هى الحيوانات بتتأثر بالـ«placebo effect» زينا؟!
كتبت: شيرين الدرستاوي
فى المقال اللي فات اتكلمنا عن إذا كانت الحيوانات بتنتحر ولا لأ؟ و توصلنا إلى إجابة مرضية نسبيا ممكن تتغير طبعا لإن مفيش ثوابت في العلم. المرة دي بقى هنتكلم عن حاجة مختلفة وهي هل الحيوانات بتتأثر بالـ«placebo effect» زينا ولا لأ؟! ففي الأول خلونا نعرف يعنى إيه placebo أصلا.
لينك المقال السابق: هي الحيوانات بتنتحر زينا؟!
يعني إيه Placebo؟
كتعريف بسيط هو الـPlacebo هو الإيحاء. يعنى بتضحك على المريض وبتقول له خد الدوا ده بانتظام وهتم متابعتك و نشوف تأثير الدوا عليك، لكن الحقيقة إن الدكتور بيدى مريض دوا فاضى، يعنى دوا بدون المادة الفعالة وبيوهم المريض بتاعه إنه بيتعالج و هو أصلا مش بياخد دوا.
في كثير من الأحيان بتنجح التجربة دى وبيشفى المريض، وهنا العامل النفسى بيلعب دور مهم لإن المريض فى الوقت ده بيؤمن بقدرة الدكتور والدوا وربنا طبعا وبيتبع التعليمات اللازم اتخاذها وهو بياخد الدوا واللي عادةً بيكون ليها علاقة بالأكل والمجهود والأدوية التانية اللى بتتمنع أو بيتاخد لها بدائل. ده بشكل بسيط معنى كلمة العلاج بالوهم أو الـplacebo effect. وكان الاعتقاد السائد إن الحيوانات مش بتتأثر بحاجة زي دي لكن مؤخرا العلماء أثبتوا عكس ذلك وإليكم الأدلة 😀
العلاج بالوهم عند الحيوانات
1 . دكتور «Karen Muñana»
أخصائية أعصاب ف جامعة نورث كارولينا فى الولايات المتحدة كلية الطب البيطرى، بتدرس حالة صرع كلب عندها وبتقول إنها جربت عليه موضوع الإيحاء وحقق نتائج متقدمة فى إن قوة ومعدل الصرع أصبحوا أقل. بتشرح دكتور كارين وبتقول إن فى عوامل كتير بتأثر فى موضوع الإيحاء منها:
-إن المرض فى حد ذاته بياخد مراحل مختلفة ممكن يبدأ بشكل عنيف وتدريجيا يقل.
-إن صاحب الكلب لما يعرف إن الكلب بتاعه بيستخدموه في تجربة دوائية ده هيخليه يهتم بالكلب أكتر وبالتعليمات المصاحبة لدواء.
وبتضيف إن ده نوع من أنواع الضحك على صاحب الكلب المريض، هو بيكون ف تجربة دوائية على مجموعة من الحيوانات مش بيتقدملها أى دوا، اللي هو يعني زي الكلب بتاعك على فكرة، بس إحنا بنضحك عليكوا و بنديكو الدوا فاضى لإن صاحب الكلب لما يعرف إن الكلب بتاعه مش هياخد أدوية ده هيخليه مش عايز يسجل فى التجربة الدوائية دي لإن طبعا بيبقى عايز الكلب بتاعه يخف بأسرع شكل.
2 . دكتور «Ellen Kienzle»
باحثة بيطرية فى علوم التغذية فى الجامعة الألمانية. كان فى نوع من المكملات الغذائية بيحتوى على الـ«سيلنيوم فيتامين E»، المهم هي كانت عايزة تجرب تأثير العلاج بالإيحاء على حصان باستخدام الدوا ده بس زي ما قلنا هيبقى الدوا فاضى لكن صاحب الحالة اتقال له إن الحصان بياخد دوا عادي.
وفعلا الحصان ماكنش بيشكى أصلا من مشاكل في العضلات علشان ياخد حاجة زي دي، لكن بمرور وقت التجربة صاحب الحصان اشتكى إن الحصان بقى عنيف وصعب السيطرة عليه، رغم إنه، في الأصل، الحصان ماكنش بياخد حاجة. لما الحصان خرج من التجربة رجع لحالته الطبيعية عادي.
3 . دكتور «Edzard Ernst»
أستاذ فخري فى الطب التكميلى، بيقول إن فيه بحث عمله عالم نفس روسي بيثبت فيه إن الحيوان بتتأثر بالإيحاء ودراسة تانية بتقول إن مجموع من الكلاب دربوها على إن الأكل يينزلها اول ما تسمع صوت الاجراس و بتعود بقت الكلاب تسمع صوت الاجراس ينزل لعبها مع ان سماع صوت الاجراس ميوحيش بالاكل فى حاجة لكن ده ايحاء
وفى دراسة أخرى اتعملت ف التمانينات على مجموعه من الفئران اللى مريضة جينيا بمرض الذئبة الحمامية اللى بتسبب في مهاجمة الجسم لنفسه وكانوا بيدوهم أدوية فى محلول سكرى و بمرور الوقت بدأوا يدوهم المحلول المسكر بس ووجدوا نفس الاستجابة و كإن الدوا بيتاخد.
وفى النهاية برضه قال العلماء إن مشكلة الحيوانات قلة الوعى عندها فهي مش زى البشر في ده وعشان كده بيأثر على تعبيرهم عن ظاهرة الإيحاء بعكس البشر اللى بتبقى أوضح عتدهم طبعا.
لمزيد من المعلومات عن “العلاج بالوهم” من هنا.
المصدر: bbc.com
