”ماحدش بينجرح أوي غير لما بيحب أوي“ حقائق غريبة عن الانفصال!
كتبت: مها طه
“سميحة وصلاح” واحدة من أشهر الثنائيات في السنيما المصرية، كفاية مشهد حبهم الخالد وهما بيعدوا 1،2،3 قبل ما يقفلوا السكة 😀 وبعد كدI كل تبعات قصة الحب الأول اللي وقف عندها “صلاح” أو عبدالحليم من غير ما يقدر يتخطاها، حتى لما اتجوز فضل فاكر إنه مش هيقدر يتجاوز التجربة، والحقيقة كلنا في مرحلة ما من حياتنا على الأقل مرينا بالتجربة دي.
سواء كان الحب الأول أو العشرين، كلنا مرينا بحالة الحب اللي فيها بنتعلق أوي بشريكنا ونبدأ نتخيل إن الانفصال عنه مستحيل ولو انفصلنا نحس إن الحياة خلاص وقفت ونكتئب ونستسلم للحزن والانكسار، الغريب إننا بعدها – بيوم أو بألف- بنلاقي نفسنا فعلًا تجاوزنا وقدرنا نعيش وننبسط ونضحك من قلبنا ويمكن كمان نرتبط ونحب من جديد ولا الهوا.
اعرف أكتر|سيكولجية الحب: 8 أسباب نفسية للحب
الانفصال.. انت متبرمج على الموضوع متقلقش
في دراسة نشرتها جامعة سانت لويز الأمريكية توصل مجموعة من الباحثين لاكتشاف إن البشر اتخلقوا من الأساس وجواهم قدرة فطرية على تجاوز الأزمات العاطفية، و الدخول فى علاقات جديدة بعدها، من خلال نظام معين فى المخ بيساعد على تجاوز الفترات الصعبة فى الحياة، وتخفيف الألم الناتج عنها وبالتالي بيختفي مع الوقت.
دكتور”“برايان بوتويل“عالم الأوبئة، قال إن العملية دي جزء من عملية الانتخاب الطبيعي، وإن القدرة على الإحساس بالعاطفة، والإنجذاب، والحب فى ظروف معينة هو اللى ساعد أجدادنا فى الحفاظ على النسل.
أسباب إنهاء العلاقات عند الرجل بتختلف عن أسبابها عند الست، فى معظم الأحوال الراجل ممكن ينهى العلاقة بسبب الخيانة، فى حين إن المرأة أسبابها عادةً بتكون عاطفية، فعدم إشباعها عاطفيًا ممكن يبقى سبب فى إنهاء العلاقة، وده بيكون لأسباب بيولوجية. بالإضافة لإن الست في أغلب الوقت بتدور فطريًا على الرجل اللى يقدر يوفر ليها ولأولادها الإحساس بالأمان.
لكن من ناحية تانية، ممكن تكون أسباب إنهاء العلاقة عند الرجل أو الست واحدة زي مثلًا عدم قبول أو التسامح مع العنف أو القسوة في التعامل، أو وجود مشاكل في التواصل واختلاف الطباع اللي بيؤدي لسلاسل طويلة من المشاكل اللي ملهاش حل، أو حتى بسبب مشاكل مادية واجتماعية مختلفة ممكن تؤثر على طبيعة العلاقة بين الطرفين.
لكن خلينا نقول كمان إن القدرة على إنهاء علاقة عاطفية، والدخول فى غيرها بيتأثر بعوامل بيئية وجينية مختلفة، يعني مثلًا بعض الناس ممكن ياخدوا وقت طويل جدًا عشان ياخدوا قرار الانفصال وينفذوه ويتجاوزوا المشاعر الناتجة عنه، وناس تانية بتاخد القرار بسرعة وبتتجاوز كمان بسرعة، في حين إن غيرهم ممكن يفضلوا في علاقة مرهقة بسبب الخوف من الألم اللي ممكن يحسوه بعد الانفصال.
صدق اللى قال إن الحب ممكن يوصل لمرحلة الإدمان!
الحب بيخليك لما ترتبط بحد مدة وتحاول بعدها تبعد عنه تبقى حاسس بأعراض الإنسحاب وكأنك مدمن فترجع له تانى، ومهما كنت مقتنع بقرارك هتلاقي نفسك فجأة بعد يوم أو يومين حاسس إن حاجة كبيرة ناقصاك وتفتكر كل لحظاتكم الحلوة والخروجات والهدايا حتى لو كانت اللحظات دي قليلة أصلًا، وتبقى مش فاهم إنت ليه حاسس كدة مع إن ده قرارك.
العلماء بقى عشان يحاولوا يفسروا سلوكنا الغريب ده عملوا فحوصات بالرنين المغناطيسى على مخ أشخاص بيمروا بأزمة عاطفية ومحالة انفصال وقارنوا النتيجة مع صور رنين مغناطيسي على مخ أشخاص تانيية مدمنيين للكوكايين وبيحاولوا يتعافوا، لقوا إن المنطقة اللى زاد النشاط العصبى فيها نتيجة الإبتعاد عن الكوكايين هى نفس المنطقة اللى بيزيد فيها النشاط العصبى وقت الحزن لما تمر بأزمة عاطفية.
واتضح لهم إن ده هو السبب الرئيسى فإن بعض الأشخاص بيحسوا إنهم وصلوا لمرحلة إدمان الحبيب ده وإن الإنفصال عنه هو محاولة للبعد عن المخدر اللى بيظبط حالته المزاجية ويخليه سعيد، وده لأن الشعور بالحب والانجذاب بيخلي المخ يفرز مجموعة من الهرمونات اللي بتزود من شعورنا بالسعادة والراحة، وده بالظبط اللي بتعمله المخدرات في المخ.
اعرف أكتر|الحب والرومانسية .. خدعة للتناسل ولّا احتياج عاطفي؟
وبالمناسبة، المدمن كمان لما بيحاول يبعد عن المخدرات بيحس كأنه فى أزمة عاطفية كبيرة وبيحس أعراض انسحاب قوية ويحس بالحزن، لكن الموضوع مش كارثي وممكن بشوية إرادة المدمن يتعافى نهائيًا سواء كان مدمن لمخدر أو حتى مدمن لشخص، كل ما عليك تاخد بالك من كل خطوة ممكن ترجعلك لورا، وكل ما دماغك توزك عشان تمسك الموبايل وتكلمه افتكر كويس إن قرارك بالانفصال مكنش لعب عيال وكلها شوية وهتلاقي نفسك تجاوزته خالص كأنه مكنش موجد أصلًا.
المصادر: medicaldaily glamour sciencedaily lifehacker
