أفضل 10 أفلام خيال علمي: كثير من المتعة قليل من الهري
كتب: أحمد حسين
الأفلام، بشكل عام مش برامج علمية، خصوصًا الروائية منها مش التسجيلية، علشان بيكون فيها قدر من خيال المؤلف والمخرج والمشاركين في العملية الإبداعية، لكن ده لا يمنع إن في بعضها بيستخدم النظريات العلمية بشكل صحيح ويوظفها داخل السيناريو، وبعضها بيجمح بخياله تمامًا للدرجة اللي تخلي الفيلم بايظ لو حكمنا عليه بالمعايير العلمية، والدرامية كمان ساعات والله.
اعرف أكتر| فيلم ولا علم: حقائق علمية دمرتها السينما
وبما إني بحب السينما، قولت نتكلم مع بعض عن أفضل 10 أفلام خيال علمي قدرت إنها تستخدم العلوم بشكل جيد، وتوظف النظريات بصورة صحيحة، من غير خلل في بناء القصة أو الحبكة وهي الأهم في الفيلم طبعًا. الأفلام دي غالبًا كلها ماخرجتش عن إطار التفكير في المستقبل المظلم (الديستوبيا)، وسيطرة الآلات على البشر، ومحاولة السفر للفضاء، والتواصل مع الفضائيين، ما عدا فيلم واحد بس هو اللي قرر إنه يفكر في الذاكرة وتأثيرها علينا.
عمومًا، أغلب الأفلام اللي شوفتها من اللي موجودين في الليستة دول كانوا ممتعين، أفلام خيال علمي معمولة بشكل جيد جدًا، وده لاقى طبعًا استحسان النقاد والجمهور، علشان كده قررت إننا نحكم عليهم من خلال مواقع “Rotten Tomatoes” و”IMDB”، علشان أبقى أخدت رأي النقاد والجمهور وماسيبناش حاجة للصُدفة.
فيلم A Space Odyssey إنتاج 1969
الفيلم سيناريو وإخراج ستانلي كوبريك، من بطولة جاري لوكوود وويليام سيلفستر. بيحكي الفيلم قصة نهاية الإنسانية كما عرفناها، وسفر البشر إلى الفضاء، في سفينة فضائية عليها ذكاء اصطناعي غريب ومريب جدًا اسمه “Hal 9000”. طبعًا الفيلم واخد تقييم عالي جدًا من النقاد على روتين توميتوز وصل 93%، وعلى IMDB التقييم وصل لـ 8.3، وتقريبًا ده من أكتر الأفلام اللي ممكن تلاقيها في وشك كل ما تدور على أفضل الأفلام في التاريخ أو الأفلام اللي محبي السينما لازم يبصوا عليها بصة.
فيلم Alien إنتاج 1979
الفيلم من إخراج ريدلي سكوت، ومن بطولة سيجورني وييفر وجون هيرت. بيحكي الفيلم قصة بعثة من رواد الفضاء بيحاولوا يستكشفوا مكان على قمر ما جالهم منه إشارات غريبة، وعلى السفينة اللي بتوصلهم للقمر ده، بيكتشفوا كائن فضائي غريب جدًا ومرعب جدًا جدًا، والمشكلة الأكبر إنه لسه بقى بيتطّور وبيكبر أكتر وأكتر. الفيلم مثير جدًا ومرعب يعني للي بيحب النوع ده من الأفلام. والنقاد والجمهور واضح متفقين عليه جدًا، حيث إنه حصل على تقييم 97% على روتين توميتوز، و8.5 على IMDB من جمهور وصل عدده إلى حوالي 680 ألف شخص.
فيلم Blade Runner إنتاج 1982
الفيلم التاني في اللستة من إخراج ريدلي سكوت، عن رواية لفيليب ديك، من بطولة هاريسون فورد وراتجر هاور وشين يونج. بيحكي الفيلم عن مجموعة من نسخ الذكاء الاصطناعي الشبيه بالإنسان سرقت سفينة فضائية وجات على الأرض علشان تدور على صانعها، وفي بقى شخص بيحاول يلاقي النُسخ دي ويقضي عليها، بس الفكرة بقى في إيه؟ إنه النسخ دي شبه البشر بالظبط وصعب تفرق بينهم. الفيلم فيه فلسفة ليه علاقة بمين فينا البشري ومين الإنسان الآلي وحاجة آخر لغبطة، طبعًا ده خلاه من أكتر الأفلام اللي أخدت إشادات نقدية وجماهيرية، فعلى موقع روتين توميتوز واخد تقييم 90%، وعلى IMDB واخد تقييم 8.5 من حوالي 600 ألف شخص.
فيلم Eternal Sunshine of a Spotless Mind إنتاج 2004
الفيلم الوحيد المعني بالذاكرة بعيدًا عن الذكاء الاصطناعي والمستقبل المظلم والفضاء، من إخراج مايكل جوندري وسيناريو البرنس تشارلي كوفمان، من بطولة جيم كاري وكيت وينسلت. الفيلم بيحكي عن حبيبين بيقرروا يمحوا كل ذكرياتهم مع بعض عن طريق عيادة لمحو الذاكرة، القصة تبدو بسيطة لكنها مش كده خالص، خصوصًا إن فكرة محو الذاكرة دي اتكلم عنها علماء في جامعة (MIT) إحدى أهم الجامعات الأمريكية. الفيلم لحد دلوقتي مشاهد منه وصور بتتشيّر على فيس بوك، وواخد تقييم 93% على روتين توميتوز، وعلى IMDB واخد تقييم 8.3 من ما يقرب من 800 ألف شخص.
اعرف أكتر| زراعة الذكريات الزائفة: الإشراق الأبدي لعقل لا تشوبه شائبة
فيلم Wall-E إنتاج 2008
فيلم الأنيميشن الوحيد في اللستة معانا، من إخراج أندرو ستانتون، بطولة أصوات بين بيرت وإيليسا نايت. الفيلم بيحكي عن الروبوت جامع المخلّفات القديمة (Wall E)، بدأ رحلة ما لإنقاذ مستقبل البشرية المُدمّر. الفيلم أحد أعلى الأفلام فيما يخص التقييم على الموقعين، يعني على روتين توميتوز واخد تقييم 96%، وعلى IMDB واخد 8.4 من حوالي 870 ألف شخص.
اعرف أكتر| عن أنسنة الروبوتات: لا يا عم يفتح الله!
فيلم Moon إنتاج 2009
الفيلم من إخراج دونكان جونز، وبطولة سام روكويل وكيفين سبيسي، وبيحكي عن “سام” رائد الفضاء اللي بقاله 3 سنين على القمر بيحاول يحل مشكلة الطاقة على الأرض، الفكرة بقى المميزة في الفيلم إنه يعتبر من الأفلام ذات الميزانية المنخفضة، يعني هو اتصرف عليه 5 مليون دولار، وقدر في أول أسبوع إنه يرد المبلغ لنفسه، واللي لفت نظر النقاد والجمهور كمان، إنه كان أداء عبقري من سام روكويل، اللي ماكانش اسم كبير وقتها ولا حد عارف إنه موهوب بالشكل ده. حصل على تقييم 90% على روتين توميتوز، وعلى IMDB حصل على 7.9 من حوالي 300 ألف شخص.
فيلم Her إنتاج 2013
الفيلم سيناريو وإخراج سبايك جونز (صاحب Being John Malkovich)، من بطولة خواكين فينكس وإيمي آدمز وأداء صوتي لسكارليت جوهانسون. بيحكي عن راجل وحيد بيطوّر علاقة مع جهاز بيديره الذكاء الاصطناعي، وعلى الجانب الآخر بيصارع ذكريات خاصة بزواجه. الفيلم نجح جدًا في خلط فكرة المستقبل ومدى علاقتنا بالأجهزة وسيطرة الذكاء الاصطناعي علينا، في قالب رومانسي ودرامي جميل، وحصل على تقييم 94% على روتين توميتوز، وعلى IMDB حصل على 8.0 من حوالي 444 ألف شخص.
فيلم Interstellar إنتاج 2014
الفيلم اللي اتقال ساعتها لازم تاخد ماجيستير في فيزياء الفضاء علشان تقدر تفهمه، رغم إنه المفروض فيلم روائي تستمتع بيه عادي يعني. من إخراج كريستوفر نولان (صاحب ثلاثية فارس الظلام) والسيناريو له ولأخوه جوناثان نولان، من بطولة ماثيو ماكونهي وآن هيثواي وجيسيكا شاستين، بيحكي عن مجموعة من روّاد الفضاء بيسافروا في رحلة خطرة جدًا علشان يقدروا ينقذوا مستقبل البشرية على الأرض. رغم كل ده، الفيلم خلق حالة من الانقسام شديدة ما بين رأي النقاد والجمهور، يعني على روتين توميتوز حصل على 71% فقط، وعلى الجانب الآخر على IMDB الجمهور أداله تقييم 8.6 من حوالي مليون وربع شخص، فيعني من الأفلام اللي يُفضل تتفرج عليها قبل ما تحكم.. يعني، زيّه زي كل الأفلام عادي.
فيلم The Martian إنتاج 2015
الفيلم من إخراج ريدلي سكوت، تالت أفلامه معانا في الليستة، عن رواية لـ أندي ويير، بطولة مات ديمون وجيسيكا شاستين وكريستين ويج. بيحكي عن رائد فضاء بيلاقي نفسه محبوس على المريخ، فريقه بيظن إنه توفى، لكنه بيعتمد على علمه علشان يقدر يعيش على المريخ. طبعًا وقتها أخد إشادة كبيرة من النقاد، يعني على موقع روتين توميتوز حصل على 91%، والجمهور كمان عجبه إلى حد كبير، وحصل على تقييم 8.0 على موقع IMDB من حوالي 640 ألف شخص.
فيلم Arrival إنتاج 2016
الفيلم الأخير معانا في الليستة من إخراج ديني فيلانوف، عن قصة من كتابة تيد شيانج، من بطولة إيمي آدمز وجيرمي رينرز وفورست ويتيكر. بيحكي عن عالمة لغويات انتدبها الجيش علشان تتواصل مع شيء يشبه الكائن الفضائي نزل للأرض عن طريق 12 سفينة فضاء حول العالم، فيلم مشوق ومختلف ويخليك تخرج بتفكر في اللي شفته مش بتتلقاه بس. ديني فيلانوف مخرج جيد، وأعماله غالبًا ما بتحصل على رضى نقدي وجماهيري، فعلى موقع روتين توميتوز 94%، وعلى IMDB حصل على 7.9 من حوالي 470 ألف شخص.
أفلام نشير لها إشارة مشرّفة
- The Andromeda Strain 1971
- Contact 1997
- Ex-Machina 2014
لو حابب تقرا عن خمسة من قائمة أفضل عشرة أفلام عن الخيال العلمي اللي تم إنتاجها وإخراجها بدون مساعدة تقنيات التصوير الجديدة والـCGI.. اقرا مقالنا| أفضل خمسة أفلام عن الخيال العلمي
المصادر: IMDB rottentomatoes
