.
حيّ يرزق

البيئات المصرية المختلفة: 7 ألاف سنة تنوع بيولوجي وأكتر

كتبت: مها طــه

طول عمرنا ومن الابتدائي لحد الجامعة، بندرس ونتعلم عن عظمة مصر وغنى تاريخها وإنها مهد الحضارات والأديان. نعرف الهرم وأبو الهول ومعبد أبو سمبل وحتى رأس نفرتيتي اللي مش موجودة في مصر، لكننا منعرفش جزء مهم أوي من تاريخ مصر، الجزء المتمثل في التنوع البيولوجي في البيئات المصريى المختلفة.

مصر وطن لكتير من البيئات المختلفة والمتنوعة والغنية بالتنوع البيئي والبيولوجي، مصر فيها الصحراء والبحر الأحمر والمتوسط والنيل والواحات والأودية والجبال، مصر فيها شجر المانجروف والشعاب المرجانية وتماسيح النيل، مصر نموذج للتنوع البيولوجي الموجود على الأرض.

التنوع البيولوجي في البيئات المصرية

حاليًا وفي وقت كتابة هذا المقال، اتشرف بوجودي كجزء من الحضور في مؤتمر الامم المتحدة للتنوع البيولوجي في دورته الـ14، والمُقام في شرم الشيخ واللي بتترأسه مصر ولمدة سنتين من 2018 – 2020، وحقيقي نتمنى يكون مؤتمر ناجح على كل المستويات.

التنوع البيولوجي مش مصطلح جديد على مصر، لكنه وعلى العكس كان موجود طول الوقت على جدران المعابد المصرية وفي وصايا الحكماء والكهنة وحتى الآلهة المصرية القديمة كان بعضها بيتمثل في شكل حيوانات زي (رع – باست – حورس – حتحور)، المصري القديم عرف قيمة التنوع البيولوجي وأهمية الحيوانات والنباتات وضرورة وجودها لاستمرار الحياة على الأرض.

المصدر: Sporcle

وفي التاريخ الحديث، كشفت البعثات الجيولوجية عن مدى ثراء البيئة في مصر، بوجود الحفريات الممتد عمرها لملايين السنين، زي الهياكل العظمية للحيتان الموجودة في الصحراء الغربية واللي تم إعلانها كموقع للتراث العالمي في محمية وادي الريان وسُميت بوادي الحيتان، ده غير اكتشاف 6 انواع مختلفة من الديناصورات في الصحراء الغربية وأحدثهم الديناصور “منصوراصورس”.

طبعًا وللأسف وبسبب كتير من العوامل، التنوع البيولوجي ده بدأ يتدهور، وفي أنواع مختلفة من النباتات والحيوانات انقرضت من البيئة المصرية، لكن ومع ذلك فضلت البيئة المصرية محافظة على قدر كبير من التنوع والمتمثل في 5 أنواع من البيئات وهنتكلم عنهم بالتفصيل.

  • البيئة الصحراوية

أكبر نظام بيئي موجود في مصر. بتمثل حوالي 86.89% من إجمالي مساحة مصر، بما فيها الصحراء الغربية اللي بتحتل حوالي تلتين مساحة مصر، والصحراء الشرقية على حدود البحر الأحمر. بتعتبر بيئة جافة جدًا لكن التنوع البيولوجي فيها بيظهر في الواحات (الداخلة والخارجة والفرارة والبحرية وسيوة) لوجود المياه فيها وبالتالي النباتات.

معظم النباتات الموجودة في المنطقة دي بتكون في مناطق معينة زي ساحل البحر الأحمر بسبب وجود المستنقعات المالحة بالإضافة لصحراء سيناء والساحل الشمالي والشرقي والغربي لمصر. ومن أشهر الأمثلة الموجودة في البيئة دي نبات الأراك المشهور بطعمه الطيب وريحته الذكية وهو أحد أفضل النباتات اللي بيتخذ منها السواك وموجود في صحراء سيناء.

شجر الأراك في محمية نبق في جنوب سيناء – المصدر: nabqprotectedarea
  • البيئة البحرية

ودي تاني أكبر البيئات الموجودة في مصر، حيث إن مصر بتطل على البحرين الأبيض والمتوسط، واللي لكل منهم صفاته اللي بتخليه ملجأ لأنواع معينة دون غيرها من الأسماك والكائنات البحرية والنباتات المائية والشعاب المرجانية المختلفة.

البيئة البحرية المصرية بتنتشر فيها أنواع مختلفة من الكائنات المهددة بالانقراض للأسف، وخاصةً الثدييات البحرية زي الدلافين والحيتان (17 نوع فقط) والسلاحف البحرية (4 أنواع) وأسماك القرش (حوالي 20 نوع). كمان البيئة البحرية في مصر بتحتوي على أشجار المانجروف اللي بتعتبر مكامن لامتصاص واحتجاز ثاني اكسيد الكربون، وبسبب أهميتها العظيمة في حماية البيئة تم استخدامها في الشعار الخاص بمؤتمر التنوع البيولوجي.

البيئات المصرية
شجر المانجروف في محمية نبق في جنوب سيناء – تصوير: Arthur de Wolf, Flickr

البيئة البحرية المصرية كمان بتحتوي على عدد من الطيور زي النورس والعُقاب وبعض أنواع الصقور، بالإضافة لوجود حوالي 5000 نوع من الكائنات الحية البحرية المتمثلة في 800 نوع من الطحالب والأعشاب البحرية، و209 نوع من الشعاب المرجانية الموجودة في البحر الأحمر، وأكتر من 800 نوع من الرخويات، و600 نوع من القشريات زي الجمبري، و350 نوع من الجلد شوكيات زي نجمة البحر، وكل ده غير الأنواع اللي لم يتم اكتشافها لحد هذه اللحظة.

  • بيئة الأراضي الرطبة

بيئة الأراضي الرطبة هي البيئة الأساسية للطيور المهاجرة اللي بتتخذ من مصر محطة مهمة في طريق هجرتها، وبتمتد الاراضي الرطبة / البحيرات الساحلية المصرية على طول ساحل الدلتا زي بحيرات المنزلة والبرلس وإدكو ومريوط، وشرق قناة السويس زي بور فؤاد والبردويل. كل البحيرات دي مرتبطة بالبحر المتوسط.

الحيوانات المائية اللي بتعيش في البحيرات دي بتتنوع ما بين أنواع المياه العذبة والأنواع البحرية، زي مجموعة الاسماك النيلية الممثلة في أنواع من البلطي والقراميط والبياض النيلي قشر البياض والمبروك، بالإضافة للأنواع البحرية اللي بتتحمل الحياة في بيئة المياه العذبة زي أسماك البوري وموسى والدنيس والقاروص وتعابين البحر والجمبري.

البيئات المصرية
سمك البلطي
  • البيئة الزراعية

ودي البيئة اللي نشأت بفعل النشاط الإنساني المتمثل في الزراعة وتربية الحيوانات. رجوعًا للمصريين القدماء، كانت البيئة الزراعية على جانبي نهر النيل وفي الدلتا، أحد اهم البيئات اللي كانوا بيهتموا بيها ويوصوا بيها. كمان كانوا بيعتبروا التقصير في حق الأرض الزراعية أو إهمال المزروعات واصطياد الحيوانات في غير مواسم الصيد ذنب يجب التخلص منه، وإلا تعرض الشخص للعقاب في الحياة الآخرة.

البيئات المصرية

حاليًا بقى ونتيجة لممارسات الانسان نفسه، واختفاء ثقافة العناية بالمزروعات والحيوانات وتقدير قيمتها للبيئة والانسان، تدهورت الأرض الزراعية وحل محلها مباني أسمنتية بتجرف الأراضي وتقلل خصوبتها عشان تحتل المباني مكان الأكل والظل والهواء النظيف.

بالإضافة لممارسات الاعتداء على الأراضي الزراعية وتجريف التربة، على مدار حوالي 30 سنة، اعتمدت مصر على إدخال أصناف من النباتات عالية الإنتاج واستخدامها في نطاق واسع من الأراضي. للأسف ده نتج عنه تدهور واختفاء أنواع تقليدية في البيئة المصرية، بالإضافة لتدهور التنوع الجيني للمحاصيل الموجودة حاليًا.

مصر بتعتمد على 4 محاصيل أساسية لتوفير 50% من الغذاء المعتمد على النباتات، وهما القمح والذرة والأرز والبطاطس، وبنعتمد على حوالي 14 نوع من الثدييات والطيور لتوفير 90% من البروتين الحيواني اللازم لتلبية الاحتياجات المتزايدة.

  • بيئة المراعي

المراعي في مصر موجودة في عدد من المناطق، زي محمية جبل علبة اللي بتعتبر واحدة من أهم وأكبر المحميات المصرية والموجودة في الجنوب الشرقي  لمصر وتحديدًا في مثلث حلايب، ومحمية وادي العلاقي الموجودة في أسوان، تعتبر من أكبر الأودية الجافة في الصحراء الشرقية، بالاضافة لمحمية العميد الموجودة على الساحل الشمالي الغربي للبحر المتوسط، وبالطبع سيناء.

البيئات المصرية
محمية جبل علبة

وبمناسبة سيناء، نقدر نقول إنها دليل مثالي على مدى تنوع البيئات المصرية. على سبيل المثال، مدينة شرم الشيخ واللي تم اختيارها لاستضافة افتتاحية المؤتمر بتتوفر فيها نماذج للبيئة البحرية والبيئة الصحراوية وبيئة المراعي، بالإضافة لبيئة الجبال، اللي بتعبر عنها جبال سيناء، بالإضافة لسلاسل جبال البحر الأحمر وجبل علبة.

في النهاية وبعد استعراضنا لكل المعلومات دي عن البيئات المصرية، نقدر نقول إن مصر بتتمتع بأنواع فريدة من الحيوانات والنباتات، وعددها المُسجل لحد دلوقتي أكتر من 22 ألف نوع، منها حوالي 888 نوع مهدد بالانقراض، وفي الجدول ده نقدر نستعرض جزء من الإحصاءات دي.

التنوع البيولوجي في مصر
المصدر: وزارة البيئة المصرية

التنوع البيولوجي مهم لاستمرار الحياة على الأرض مش بس في مصر، وحاليًا وفي وسط أخبار من نوع اختفاء ثلثي الحياة البرية على الأرض بحلول 2020، كان لازم العالم كله يتحرك لانقاذ الكوكب، لاننا للاسف معندناش مكان تاني نقدر نعيش فيه. ولازم نبتدي وبسرعة نبذل كل الجهد والبحث لحماية كل أشكال الحياة والتنوع على الكوكب.


المصادر:  realmofhistory  scribd  egyptheritage  cop14-egypt  ncbi

تعليق واحد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى