10 معلومات غريبة عن العناكب.. كلها ستدهشك
العنكبوت النونو .. نونو إيه؟ أومال لو مش نونو كان عمل إيه؟
كتبت: يارا كمال
رغم إن رجليه الكتير دي شكلها يخوّف، إلا إن كونها رفيّعة أوي كده بيثير شفقتي عليه، دي تكاد تكون في رُفع خيوط شبكته، ده بغض النظر طبعًا عن الأستاذ أبو عنكبوت بتاع شركة المرعبين المحدودة أو العناكب الكبيرة، أنا بتكلّم هنا عن العناكب اللي بنشوفها في البيت عادي. بس بشكل عام، العناكب مخيفة جدًا، كفاية موضوع الفخ اللي هي بتنصبه للحشرات ده. الصراحة مش عارفة ليه دايمًا احنا بناخد التعابين والتماسيح رمز للغدر، وما بنجيش ناحية العنكبوت. بس سواء كنت بتخاف من العنكبوت أو مابتخافش، المعلومات الجاية دي هتخوّفك من العنكبوت.. استعدوا!
10 معلومات غريبة عن العناكب.. كلها ستدهشك 😀
اللي معاه ربنا يمشي على الميه:
العنكبوت يقدر يمشي على الميه، بإنه يوزّع وزنه على رجليه التمانية. كمان جسم العنكبوت بيبقى متغطي بشعر صغير، فلو اتغمر بالميه، هينصب حوالين جسمه طبقة من الأوكسجين، وبالتالي نقدر نقول إنه مابيغرقش تحت الميه، وبعض الأنواع بتفضل تحت الميه لساعات كتير، وفيه أنواع أصلًا بتعيش تحت الميه، فماتحاولش تغرّقه.
مش بس القدماء المصريين اللي بيحنطوا:
فيه نوع من العناكب اسمه (Orb spider)، النوع ده بيعمل أفضل الشِبَاك ما بين باقي العناكب. النوع ده بيمسك الفريسة بتاعته، ويلفها بأكبر قدر ممكن من الحرير بتاعه، لحد ما يحنطها. الكلام ده وهي لسه عايشة.
إحنا لسه هنستنى لما ناكلها عشان نهضمها:
من أكتر الحاجات اللي لفتت نظري في العنكبوت، إنه ازاي وهو رفيّع كدة بيقدر ياكل حشرة كبيرة بالنسبة له زي الصرصار؟ العناكب بتاكل عن طريق حاجة اسمها الهضم الخارجي. العنكبوت بيقطّع الفريسة بأسنان خاصة كدة عنده، ويفرز عليها عصارات هضمية قبل ما ياكلها، ويحوّلها لسائل يقدر يمصّه ببوءه، لإن القناة الهضمية بتاعته، الأمعاء والمرئ مهيئين بس لإنهم ياخدوا سوائل، وفيهم فلاتر خاصة بتفلتر الأكل من أي أجزاء صلبة فيه.
قد الفيل ويتسر في منديل:
العنكبوت عامل زي صاحبك اللي بياكل أد ما ياكل، ومايتخنش. عملية الهضم الخارجية دي بتساعده ياكل كم كبير من الحشرات. لك أن تتخيّل إن كل سنة العناكب في العالم كله بتاكل من الحشرات ما يساوي وزن تعداد سكان بريطانيا. خلي بالك إنت مش مقعّد العنكبوت اللي معاك في البيت ببلاش، لإن العنكبوت بيخلّصك من كم كبير من الحشرات.
الحشرة هتقع يعني هتقع:
عالِم الحيوان فريتز فولراث اكتشف إن شبكات العنكبوت بتنجذب للكهربا الاستاتيكية (الكهربا اللي بتنتج عن عدم التوازن ما بين الشحنات السالبة والموجبة) اللي بتيجي من الحشرات الطائرة. وبفضل اللصق الموصل للكهربا اللي بيبقى منتشر على سطح الشبكة، الشبكة بتمسك أي جسم مشحون كهربائيًا بما في ذلك الحشرات الطائرة، والشحنة دي بسبب احتكاكها بالهوا أثناء الطيران. معنى كدة إن قبل ما الحشرة تلحق تقرب كفاية عشان تاخد بالها من الشبكة، تكون الشبكة صادتها.
ولا نطة السقا:
فيه أنواع من العناكب زي عنكبوت الحمار الوحشي (Zebra Jumping spider)، تقدر تنط مسافة تساوي 25 ضعف طولها، عشان تهاجم فريستها وتفاجئها.
احنا كدة في الغربة بناكل لحم بعض:
فيه نوع من العناكب اسمه (Daddy long legs). العنكبوت ده رجله طويلة وضعيفة وبيقدر يهاجم بيها الفريسة، من غير ما يلمسها بجسمه، وبيقدر ياكل كل أنواع الحشرات حتى العناكب التانية، لدرجة إنه يروح لهم شِباكاهم، ويوقعهم وياكلهم فيها.
خلصت حاجتي من جارتي:
البروفيسور كريم فاهد، خبير في الانتقاء والصراع الجنسي عند العناكب، بيقول إن العنكبوت الأنثى في بعض عائلات العناكب زي (False Widow Spider)، بتاكل العنكبوت الذكر بعد العلاقة الجنسية. رومانسيين أوي.
في حين إن الذكور في بعض الأحيان بتبقى فعلًا رومانسية، وبتلف حوالين الإناث جزء من الحرير بتاعها من باب الغزل.
مش كل الأعضاء التناسلية زي بعضها:
العناكب معندهاش قضيب –العضو الذكري- فبتتزاوج عن طريق الزوائد الأمامية، ودي بتكون شبه رجلين صغيرة وبيبقى اسمها (Pedipalps). في الذكور، الزوائد دي بتكون شبه الحقنة وليها نهايات متضخمة. الزوائد دي بتاخد الحيوانات المنوية من جسم الذكر. بعد كدة، الذكر بيحاول يدخّل واحد أو اتنين من الزوائد دي في الفتحات التناسلية في جسم الأنثى واللي بتقدر تحتفظ بالحيوانات المنوية لمدة تصل إلى سنتين.
إنتي يا ماما مش بتحبي أخويا؟ طب ليه كلتيه؟
أول ما عرفت المعلومة افتكرت طفل، كان فاكر إن أمه كلت أخوه عشان في بطنها يعني. العناكب في الطبيعي بتحط البيض بتاعها في أكياس واللي تصميمها بيختلف من نوع لنوع. أما الـ(Daddy Long Legs) بتحط الكيس بتاعها بين الفكين يعني في بوءها. الموضوع مقرف، صح؟ خد عندك بقى. العناكب الصغيرة بتفضل عايشة في بوءها بعد ما البيض يفقس، لحد ما ينضجوا شوية. العناكب الصغيرة بتسلخ نفسها من الهيكل الخارجي بتاعها وتكبر، كل ده جوة بوء الأم.
وأخيرًا أتمنى إن كابوس النهاردة ما يكونش عبارة عن عنكبوت. تأكدوا إن ضميري هيأنبني … شوية. ليه حق يبقى العنكبوت هو مدير شركة المرعبين المحدودة.
المصادر: telegraph loc.gov books.google
