيُرات كبيرة في مستويات السيراتونين وأنواع خاصة من البروتينات المرتبطة بالتعلُم وتكوين الذاكرة.

قام العلماء بتغذية الفئران بأنواع معينة من البروبايوتكس عشان تحفز تكاثر الميكروبات الصحية،  وكانت النتيجة إن الأعراض اللي بيعاني منها الفئران اختفت، وده معناه إن الجهاز العصبي المعوي هو اللي بيتحكم في السلوك والصحة العقلية. وفي تجربة تانية استمرت لمدة 30 يوم، تم فيها اعتماد نظام غذائي يومي من الزبادي المحتوي على البروبايوتكس، وكانت النتيجة هي انخفاض مستويات القلق والاكتئاب مقارنةً بالأشخاص اللي بيشربوا لبن غير محتوي على البكتيريا.

في دراسة تانية على الفئران برضة، الباحثون لقوا إن الفئران اللي تم تغذيتها ببكتيريا مُعينة، ارتبط الموضوع عندهم بمستويات هرمونات توتر أقل في الدم، وكمان كان أداؤهم أحسن في الاختبارات الخاصة بالتعلُم والذاكرة، لكن لما العلماء قطعوا العصب الحائر، اختفت كل الحاجات دي. ده معناه إن البكتيريا هنا هي المسئولة عن التحكم في المشاعر.

اعرف أكتر|معجزة الأكل.. طبق الملوخية يحميني من الاكتئاب!

دور البكتيريا دي مش مُقتصر على الأفراد، دي كمان ليها تأثير على الجماعات، لأنها ببساطة بتتنقل بين الأفراد وبعضهم ضمن الجماعات، ومش بس كدة دي ليها القدرة على تغيير جينات الشخص، وبالتالي يحصل توارث للصفات والبكتيريا كمان بين الأجيال.

ده غير طبعًا تأثيرها المهم على سلوكيات البشر مع بعضهم، لما تكون بكتيريا الجهاز الهضمي جيدة، ده هيقلل من المشاعر السلبية ومن انتقالها بين الناس وبعضها، وبالتالي الناس تبقى متسامحة أكتر وعندهم قدرات اكبر على التواصل وبناء علاقات أقوى، وبالطبع العلاقات القوية دي كمان بتنطبق على العلاقات العاطفية، وبالتالي تبقى في فرصة أكبر للتكاثر وإنتاج أجيال جديدة بتحمل نفس البكتيريا. عرفت بقى هتحدد شريك حياتك إزاي؟ متزعلش بقى تاني لو حد قالك إنت ماشي ورا بطنك، قوله كلنا هذا الشخص.


المصادر:  bbc  ted  scientificamerican sciencealert  hopkinsmedicine

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى