.
ليه وإزاي؟

العقل والقلب: بحبك من كل مخي!

كتبت: يارا كمال

العقل يعني المخ والعواطف يعني القلب. ده التشبيه اللي كلنا بنستخدمه من زمان، لدرجة إن فعلاً بقت دي الفكرة المسيطرة علينا. ده ممكن نعتبره تعبير مجازي لطيف، لكن علمياً الكلام ده مالوش أي أساس من الصحة!

صراع الوحوش: العقل والقلب

القلب هو ببساطة العضلة اللي بتضخ الدم للجسم كله لا أكتر ولا أقل. إنما المخ ده المدير اللي بيدي الجسم الأوامر. هو اللي بيخلي أعضاء الجسم تشتغل لوحدها زي القلب والرئة والمعدة، و المخ هو برضه اللي بيخلينا ندّي معني لكل اللي حواسنا بتوصله ليه، ويخلينا نفكر ونحلم، وكمان نحس الحب والغضب والخوف وكل المشاعر.

المخ فيه جزء اسمه الجهاز الحوفي (Limbic system) هو المسئول عن المشاعر جوه المخ. الجهاز ده بيتكون من كذا جزء، كل جزء فيهم ليه وظيفة:

تحت المهاد (Hypothalamus):

الجزء ده مسئول عن التوازن في الجسم (Homeostasis). يعني هو اللي بيتحكم في إن شعورنا يبقى متوازن لا زيادة أوي ولا قليل أوي، يعني بيتحكم في الجوع والعطش والألم والسعادة والجنس والغضب، فمثلاً مبقاش جعانة، فآكل دراع أختي من كتر الجوع، ولا محسش بالجوع خالص فأموت. من الآخر كدة هو زي الثيرموستات اللي بيعلي درجة حرارة الأوضة لما تكون برد، ويوطيها لما توصل لدرجة حرارة معينة. هو كمان بيتحكم في الحاجات اللا إرادية زي ضغط الدم والنبض والتنفس. وعشان يتحكم في كل ده لازم يجيله معلومات كافية عن الأجزاء دي من الجسم زي ضغط الدم وقد إيه المعدة مليانة، وحرارة الجلد. عصب العين مثلاً بيوصل معلومات عن الضلمة والنور، وغيره. لدرجة إن فيه بروتين اسمه اللبتين، بتنتجه الخلايا الدهنية لما بناكل كتير. تحت المهاد بيحس بمستوى اللبتين، ويرد على ده بتقليل شهيتنا للأكل، بس مفيش حاجة بتنفع معانا برضه ودي مشكلتنا إحنا. المنطقة دي بتتحكم في كل ده عن طريق حاجتين: الجهاز العصبي اللا إرادي- وده هنشرحه كمان شوية، والغدة النخامية ودي اللي بتتحكم في كل غدد الجسم.

قرن آمون (Hippocampus): وده الجزء اللي في المخ اللي بيحوّل الحاجات اللي في الذاكرة قصيرة المدى للذاكرة طويلة المدى.

اللوزة المخية (Amygdala): أكيد اسمها لوزة لإنها شبه اللوزة، وهي عبارة عن لوزتين من الخلايا العصبية تحت قرن آمون. الجزء ده اللي بيستجيب للمثيرات سواء اللي بتسبب الغضب والخوف والرغبة الجنسية. الجزء ده لما بيتشال من مخ الحيوانات بتبقى طيعة جداً، ومبتتأثرش بأي حاجة كانت بتخليها تغضب زمان. اللوزة المخية كمان بتخلينا نعمل تعبيرات بوشنا حسب الشعور اللي حاسين بيه.

التلفيف الحزامي (Cingulate Gyru): الجزء ده اللي بيخلينا نركز اهتمامنا على الأحداث المهمة لينا، وإننا نربط الذكريات بالروايح وبالألم.

المنطقة الجوفية السقيفية (Ventral Tegmental Area): المنطقة دي المسئولة عن الإحساس بالمتعة.

قشرة الفص الجبهة (Prefrontal Cortex): لما تقعد تفكر وتخطط، وتخبط بإيدك على قورتك (الجبهة)، إنت كدة حطيت إيدك على المكان اللي بيخطط للمستقبل واللي فيه بتتصرف وبتاخد موقف.

الكلام ده كله بيحصل في المخ، إزاي بيوصل لكل الجسم بقى؟

فيه جزء في الجهاز العصبي اسمه الجهاز العصبي اللاإرادي (Autonomic Nervous System) ده بيلعب دور كبير جداً في المشاعر عندنا. الجهاز ده بينقسم لحاجتين: جهاز عصبي سبمثاوي، وباراسمبثاوي.

الجهاز السمبثاوي ده بيبدأ من النخاع الشوكي اللي في ضهرنا ويروح لأماكن مختلفة في الجسم. هو اللي بيأمر بزيادة هرمون الأدرنالين في حالات الخطر والغضب مثلا، وده اللي بيجهز جسمك إما للهرب أو الهجوم. يعني لو في خناقة وفيه شلة رجالة جايين يضربوك، هو اللي هيجهز جسمك في الحالتين سواء هتخش عليهم وتضربهم أو تجري مثلا.

الجهاز السمبثاوي هو اللي – في المواقف دي –بيخلي بؤبؤ العين والجفون يوسعوا، ويحفز الغدد العرقية، ويوسع الأوعية الدموية في العضلات الكبيرة ويضيقها في بقية الجسم، ويوسع الأنابيب الشعبية في الرئة، ويزوّد معدل ضربات القلب، ويقلل إفرازات الجهاز الهضمي، فبلاش تخش خناقة بعد ما تاكل على طول عشان مش هتتضرب وبس، لكن هييجي لك عسر هضم كمان 😀

الجهاز الباراسمبثاوي هو عكس الجهاز السمبثاوي. هو اللي بينهي حالة الطوارئ اللي بيعملها الجهاز السمبثاوي (فنلاقيه بيضيّق بؤبؤ العين، ويحفز الغدد اللعابية وإفرازات المعدة والأمعاء والرئة، ويضيّق الأنابيب الشعبية،  ويقلل معدل ضربات القلب).

أنا عارفة إني أحبطت الناس العاطفية اللي صعب عليها تفكّر في المشاعر بطريقة بيولوجية كدة، بس للأسف إحنا بنحب ونخاف ونتبسط ونحزن بمخنا مش بقلبنا.

المصادر:  ncbi.LimbicSystem    ncbi.AutonomicNervousSystem

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى