أشهر 11 خرافة عن المخ لازم نصححها!
كتبت: مها طه
معظمنا أول ما يسمع كلمة خرافة بييجي فى دماغه حاجة ليها علاقة بالدجل والشعوذة وأساطير التراث بتاعت جداتنا على شاكلة أمنا الغولة والعنقاء لكن الحقيقة إن الخرافات أوقات كتير من كتر ما بنقولها ونرددها، بتتحول بشكل ما لحقيقة!
المشكلة الأكبر هى إننا أحيانًا بنضيف على الخرافة دى ”تحبيشة“ علمية، ونقول إن العلم أثبت كذا، صحيح العلم مليان غرائب كتير لكن أول ما تلاقي حد بيقولك ده كلام أثبته العلم، قوله إيه المصدر اللي قال الكلام ده؟ وهل هو مصدر موثوق منه ولا لأ؟ في المقال ده هنعرف 11 خرافة متداولة عن المخ مالهاش أى علاقة لا بالحقيقة ولا العلم.
1. عارف إيه الفرق بينك و بين آينشتاين؟! إنك بتستخدم 10% بس من مخك!
لو الكلام ده صحيح، يبقى إحنا ممكن عادى جدًا نتخلص من معظم مخنا وبدل ما هو تاعبنا وبنفكر ليل ونهار ونخلي بس الجزء المهم اللي بيقوم بالوظايف الحيوية المهمة. بعض العلماء بيعتقدوا إن الخرافة دي مبنية على الحقيقة العلمية اللى بتقول إنك مستحيل تستخدم 100% من مخك فى نفس الوقت. ”باري جوردون“، طبيب الأعصاب بكلية جونز هوبكنز للطب فى بالتيمور، قال في تصريح له لـScientific American، إننا بنستخدم كل أجزاء المخ تقريبًا، واللي معظمها بيكون نشط طول الوقت حتى وإنت نايم. اعرف أكتر عن الخرافة دي من هنا.
2. بعد العشرين، مهارات عقلك هتقل!
أكيد طبعًا فى بعض المهارات بتقل أو بتتراجع عندنا كل ما نكبر فى السن زي قدرتنا على التفكير السريع والتذكر السريع، والمهارات دي غالبًا بتبلغ ذروتها فى عمر 18 سنة وبعدها بتبدأ تتراجع لكن فى أبحاث جديدة اتعملت فى قسم علم النفس بجامعة هارفرد ومركز بحوث الإنسان الوراثية فى مستشفى ماساتشوستس العام فى بوسطن قالت إنه بالإضافة لإننا مع التقدم فى العمر بنبقى أكثر حكمة لكن فى الحقيقة إحنا كمان بنبقى أذكى على الأقل فى بعض النواحي، فمثلًا القدرة على القيام بالعمليات الحسابية الأساسية عندنا بتزيد وكمان استخدام المفردات اللغوية بيبقى أكتر. من المرجح إن التحسن ده يستمر لحد عمر الـ50، أما فيما يتعلق ببراعتنا فى فهم مشاعر الآخرين أو تذكُر الأحداث، فدي مش بتقل قبل عمر 30 سنة.
3. إنت بتستخدم النص اليمين ولا الشمال من مخك؟
أكيد سمعت فى مرحلة ما من حياتك إنك لو شخصية ميّالة للفنون، يبقى نص مخك اليمين أنشط، أما بقى لو بتحب العلوم زي حالاتي كده، يبقى نص مخك الشمال هو الأنشط! الحقيقة بقى إن نصفي المخ بيشتغلوا معظم الوقت ومع بعض عشان يؤدوا مهام معينة، وإن مفيش نص معين مسيطر عليك وبيتحكم فيك، وإنه لحد دلوقتى على الأقل مفيش ما يُثبت إن نوع الشخصية معتمد على سيطرة نص معين من المخ على الشخص.
4. الكحوليات بتقتل خلايا المخ
ترويج الفكرة دي عن الكحوليات بيتم ربطها بحقيقة علمية كلنا تقريبًا عارفينها، وهى إن الكحول النقي له أثر كبير فى قتل الخلايا وعشان كده بيتم استخدامه كمُطهر لكن الحقيقة إن المشروبات الكحولية مش بتبقى بالتركيز العالي أوي ده. الكحوليات بتأثر على عدد قليل أوي من الخلايا العصبية فى المخ، فى دراسة اتعملت فى القرن العشرين على أدمغة مجموعة أشخاص بيتعاطوا الكحوليات ومجموعة تانية لأشخاص مش بيشربوا مشروبات كحولية وضحت إن حتى تأثير تناول الكحوليات على فترات على العدد الكلي لخلايا المخ بيكون قليل أو مش موجود أصلًا.
على الجانب الآخر الدراسة أشارت إلى إن تناول الكحوليات باستمرار ممكن يؤدى لخلل فى الروابط بين الخلايا العصبية والتأثير على طريقة معالجة المخ للمعلومات، وفى دراسة حديثة فى دورية علم الأعصاب، قالت إن الاشخاص اللي بيشربوا كحوليات كل يوم بتقل عندهم القدرة على تطوير خلية عصبية جديدة بشكل ملحوظ فى جزء المخ المسئول عن التعلم والذاكرة، وطبعًا لازم نعرف، وبعيدًا عن الشق الديني، إن تناول الكحوليات حتى لو مش مؤذي لخلايا المخ فهو مؤذى جدًا للكبد، وأحد أهم أسباب الفشل الكبدى هو تناول الكحوليات.
5. إنت مولود بكل خلايا المخ اللى ممكن تكون عندك!
هي الجملة نفسها تحسوها غريبة كده! فكرة إنك مولود بكل مخزون الخلايا دي اللي مش هتتجدد خالص فكرة سائدة عند ناس كتير، والحقيقة إن فى فريق من العلماء السويديين سنة 1998، أثبتوا إن الحُصين أي المنطقة المسئولة فى المخ عن تكوين الذكريات الجديدة، بيفضل يكوّن خلايا عصبية جديدة بشكل جيد لحد سن الشيخوخة. وكمان في دراسة تانية اتعملت فى 2014، قام بيها مجموعة من العماء السويديين برضه _ واضح إن في اهتمام من الجانب السويدي بالموضوع_ اكتشفوا إن المخ بينتج خلايا عصبية جديدة كمان فى منطقة ”المخطط“، ودى المنطقة المسئولة عن التحكم فى الحركة واتخاذ القرارات.
6. المخدرات بتعمل فى مخك حُفر!
هنا يحضرني أخونا ”اللمبي“ لما قال ”حاسس إن في خُرم فى نُفوخي“! الحقيقة إنه بالرغم من الآثار السيئة لتعاطي المخدرات واللي بتؤثر على وظايف المخ على حسب نوع المُخدر وكميته إلا إن فكرة الـ”حُفر“ دي مش حقيقية لإن المخدرات بتلعب فى كيمياء المخ لكنها مش هتغير فى تركيب المخ نفسه، مثلًا الهيروين بيغير من مستويات الناقلات العصبية أو المواد الكيميائية المسئولة عن نقل الإشارة العصبية بين الخلايا، الهيروين بيتحول فى المخ للمورفين اللي بيقفل مُستقبلات معينة ويخليها غير قادرة على الاستجابة للمؤثر العصبي الخاص بالألم مثلًا.
7. لحظة ”وجدتُها“ بتبقى لحظة نادرة و عشوائية
كلنا بنمر باللحظات الألمعية اللي بتخطر لك فيها فكرة حلوة أو توصل لحل مشكلة ما كان مستعصي عليك حلها، فتلاقى نفسك بتقول بانشكاحة عظيمة ”أيوه بقى“ اللي كانت زمان ”وجدتها“. فى دراسة قام بيها مجموعة من علماء الأعصاب وتم نشرها فى موقع psychological science ، أثبت العلماء إن فى مكان واحد على الأرجح فى المخ هو المسئول عن اللحظات دي، وبعد دراستهم للإبداع والبصيرة لمدة عشر سنين، تأكدوا من إن اللحظات دي واللي بتتسمى ”أوريكا“ بتحصل طول الوقت تقريبًا زي مثلًا الوقت اللى بتفهم فيه نكتة معينة و تضحك عليها، وده يثبت إن لحظة ”وجدتُها“ مرتبطة دايمًا باللحظات الإبداعية اللي بتوصل لك لفكرة جديدة أو مفهوم جديد.
8. كل ما كان مخك أكبر، كل ما كنت أذكى
الأسطورة بتقول إن الكائنات اللي مخها أكبر بتبقى أذكى، تخيل وزن مخ البقرة وقارن بينه ووزن مخ الشمبانزى، أكيد البقرة تكسب لكن من حيث الذكاء فأكيد كلنا عارفين إن الشمبانزى هيكون الأذكى، هتلاقى حد يقول لك لأ المقصود هنا بالحجم مش الحجم فى المطلق، لكن النسبة بين حجم المخ و حجم الجسم وبرضه الكلام ده هيكون غلط؛ مثلًا النسبة بين مخ الإنسان وجسمه بتبقى حوالى 1:50، فى حين إنها فى الحصان 1:600 وفى الفأر 1:40، يعنى وفقًا للحسبة دي يبقى ذكاء الإنسان تقريبًا زي ذكاء الفأر، وده طبعًا مش منطقي ولا حقيقي.
9. الرجل بيفكر بعقله، أما الست بتفكر بعواطفها
الحقيقة إن الاختلافات التشريحية بين مخ الراجل والست طفيفة جدًا، والحقيقة كمان إن مفيش اختلاف فى القدرات العقلية ما بينهم لكن العقل الجمعي هو اللي خلق الفكرة دي وخلق أدلة علمية عليها، مثلًا إن الستات بتنجح أكتر فى اختبارات الذكاء العاطفي في حين إن الاختبار كان على السيدات فقط، وفى حالة مقارنتهم بالرجالة، اكتشفوا إن الاتنين عندهم نفس الدرجة من الذكاء العاطفي وأحيانًا الرجالة بيتفوقوا كمان. نفس الشئ اتعمل لكن بالعكس فى دراسة سنة 1998 فى جامعة واترلو الكندية، قامت على فكرة إخضاع عينة من ستات ورجالة لامتحان صعب فى الرياضيات، وبالفعل درجات الستات كانت أسوء من الرجالة لكن لما اتقال للمشاركين قبل الامتحان التاني إن الامتحان السابق نتايجه كانت متساوية فى الجنسين، لقوا إن الاتنين تقريبا نتيجتهم طلعت متقاربة جدًا.
10. إنت شخصية سمعية ولا بصرية؟
أنا شخصيًا ولوقت طويل كنت بعتبر نفسى غريبة لأنى بحب أذاكر بالرسومات و الصور لأن أصحابى كانوا بيستوعبوا أكتر بالسمع، فكنت بصنف نفسى كشخصية بصرية لكن الحقيقة إنه لحد دلوقتى مفيش أي دليل علمي واحد على الكلام ده، هى مجرد ميول ناس بتفضل تسمع أكتر وناس بتفضل تشوف أكتر. علماء النفس لما قارنوا بين مجموعة من الطلبة تم تدريس نفس المنهج ليهم لكن كل مجموعة بالطريقة اللي بتفضلها، وجدوا إن النتايج تقريبًا كانت واحدة، وده معناه إن نوع الطريقة المُفضلة للشرح في حد ذاته، طريقة سمعية أو بصرية بقى، مالهاش تأثير على الاستيعاب العقلي من عدمه.
11. الإنسان عنده 5 حواس .. بس؟!
الحقيقة كلنا من وإحنا أطفال نعرف إن عندنا 5 حواس، الشم والتذوق والسمع و البصر واللمس لكن محدش قال لنا على الحواس التانية، والمقصود بكلمة حاسة الوسيلة اللي من خلالها بتتواصل مع العالم حواليك وبتنقل لك معلومات عنه، عندك مثلًا الإحساس بجسمك وده اللى بيقول لك وضع أعضاء جسمك إيه وبتعمل إيه ومدى الإحساس بالألم والحرارة والضغط، بالإضافة للإحساس بالاحتياجات الداخلية زي الجوع و العطش والحاجة لدخول الحمام، وفي حاسة التوازن، ودي موجودة فى الأذن الداخلية، وبتبقى بمثابة الـGPS بتاعك اللي بيحدد موقعك، إنت واقف ولا قاعد ولا ماشى ولا بتتشقلب حتى. اقرا أكتر عن التوازن الداخلي من هنا:
طبعًا فى الختام بلاش نصدق أى خرافة أو أسطورة بتتقال لمجرد إنها منتشرة والأسوأ من كده بلاش تتطوع وتنشرها وإنت ما مررتهاش على عقلك الأول، ارحموا أمخاخكم يا جماعة ده هي اللي ممشيانا، كفاية افتراء بقى. وبعدين يعني ابحث عن أساس المعلومة ومصدرها، جوجل كله بتاعكيا سيدي. ولو احترت تعالى اسألنا وهنوصل سوا للإجابة ولا إيه.
المصادر
