صحتك في علبة الزبادي دي.. كالسيوم ومعادن و”بروبايوتكس”!

كتبت: مها طــه

في كتير من إعلانات الزبادي ومن باب الدعاية وشغل الماركتينج، هتلاقي الإعلان بيعدد في الفوائد الصحية العظيمة للزبادي، إنه مُهضِم وإنه ينفع في كل الأوقات مش بس في رمضان، وإنه غني بالعناصر الغذائية اللازمة، كالسيوم ومعادن والبروبايوتكس! طب عمرك سألت نفسك تطلع إيه البروبايوتكس دي؟!

البروبايوتكس.. كلمة السر البكتريا

عدد البكتريا الموجودة في جسم الإنسان يفوق عدد خلايا الجسم، قصاد كل خلية بشرية في 10 خلايا بكتيرية، ومعظم البكتيريا دي عايشة في أمعائك، وبعضها في الفم، وبالباقي متوزع على الجلد وباقي أعضاء الجسم. وأغلبيتها بكتيريا غير مؤذية إطلاقًا على عكس الشائع عندنا، بإن البكتيريا بتكون مضرة أو مؤذية.

وجود البكتريا الجيدة في الأمعاء بيرتبط بعدد من الفوائد الصحية للجسم، منها :

• فقدان الوزن
• وتحسين عملية الهضم
• وتقوية الجهاز المناعي
• صحة الجلد والبشرة
• تقليل فرص الإصابة بكتير من الأمراض، زي الربو ومرض التهاب الأمعاء والأمراض المزمنة زي السكر والضغط وأمراض القلب والرئة وغيرهم.

اعرف أكتر| الكمون والليمون: هل شرب كوباية على الريق كفاية عشان تخس؟

ومن هنا بقى نقدر نتكلم عن البروبايوتكس..

البروبايوتكس هي نوع معين من البكتيريا الصديقة للإنسان لو صح التعبير. بكتيريا غير مؤذية بتعيش في أمعاء الإنسان، ووجودها له فوايد صحية كتيرة، ولأن عدد كبير من البشر بيعانوا من نقص في عددها في الأمعاء، فبيضطروا يحصلوا عليها من مصدر خارجي كمكمل غذائي ضروري ومهم، وده بالظبط اللي بتلعب عليه شركات الدعاية للزبادي.

في الأغلب البروبايوتكس بتكون بكتيريا، لكنها أحيانًا بتكون خمائر (yeasts). البروبايوتكس عادةً بيكتبها الأطباء كنوع من المكملات الغذائية المفيدة اللي بتساهم في تحسين صحة الجسم بشكل عام والأمعاء بشكل خاص، ولزيادة الأعداد المفقودة من بكتيريا الأمعاء الجيدة.

عادةً ونتيجة لعوامل مختلفة زي العادات الغذائية الخاطئة أو استخدام مضادات حيوية لمدة طويلة، فالأمعاء بتخسر كتير من محتوى البكتيريا الجيدة، وبالتالي أخد جرعات من البروبايوتكس بتعمل حالة من الموازنة بين البكتيريا الجيدة والسيئة الموجودة في المعدة.

الأنواع المختلفة من البروبايوتكس

• Lactobacillus: وده النوع الأكثر شيوعًا. موجود في الزبادي وغيره من الأطعمة المخمرة. السلالات المختلفة من النوع ده بتساعد على تقليل الإسهال، وتعتبر حل مناسب جدًا للأشخاص اللي بيعانوا من حساسية اللاكتوز، ومايقدروش يهضموا السكر الموجود في اللبن، وبالتالي يمكنهم الاستعاضة عن احتياجاتهم من اللبن.
• Bifidobacterium: وده النوع اللي ممكن العثور عليه في بعض منتجات الألبان. بيساعد بشكل أساسي في تخفيف أعراض متلازمة القولون العصبي وبعض الحالات المعوية التانية.
• Saccharomyces boulardii: وده نوع من الخميرة اللي بتنتمي للبروبايوتكس، بتساعد في مكافحة الإسهال ، وعدد من مشاكل الجهاز الهضمي.

أهمية البكتيريا لصحة الأمعاء

الأمعاء بتحتوي على مئات الأنواع المختلفة من الكائنات الحية الدقيقة، وفي بعض التقديرات بيوصل عددهم في بعض التقديرات لحوالي 1000 نوع، أغلبها بكتريا لكن بعضها خمائر وفيروسات. أغلبية الكائنات الدقيقة دي بتعيش في القولون والأمعاء الغليطة (الجزء الأخير من القناة الهضمية).

البكتيريا الموجودة في الأمعاء بتلعب عدد من الأدوار المهمة للجسم، زي تصنيع الفيتامينات، بما فيها فيتامين ك (k) وبعض أنواع فيتامين ب (B). كمان، بتعمل على تحويل الألياف إلى سلاسل قصيرة من الدهون، اللي بتغذي جدار الأمعاء وبتساهم في العديد من وظائف الهضم والتمثيل الغذائي. الدهون دي بتحفز نظام المناعة في الجسم وتقوية جدار الأمعاء، وده بيعمل كنظام حماية للجسم، عن طريق تحفيز الاستجابة المناعية للأمعاء.

اعرف أكتر| الجهاز العصبي المعوي: مخ تاني بيتحكم فيك وفي الأولاني!

علاقة البروبايوتكس بالسمنة

بكتيريا الأمعاء عند الأشخاص اللي بيعانوا من السمنة، بتكون مختلفة عنها في الأشخاص اللي وزنهم قليل، ومن المثير للاهتمام إن الدراسات اللي تم إجرائها على الحيوانات، اشارت لإن عمليات نقل البراز من الحيوانات النحيفة للحيوانات السمينة، كانت نتيجتها إن الحيوانات السمينة، فقدت مقدار من وزنها. ولذلك بيعتقد عدد من العلماء إن بكتيريا الأمعاء تعتبر واحد من العوامل المهمة جدًا في تحديد وزن الجسم.

وعلى الرغم من إن فكرة استخدام بكتيريا الأمعاء في تقليل الوزن محتاجة لعدد كبير من الأبحاث والدراسات لحد ما يتم إثباتها بشكل قاطع، إلا إن بعض أنواع البروبايوتكس أثبتت فاعليتها في المساعدة على تقليل الوزن.

في دراسة تم إجرائها على 210 شخص بيعانوا من السمنة المركزية (تركز الدهون في منطقة البطن) أو ما يعرف بالكرش يعني، نتيجتها قالت إن تناول “Lactobacillus gasseri” وده أحد أنواع البروبايوتكس، أدى لفقدان 8.5% من دهون البطن في خلال 12 أسبوع، ولما توقف المشاركين في الدراسة عن تناولها، لمدة أربع أسابيع، استعادوا الدهون اللي فقدوها مرة تانية.

وعلى العكس، بتظهر بعض الدراسات إن بعض سلالات البروبايوتكس ممكن تؤدي لزيادة الوزن مش فقدانه، لكن برضه ده محتاج لمزيد من الأبحاث لإثباته أو نفيه.

فوائد أخرى للبروبايوتكس

• الالتهاب: البروبايوتكس بتقلل من احتمالية الإصابة بمتلازمة الاستجابة الالتهابية الجهازية، ودي حالة مناعية بتؤثر على الجسم، وبتسبب التهاب في كتير من أعضاء الجسم، وبتؤدس الإصابة بيها لكتير من الأمراض.
• الاكتئاب والقلق: اظهرت عدد من الدراسات إن سلالات البروبايوتكس “Lactobacillus helveticus ” و” Bifidobacterium longum” بتقلل من أعراض الاكتئاب والقلق المرضي عن الأشخاص اللي بيعانوا من مرض الاكتئاب.
• كوليسترول الدم: عدد من الدراسات قالت إن البروبايوتكس بتساهم في خفض مستويات الكوليسترول الكلي و الكوليسترول الضار (LDL) في الدم.
• الضغط: اشارت مجموعة من الدراسات لإن تناول البروبايوتكس ممكن يساهم في خفض ضغط الدم ولو بنسبة ضئيلة.
• المناعة: عدد من سلالات البروبايوتكس ثبت بالأبحاث قدرتها على تعزيز وظايف الجهاز المناعي في محاربة العدوى، وبالتالي تقليل خطر الإصابة بيها من الأساس، بما فيها نزلات البرد.
• صحة الجلد: بعض الادلة بتشير لإن البروبايوتكس ممكن تكون مفيدة في تحسين حالة الجلد، وتقليل حب الشباب والإكزيما والوردية (rosacea)، وغيرها من الأمراض الجلدية.

كل اللي فات ده، لا يمثل إلا عدد صغير من الفوائد المتشعبة للبروبايوتكس، واللي مازال العلم بيحاول يكشف عنها، ويثبت فوايدها الصحية.

الأعراض الجانبية لتناول البروبايوتكس

عادةً البروبايوتكس كمكملات غذائية تعتبر آمنة، وملهاش أعراض جانبية قوية، اللهم إلا بعض الآثار الجانبية المتعلقة بالهضم، زي الغازات وعدم راحة في البطن وده بيكون في الأيام الأولى بس، كنتيجة لتعديل بيئة الأمعاء، وموازنة البكتيريا الجيدة للسيئة. لكن بعدها بيبدأ الشعور بالتحسن على مستوى الهضم.

أما في حالة الأشخاص اللي بيعانوا من ضعف في المناعة زي المصابين بمرض الإيدز أو غيره من أمراض المناعة، ممكن تناول البروبايوتكس يؤدي للإصابة بعدوى خطيرة، ولذلك يجب استشارة الطبيب قبل أخذ مكمل غذائي من البروبايوتكس.

وفي النهاية، النظام الغذائي الصحي والالتزام قدر الإمكان بتناول الفواكه والخضراوات والأطعمة الصحية، مع ممارسة تمارين رياضية، تعتبر من أهم العوامل للحفاظ على جودة بكتيريا الأمعاء والبروبايوتكس الجيدة. وفي حالة إنك حسيت باحتياج لأخذ مكمل غذائي منها، استشير طبيبك.

المصادر:  webmd  nhs  nccih  sciencedirect  science  ncbi  tandfonline