7 خطوات عشان تحافظ على نشاطك في رمضان

Mahmoud Ali6 مايو، 2019

كتبت: مها طه

رمضان جانا وكل سنة وإنتوا طيبين، ومع روايح رمضان اللي بتهل علينا بنلاقي نفسنا كل سنة وبالذات في السنين الأخيرة اللي رمضان بقى يجي فيها في الصيف، بنقول دايمًا لنفسنا ربنا يقوينا، الواحد بيبقى تعبان ومرهق وحاسس بكل الأعراض المُصاحبة للصيام بدايةً من الصداع ولحد الدوخة والزغللة، كل ده بيحصل لأننا وللأسف بيبقى عندنا أحيانًا شوية عادات غلط بنعملها، أو لأننا أصلًا مش عارفين نعمل إيه عشان نحافظ على نشاطنا في رمضان، وعليه لو عاوز تحافظ على نشاطك في رمضان ظبط 7 حاجات:

المياه: اشرب مياه طول فترة الفطار، حاول تشرب مش أقل من 3 لتر مياه في اليوم، والتزم على الأقل بكوبايتين مياه على السحور، وبكدة جسمك غالبًا مش هيعاني من الجفاف وهتقدر تحافظ على نشاطك طول مدة الصيام.
السكر في الدم: نسبة السكر في الدم كنتيجة للصيام بتبدأ تقل طبعًا، وده اللي غالبًا هيخليك تحس بتعب وإرهاق. على السحور لازم تاكل وجبة متوسطة فيها كربوهيدرات مُعقدة (زي العيش البلدي والقمح الكامل)، لإنها بتتهضم ببطء في المعدة والأمعاء، وبالتالي هتفضل محافظ على معدل ثابت تقريبًا لسكر الدم على طول ساعات الصيام، طبعًا ماتنساش تضيف البروتين وكمان الفواكه أو الخضروات لإنها هتساعد في ده.
النوم: في رمضان بتختل شوية ساعتك البيولوجية، وبتتأثر عدد ساعات نومك بالصيام، لكن حاول تخلي على الأقل نومك على مدار اليوم مايقلش عن 6 ساعات عشان تفضل محافظ على نشاطك وماتبقاش تعبان.
المجهود البدني: أي مجهود بدني بتعمله حاول في رمضان تخليه بشكل خفيف، بحيث إنك ماتفقدش جزء كبير من طاقتك وتحرق الجلوكوز اللي في دمك بدري، وتكمل باقي اليوم تعبان. لو حبيت تمارس رياضة قبل الفطار، يبقى مش أكتر من نص ساعة من المشي العادي قبل الفطار بساعة أو ساعتين.
درجة الحرارة: حاول وإنت صايم على قد ما تقدر ماتتعرضش لدرجة حرارة عالية، بلاش تمشي في الشارع في عز الظهر ودرجة الحرارة 40، لإن ده هيخلي جسمك يفقد كتير من السوايل واللي هيبقى من الصعب تعويضها وبالتالي ممكن تتعب.
النيكوتين: رمضان فرصة كويسة تحاول تقلل فيها من السجاير وغيرها من مصادر النيكوتين، واللي بتخليك طول اليوم عصبي وتعبان لأن جسمك متعود على جرعات عالية منه.
الكافيين: حاول تقلل من شرب القهوة والشاي والمياه الغازية، لأن الكافيين بيُعتبر مُدر للبول وبالتالي جسمك هيخسر كميات كبيرة من المياه هو محتاجها، وده طبعًا هيحسسك كمان بالعطش والإرهاق.