7 حيوانات ماتاخدش منهم أي نصايح تخص العلاقات العاطفية
كتب: أحمد حسين
العلاقات شيء مُعقّد جدًا، والقصد هنا العلاقات العاطفية بشكل واضح، وتعقيدها جاي من كونها مالهاش كتالوج واضح، وما تصدقوش اللي يقولوا لكم إن معاه الكتالوج، والحقيقة ده شيء مُريح إلى حدٍ ما لأنه بيعني إن مفيش صح وغلط، المهم إن الطرفين يكونوا مرتاحين. لكن الواحد ساعات بيحب يسمع عن علاقات تانية غير علاقته، لعل وعسى يعني ياخدهم عبرة، وإحنا النهاردة هنتكلم عن علاقات مميزة بس مش لبني آدمين لأ لحيوانات. 7 حيوانات ماتاخدش منهم أي نصايح تخص العلاقات العاطفية.
سمك أبو الشص – Anglerfish
واحدة من الأسماك المخيفة. ضخمة وعندها أسنان كبيرة، وبتتميز بزائدة في مقدمة الرأس كده، بتستخدمها في الصيد. المهم السمكة دي ليها طريقة غريبة جدًا في التزاوج، لأن الإناث بيكون حجمها أكبر بكتير من الذكور، فاللي بيحصل إن الذكور بيلزقوا في جسم الأنثى، والأنثى بتتغذى على المُغذيات والحيوانات المنوية اللي في جسمه، وتفضل تسحب فيهم لحد ما يختفوا تمامًا.
بعد ما الذكور بيخلّصوا كل المُغذيات اللي جوة جسمهم، بيندمجوا مع جسم الأنثى، وبيبقوا هما الاتنين واحد في النهاية. وفي الحقيقة، الأنثى مابتكتفيش بذكر واحد، بل عدة ذكور ممكن يعملوا نفس العملية دي، في أوقات متقاربة، والموضوع يمشي ومايجراش حاجة عادي. بعد ما يحصل ده، تبتدي تضع البيض بتاعها، اللي ممكن يوصل عددهم لمليون بيضة.
ثعالب البحر (قضاعة بحرية) – Sea Otter
حيوانات تشبه الدببة شوية، بس حجمها أصغر بكتير. كل فترة بيتنشر لهم صور في مكان ما، عبارة عن أنثى وذكر ماسكين إيد بعض ونايمين على الميّه. طبعًا بيُعتبروا لُطاف وجُمال وبيتقال فيهم شِعر، بس الحقيقة غير اللي في الصورة خالص. ذكر ثعلب البحر بيتزاوج مع عدد كبير من الإناث خلال فترة التزاوج، وكل واحدة فيهم بيقعد معاها يومين أو تلاتة، وبعدين يسيبها ويروح لغيرها.
الأنثى بقى بتربّي الأطفال وتعتني بيهم، في حين إنه عمّال يتزاوج مع الإناث التانيين ومش داري بيها ولا بالطفل. المشكلة الأكبر كمان، إن الذكر لما بيجي يمارس الجنس مع الأنثى، بيمسك راسها أو أنفها بأسنانه، وبيسبب لها عاهة مستديمة. كمان الأذى ده مابيتوقّفش عند الأنثى، ده بيمتد لحيوانات تانية، منها مثلًا الفقمات، اللي بيغتصبها ذكر ثعلب البحر لحد الموت، بس علشان يستمتع مش أكتر من كده. ماطلعوش لُطاف مش كده؟
الكركند (الاستاكوزا) – Lobster
في مسلسل “F.R.I.E.N.D.S”، فيبي قالت لأصدقائها إن الكركند دول كائنات رومانسية جدًا، لأنهم بيتجوّزوا طول الحياة، والحقيقة إن الكلام ده خاطئ جدًا. اللي بيحصل إن الأنثى بتستنى لحد ما تعرف مين هيبقى الذكر المُهيمن، وتروح تتزاوج معاه تزاوج خاطف، مابيستمرش كتير، علشان بيكون في بعدها واحدة تانية، وهكذا بقى، الإناث بالدور بيتزاوجوا مع الذكر المُهيمن. طبعًا الحاجة الإيجابية في الموضوع، إن الأنثى بيكون ليها دور في الموضوع، فهي اللي بتغري الذكر علشان يحصل التزاوج، بس يعني فكرة الطابور والدور في التزاوج دي مش حلوة أوي.. ولا إيه؟
عنكبوت الشباك الحاضنة – Nursery Web Spider
تقريبًا دي واحدة من أغرب العلاقات العاطفية في المملكة الحيوانية. اللي بيحصل إن الذكر بيصطاد فريسة، وبيلفّها لفة هدايا وياخدها ويروح بيها للأنثى، فالأنثى تاكلها وتستمتع. لحد هنا والموضوع لطيف جدًا، بس اللي بيحصل بعده مش لطيف خالص. بالأساس، هو بيكون واخد الهدية دي، علشان الأنثى ترضى عنه وتمارس معاه الجنس، وبعد ما يخلصوا العملية الجنسية بتحلّي بيه هو نفسه. من البؤس بقى، إنه ساعات بياخد معاه لفة فاضية مفيش فيها هدية ولا حاجة، أو بياخد هدية وبيجوع في نص الطريق فبياكلها، وبعدين بيروح ويقدمها علشان يمارس معاها الجنس. فيمكن علشان كده بتاكله؟
الزرافة – Giraffe
تقريبًا ده الحيوان الوحيد، اللي ممكن يكون صادم للبعض، بس يعني اطمّنوا، الموضوع مش صادم أوي أوي يعني. الزرافة بتُعتبر بالنسبة لناس كتير رمز لأشياء لطيفة، حتى إن صُنّاع الهدايا، عملوا سلاسل عليها زرافتين عاملين برقبتهم الطويلة شكل قلب. بس في الحقيقة، الزرافات مابتتزاوجش كتير، ولما بيحصل بيبقى الموضوع غريب حبّتين.
اللي بيحصل إن ذكر الزرافة بيطارد الأنثى، لفترة طويلة وهو مستثار جدًا، وهي تفضل تبعد عنه على قد ما تقدر، لحد ما يتمكن منها ويبدأ في التزاوج. بيخلص العملية دي في قد إيه تقريبًا؟ في 3 ثواني بس. فيعني ماكانش فيه داعي للأكشن ده، طالما الموضوع 3 ثواني. المهم إن ده بيحصل على الأرجح من ذكر الزرافة الكبير في السن، تجاه الزرافات الصغيرين في السن، وبعدها بيحملوا لمدة سنة تقريبًا. بالمناسبة، ذكر الزرافة الصغير في السن غالبًا مابيحبش يتزاوج، بيعيش حر، لحد ما يقلب في النهاية مُسن بيطارد المراهقات الصغيرة وكل ده علشان 3 ثواني من المتعة ليه.
أفعى الرباط الأحمر – Red Garter Snake
نوع من الثعابين، منتشر على الأرجح في أمريكا وكندا. ليها أنواع كتير، بس إحنا هنتكلم بشكل خاص عن أفعى الرباط الأحمر، اللي العلاقات العاطفية بين الذكور والأناث في مجتماعتهم غريبة شوية. وقت التزاوج، بتحصل إثارة جماعة للذكور، فممكن تلاقي 100 ذكر بيطاردوا أنثى واحدة بس، وفجأة تلاقي الأنثى دي في نص دايرة كبيرة من التزاوج، تخيلوا كده 101 ثعبان عمّالين بيتزاوجوا بنهم شديد، 100 منهم ذكور، وأنثى واحدة بس.
حلزون الحدائق – Garden Snail
من صورتهم شكلهم غلبان كده وطيب، بس في الحقيقة، العلاقات العاطفية اللي بتحصل بينهم غريبة جدًا. الحلزون بالأساس خُنثى، يعني عنده الأعضاء التناسلية للأنثى والذكر في نفس الوقت. لما بيحصل تزاوج ما بينهم، مابيختاروش مثلًا حد فيهم يبقى أنثى وحد ذكر، لأ، الاتنين بيبقوا ذكور وإناث في نفس الوقت والاتنين بيحملوا. بس مش ده الأغرب، الأغرب بقى إنه طريقة ممارسة الجنس بينهم، بتتم عن طريق عضو حاد بيسموه “سهم الحب – Love Dart”، لأنهم بيبدأوا “يطعنوا” بيه بعض، جزء منهم بيطعن مرة وخلاص، وجزء تاني بيطعن أكتر من مرة، وجزء بيطعن بلا توقف لحد ما شريكه يموت. وده غالبًا الجانب المظلم لفياجرا الحلزونات.
المصادر: popsci hungermtn onekindplanet nature
