بكاء الحيوانات: هل الحيوانات بتعيط زينا؟!
كتب: أحمد حسين
في واحدة من زياراتي المتكررة لحديقة الحيوان، واقفين قدام بيت الفيل الأسيوي، وكانت وقتها أنثى الفيل اللي موجودة اسمها “كريمة” والحارس بتاعها كالعادة بيكلمها عشان تنتبه للسادة الزوار وتبص ناحيتهم وتاخد الأكل من إيدين الأطفال وأهاليهم، لكن “كريمة” رفضت تلف، فقام الحارس شتمها، وفجأة بصت كريمة ناحيته نظرة حزينة جدًا، ونزلت دموعها!
بكاء الحيوانات مشاعر ولا صدفة؟
بعضنا ممكن يكون تعرض لتجربة زي دي قبل كده مع كلب أو قطة، أو حتى شاف ده في برنامج من برامج الحيوانات. وبنلاحظ دايمًا عياط الحيوانات لما بتتعرض لمآساة _زي إن واحد من أولادها يموت أو يتعرض لحادثة مثلًا_ وفي وقتها تبدأ عيونهم تتملي بالدموع، ويبدأ الحيوان في البكاء، والسؤال هنا: هل الحيوانات فعلًا بتعيط زينا؟
الإجابة على السؤال ده أيوه، الحيوانات فعلًا بتعيط وفي أوقات كتير، لكن العياط ده عادةً بيكون بسبب ترطيب العين زي البشر أو لتنظيف العين من أي حاجة ممكن تدخل فيها، لحد هنا ده كله عادي، لكن السؤال الحقيقي هنا هو: هل العياط ده له أي علاقة بالعواطف؟
من حوالي 4 سنين، حصل شيء غريب جدًا، وأخد تعليقات كتير وقتها عن فيل صغير رفضته أمه، وحاولت تقتله، فنزلت الدموع من عينيه في مشهد مؤثر جدًا، وقعد يبكي لمدة خمس ساعات متواصلة. فضل السؤال هل الفيل “Zhuang Zhuang” عيّط كرد فعل على رفض أمه له؟
قديمًا، اعتقد بعض العلماء أن الحيوانات بتبكي بالفعل بسبب حدث عاطفي بيمروا بيه، لدرجة إن عالم الأحياء الشهير ”تشارلز داروين“ ألف كتاب اسمه ”التعبير عن العاطفة: الإنسان والحيوانات“، وكمان ”جيفري ماسون“ و”سوزان مكارثي“ ألفوا كتاب اسمه ”عندما تبكي الأفيال: الحياة العاطفية للحيوانات“ وقدموا فيه أدلة كتير على بكاء حيوانات زي الفيلة والكلاب والقرود لأسباب عاطفية، زي شعور الحزن اللي بيحس بيه أنواع من القرود اسمها “الريسوس –Rhesus” لما بيفقدوا أحد أحبائهم مثلًا.
اعرف أكتر|هل الكلب بيشم ريحة الخوف فعلًا ؟!
لكن كثير من علماء الحيوان دلوقتي بيعتقدوا إن ربط البكاء بالعاطفة عند الحيوانات يعتبر أمر صعب إدراكه كرد فعل على الحوادث العاطفية، لكن ممكن ربطه بالضغط العصبي اللي بيحس بيه الحيوان أو عدم الرؤية بشكل جيد. لكن ده برضه مش معناه إن الحيوانات مش بتبكي لأسباب عاطفية في المطلق، وقالوا إن الحيوانات بتحس بالحزن زيها زي البشر بالظبط.
ولأنه من الصعب تسأل حيوان عن حالته المزاجية ويا ترى هو حاسس بإيه دلوقتي؟، بدأ مجموعة من علماء المخ والأعصاب في إجراء تجارب على الحيوانات لمعرفة هل بيتشابه مخ الحيوانات مع مخ البشر من ناحية بعض العواطف والانفعالات، ولحد دلوقتي، بتُظهر التجارب إن المخ بيصدر نفس الأوامر بنفس الموجات عند مواجهة انفعالات ومشاعر زي الخوف أو الغضب أو السعادة، سواء للإنسان أو للحيوان.
وفي سنة 2013، واحدة من الدراسات اللي أُجريت في اليابان اظهرت إن الشمبانزي لما بيتعرض لصور حزينة أو عاطفية بيبدأ مخه في إرسال نفس الاشارات العصبية اللي بيرسلها مخ الإنسان في حالة تعرضه لنفس الصور.
فحتى لو الحيوانات مش بتعرف تعبر عن المشاعر اللي بيحسوا بيها، سواء يقى عن طريق البكاء أو بطرق تانية حتى، فالحيوانات بتحس بالحزن والغضب والسعادة زيهم زي البشر بالظبط، لذلك خد بالك في المرة الجاية وانت بتتعامل مع حيوانك الأليف أو أي حيوان في العموم لأنه هيحس بمشاعر سيئة وممكن يعيط وتحس بالذنب.. خد بالك .
اعرف أكتر| ممارسة الجنس مع الحيوانات: هنحمي الحيوانات من البشر ولا البشر من الحيوانات؟!
المصادر: psychologytoday news.discovery
