حيّ يرزق

الفوايد الطبية للعرقسوس: ”يا عرقسوس شفا وخمير“

كتبت: مها طـه

العرقسوس أحد أهم المشروبات الرمضانية، غالبا مش هتدخل بيت في رمضان غير وهتلاقيه حاضر وبقوة كمان. يمكن بالنسبة لعدد من المصريين مش هو المشروب المُفضل في رمضان خصوصًا لو قارنته بالتمرهندي والسوبيا مثلًا، واللي السكر بيكون فيهم أكتر بكتير منه، لكن ده لا يمنع إن قطاع عريض من المصريين بيحبوه وبيقدروه جدًا كمان.

عشان كده وبمناسبة رمضان قولنا ننتهز الفرصة، ونعرف أكتر عن اللي بيتنادى له بالـ”شفا وخمير”، ونفهم إيه فوايده وإيه أضراره وإيه أصله كمان.

العرقسوس أو نبات السوس بيُعتبر نبات شجري مُعمر، بينمو في مناطق كتيرة من العالم، زي مصر وسوريا وآسيا الصُغرى ووسط آسيا وأوروبا كمان.  اللي إحنا بنشربه هو المادة اللي إحنا بنستخرجها من جذور نبات السوس، واللي كانت زمان بيتم مضغها زي اللبان كده، لأنها مسكرة، كما إنه  كمان بيُستخدم في الطب.

 العرقسوس
جذور العرقسوس – صورة: IndiaMART

الفوايد الطبية للعرقسوس

بيُستخدموه في علاج مشاكل كتير في الجهاز الهضمي بما فيها قرحة المعدة والمغص والتهاب المعدة المزمن وحتى حرقان المعدة، المثير كمان إن في بعض الناس بيستخدموا العرقسوس في علاج التهاب الحلق، والتهاب الشُعب الهوائية والكحة، والالتهابات اللي بتسببها البكتريا والفيروسات.

بالإضافة لاستخدامه في علاج التهاب المفاصل واضطرابات الكبد والملاريا والسُل والتسمم الغذائي وكمان للتخلص من الإرهاق العام، العرقسوس كمان ممكن يُستخدم مع ”الجينسينج“ لتحسين وظايف الغدة الكظرية _الغدة اللي فوق الكلى واللي بتفرز هرمونات الأدرينالين والنورأدرينالين والكورتيزول_، واللي بتتأثر وظايفها لأسباب كتير أهمها إن الشخص ياخد أدوية هرمونية، زي الكورتيزون اللي بيخفف من الالتهابات في الجسم، لكنه في نفس الوقت بيأثر على كفاءة الغدة الكظرية.

الأغرب بقى إنه ممكن يُستخدم عشان يزود الخصوبة عند الستات المصابات باضطرابات هرمونية، زي حالات تكيُس المبايض، العرقسوس كمان ممكن يبقى علاج كويس للأمراض الجلدية زي الأكزيما، ده غير إن فيه بعض الناس اللي ممكن تستعمله كشامبو للشعر الدهني، عشان يقلل من الزيوت الطبيعية في النوع ده من الشعر.

صورة: بشرتك

بالإضافة لإن المواد الكيميائية الموجودة في العرقسوس بتقلل التورم والالتهاب بشكل عام، وبتقلل كمان من الإفرازات المخاطية والكحة، وبتحفز زيادة المواد الكيميائية الطبيعية اللي بيفرزها الجسم عشان يداوي الجروح والقُرح.

الآثار الجانبية

طالما العرقسوس بيُستخدم في علاج كل الأمراض دي، فأكيد له آثار جانبية، وبالرغم من إن استخامه آمن لمعظم الناس إلا إنه ومع حالات مُعينة ممكن يؤدي لمشاكل، كمان لو تم استخدامه بجرعات كبيرة ولمدة طويلة، زي مثلًا لو شربت كل يوم في رمضان بمعدل كوبايتين في اليوم. خلونا نعرف أكتر امتى ممكن يكون العرقسوس مضر.

من الحالات اللي معاها بيكون استخدام العرقسوس فيه مشاكل هي: حالات الحمل والرضاعة، فوفقًا لليونيسيف فشرب العرقسوس آمن لكن لو زادت جرعته شوية، فممكن يهدد بالولادة المبكرة.

كمان بيُعتبر خطر على مرضى الضغط المرتفع لأنه بيزود أصلًا من ضغط الدم، بسبب إنه بيزود من احتباس المياه في الجسم وبالتالي بيرفع ضغط الدم، وغالبًا زي أي حاجة تانية بتأثر في ضغط الدم وبترفعه، فهو بالتبعية بيأثر على نبض القلب، وعشان كده الدكاترة بينصحوا مريض القلب بعدم شربه.

حالات سرطان الثدي وسرطان الرحم والمبايض وبطانة الرحم المهاجرة والأورام الليفية الرحمية، كلها حالات بيُعتبر شرب العرقسوس فيها خطر، لأنه بيشتغل في الجسم وكأنه هرمون الإستروجين، والأمراض دي بتتأثر جدًا بزيادة الهرمونات الأنثوية.

صورة: الإنترنت

وبما إن العرقسوس بيشتغل في الجسم وكأنه هرمون الإستروجين فهو بالتأكيد بيأثر على الأداء الجنسي في الرجال، وكمان بيأثر على مستوى هرمون التستوستيرون، لأن كل ما عليت هرمونات الأنوثة في الدم، كل ما قل هرمون الذكورة، ففي الحالة دي ممكن يسبب انخفاض في الرغبة الجنسية والاستمتاع أثناء العملية الجنسية، بالإضافة لإنه بيزود المشاكل الخاصة بالانتصاب عند الرجال.

العرقسوس بيأثر على مستوى البوتاسيوم في الدم، وده اللي ممكن يسبب مشاكل في العضلات خصوصًا لو في مرض عصبي عضلي.

ففي النهاية، خلينا نقول إن العرقسوس زيه زي أي مادة أو عشب طبيعي، ماينفعش ناخده من نفسنا وبأي كمية، لأن كل حاجة حتى ولو كانت طبيعية ليها جرعة معينة لو زادت عنها ممكن تسبب مشاكل صحية خطيرة أو حتى مش خطيرة لكنها مؤذية، كل سنة وأنتوا طيبين ورمضان كريم وبلاش نتقل في الأكل ولا في المشروبات عمومًا حتى ولو كانت طبيعية.

اعرف أكتر| هذه الكمية من المواد الطبيعية كفيلة بقتلك!


المصادر:   umm.edu  herbwisdom  patient.info  webmd

الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق