.
ليه وإزاي؟

متلازمة الأغنية الأخيرة: ليه الأغاني بتلزق في عقلك؟

كتب: أحمد حسين

تصحي في يوم الامتحان، تنزل بسرعة تحاول تلحق المواصلات قبل ما تتزحم علشان توصل بدري. بعد ما توصل وتراجع شوية تدخل اللجنة، شوية وييجي المراقب ومعاه ورقة الامتحان، وأول ما تستلم ورقة الامتحان بقى، هوب! أغنية عمّالة تدور في دماغك ومش عارف تتخلص منها، وكلامك كله مع مخك بيدور في نقطة ”يا عم مش عايز الأغنية دي، أنا فين الكلام اللي ذاكرته؟ هنضيع يخرب بيتك“، وساعتها بتبقى بتعافر علشان تفتكر، وبتعافر علشان تتخلص من الأغنية في نفس الوقت.

اللي حصل ده بيحصل بنفس الطريقة غالبًا، مع الأغاني اللي بتسمعها في المواصلات، أو بتسمعها في إعلان سخيف زي ”لبان مربيلا“ و”بلوبواكس“ و”مكرونة ستار الذهبية ستااااار“، فتلزق الأغنية في دماغك، وتفضل ترددها أو تردد لحنها طول اليوم. طيب اللي بيحصل ده حصل ليه؟

مش عارف، جيت أنساها افتكرتها أكتر يا حنفي!

الأغاني
في دراسة عملتها ”د. كيلي جاكوبسكي“، من جامعة درم بإنجلترا، قالت إن الأغاني اللي بيُطلق عليها عادةً لفظ ”دود الأذن – Earworms“، واللي بتلزق في الدماغ طول اليوم، ويمكن لمدة أيام كمان، بتكون الأغاني اللي لحنها سهل على الأذن.

د. جاكوبسكي قالت إنه الأغاني دي غالبًا بتلزق في دماغنا، في الأوقات اللي بنعمل فيها أي شيء مش محتاج تفكير، والأوقات دي بيُطلق عليها اسم ”الإدراك العفوي“.

الإدراك العفوي ده، هو الوقت اللي بنكون فيه بنعمل حاجة مش محتاجة مجهود ذهني، يعني واقفين في طابور، أو بنتفرج على فيلم خفيف بعد وجبة دسمة، أو راكبين مواصلة ورايحين مشوار، أو مُحلقين بنظرنا في الفراغ كده ما بنعملش حاجة. الأوقات دي بتظهر في يومنا تقريبًا بنسبة 40%، في الفترة دي بقى إنت مُعرّض تسمع أغنية _أي أغنية_ وتثبت في دماغك، شرط يكون لحنها بسيط وسهل.

يعني إيه لحنها بسيط وسهل؟ أقول لك، عارف أغنية (Twinkle Twinkle) اللي كنا بنغنيها وإحنا أطفال؟ دي الأغنية اللي ينطبق عليها لحنها سهل. بتبدأ بإيقاع هادي، وبعدين بتعلى شوية في النص، وبعدين في الأخر خالص بترجع للإيقاع الهادي تاني. قيس على كده بقى معظم أغاني البوب وأغاني الإعلانات كمان، علشان كده دي أسهل أغاني بتلزق في دماغنا.

أعمل إيه يا أستاذ غسان؟

الأغاني

د. جاكوبسكي في النهاية قالت ماتسبناش كده من غير ما تقول لنا إزاي نتخلص من الأغاني دي، والحقيقة هي كانت صريحة، إنه مفيش طريقة علمية (أو ثُبتت علميًا يعني) تقدر تخلصنا من الأغنية، لكن هي نصايح وتكهنات. منها مثلًا إننا نحاول نفكر في الوقت ده في أغنية تانية، ولو ماعرفناش، نحاول نكرر الأغنية دي لحد ما نملها، إحنا عمومًا كبشر بنمل ونزهق، فمسيرنا هنزهق منها، لذلك نحاول نكررها كتير لحد ما نزهق منها.

في بحث تاني اتنشر في جريدة ”علم النفس التجريبي – Journal of Experimental Psychology“، البحث بيقول ببساطة إنك لو عايز تتخلص من الأغنية اللي بتلزق في عقلك، امضغ لبانة، وبيقولوا _الباحثين يعني_ إنهم جربوه مع أكتر من شخص، وفعلًا الشخص اللي بيمضغ لبانة _سواء لما الأغنية تلزق أو قبل ما تلزق_، بينساها أسرع من الشخص اللي ما بيمضغش لبانة.

بس عمومًا يعني، لو روحت الامتحان بعد كده، ولقيت نفسك بتغني الحق عليه، أو بتغني لولاكي أو إنت معلم وإحنا منك نتعلم، خليك عارف إنك وإنت بتذاكر ماكنتش بتركز في مذاكرتك يا بيه وكده ها… (سوري اندمجت شوية :D) . المهم يعني ده باختصار سبب إنها بتلزق في عقلك.


المصادر: cbsnews  ibtimes  medicaldaily

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى