هل العسل ضار بالصحة ؟!
كتبت: يارا كمال
مشكلتنا إننا متطرفين، وفاكرين إن المليجي شيطان ومريم فخر الدين ملاك. معندناش أي مناطق رمادية، مع إن أي حاجة ربنا خلقها ليها مميزات وعيوب. عندك مثلًا معلقة العسل اللي مامتك كانت بتجري بيها عشان تديهالك قبل ما تنزل على الباب.
أهو العسل ليه فوايد كتير طبعًا زي ما كلنا عارفين، بس طبيعي برضه ليه أضرار وفيه ناس المفروض ماتاكلوش، أه والله يا جماعة زي كل حاجة في الدنيا.
العسل ضار بالصحة.. امتى؟
مبدئيًا كده الأطفال تحت سن الـ12 شهر غلط عليهم العسل لإن ده ممكن يسبب لهم تسمم، لإنه ممكن يكون ملوّث ببكتريا كلوستريديوم بوتولينوم (Clostridium botulinum)، واللي مش بتسبب ضرر للبالغين لإن جهازهم المناعي بيتعامل معاها عادي على عكس الأطفال.
برضه العسل اللي بيُنتج من رحيق زهرة الردندرة بيكون مش آمن لإنه بيحتوي على مادة سامة ممكن تسبب مشاكل في القلب وانخفاض ضغط الدم ووجع في الصدر ومشاكل تانية خطيرة في القلب.
بالنسبة بقى للحوامل والستات اللي بترضّع، فمفيش دليل علمي كافي عن إن تناول العسل مضر ليهم ولا لأ، بس احتياطي يعني بلاش بدل ما الملوثات اللي فيه تضرهم أو تتنقل للأجنة أو المواليد.
طبيعي كمان لما حد يبقى عنده حساسية من حاجة ماياكلهاش حتى لو مفيدة لإنها هتضره أكتر ما هتفيده، وبالتالي الناس اللي عندهم حساسية من حبوب اللقاح أو حساسية مرتبطة بالنحل المفروض ماياكلوش عسل.
من الحاجات اللي ممكن تسببها الحساسية دي: الربو والكحة وصعوبة البلع والتهاب الشفاه واللسان والهرش والتهاب الرئة وضيق التنفس وتورم تحت الجلد وتغيرات في الصوت والصفير أثناء التنفس وكمان آثار تانية مهددة للحياة.
مع ذلك العسل ممكن يتسبب في إن ضربات القلب تبقى مش طبيعية أو مش منتظمة جو محرم فؤاد وهو بيغني ”لأ وحياتك ناقصين دقة، فين وديتها مين اللي خدتها“ 😀 ، ده غير الرؤية المشوشة وتغير في التذوق والإسهال والرؤية المزدوجة والنعاس والضعف والتعب والشعور بحرق ووخز في الجلد.
ومش بس كدة، كمان الحمى والإصابة بنوبة قلبية وفرط النشاط وضعف الوعي وزيادة اللعاب ومشاكل الرئة ومشاكل العضلات والعظام وظهور ندوب بسيطة والغثيان وتوتر الأعصاب والألم والنوبات ومشاكل النوم والتعرق وتسوس الأسنان واضطرابات المعدة والتهابات المسالك البولية والقيء وفقدان الوزن وجفاف الجرح أو الإصابة.
طب بالنسبة لمريض السكر؟
العسل ممكن يأثر على مستويات سكر الدم، وبالتالي مرضى السكري أو اللي مستوى السكر في دمهم منخفض أو اللي بياخدوا أدوية أو أعشاب أو مكملات بتأثر في سكر الدم لازم ياخدوا بالهم من موضوع العسل ده.
وللأسف العسل مايفرقش أوي عن السكر العادي، لو أنت مريض سكري وعايز تظبّط سكرك. إلا إن فيه دراسة اتعملت على استهلاك مرضى السكري للعسل لمدة 8 أسابيع واللي بينّت إن ليه آثار إيجابية على الوزن وعلى نسبة الدهون في الدم، لكنه بيزوّد برضه مستويات الهيموجلوبين الجلوكوزيلاتي (hemoglobin A(1C، اللي هو مستوى الجلوكوز في الدم، عشان كده لازم مرضى السكر ياخدوا بالهم من العسل.
كمان العسل ممكن يزوّد خطر النزيف، فالناس اللي عندهم اضطرابات نزيف أو بياخدوا أدوية ممكن تزوّد خطر النزيف لازم ياخدوا بالهم ويظبطوا جرعات العسل اللي بياخدوها.
العسل ممكن كمان يسبب انخفاض ضغط الدم، وبالتالي الناس اللي بياخدوا أدوية بتنزّل الضغط لازم ياخدوا بالهم برضه. كمان العسل بيتدخل في الطريقة اللي الجسم بيعالج بيها أدوية معينة باستخدام نظام أنزيمات الكبد “سيتوكروم بي 450”.
هتقولوا لي أومال مين اللي ياكله بقى؟ هقول لكم لسه جاية لكم في الكلام. الناس كمان اللي عندهم أمراض قلبية أو اضطرابات في الجهاز العصبي أو اضطرابات خاصة بالمعدة والأمعاء، واللي بياخدوا مضادات حيوية أو أدوية قلب أو عوامل للجهاز العصبي أو أدوية للأمعاء أو المعدة أو عوامل لفقدان الوزن، يخلوا بالهم.
ده إحنا ماناكلش عسل بقى.. لأ ناكل
لو أخدتم بالكم، هتلاقوني بقول ”خلوا بالكم“، يعني كل اللي فاتوا دول يتناولوا العسل بحذر عشان مايضرهمش، يعني مايفرطوش في أكله، ما عدا طبعًا الأطفال اللي سنهم أقل من 12 شهر والناس اللي عندهم حساسية من اللقاح أو أي حساسية مرتبطة بالنحل ماياكلهوش خالص.
عمومًا مفيش حاجة اسمها إن الأكل ده مفيد، فعادي يلا ناكل منه كتير لإنه بكده ممكن يبقى مضر. بس ده لا يمنع إن فوايد العسل كتيرة، لإن فيه معادن وفيتامينات وإنزيمات مهمة، ده غير إن معزز صحي وطبيعي للطاقة، وبيبني الجهاز المناعي وفيه خصائص مضادة للأكسدة ومضادة للبكتريا ومقاومة للأورام. كمان السكريات اللي في العسل بتُمتص في تيار الدم بالتدريج وده بيخلي الهضم أحسن.
القدماء المصريين كانوا بيستخدموا العسل في تضميد الجروح وفي التحنيط. وأحيانًا دلوقتي عسل مانوكا، وده عسل بيُنتج من أشجار مانوكا المحلية في نيوزيلندا، بيُستخدم في علاج قرح الساق المزمنة وقرح الفراش.
كمان العلماء أثبتوا في المعمل إن العسل بيعيق نمو الجراثيم اللي بتتنقل عن طريق الأغذية زي الـ(E.coli) والسالمونيلا، ومحاربة أنواع معينة من البكتريا من ضمنها المكورات العنقودية الذهبية (Staphylococcus aureus) والزائفة الزنجارية (Pseudomonas aeruginosa)، واللي بتكون شايعة في المستشفيات والعيادات، لكن لسه مش مثبت علميًا إذا كان العسل بيقوم بنفس الدور في أجسام الناس ولا لأ.
العسل كمان مفيد في حالات البرد. فيه دراسة اتعملت على 139 طفل، تفوق فيها العسل على الديكستروميتورفان (مضاد للسعال) والدي-فين هيدرامين (مضاد للسعال ومن مضادات الهيستامين) في تخفيف كحة الليل عند الأطفال وتحسين نومهم.
وفي دراسة تانية تضمنت 105 طفل، تفوق عسل الحنطة السوداء (Buckwheat honey) على الديكستروميتورفان في منع الكحة بليل.
فيعني العسل آمن ومفيد وصحي ليك سواء كنت هتتناوله عن طريق الفم أو هتحطه على الجلد لغرض طبي لكن على الجانب الآخر مافيش حاجة مفيدة في مطلقها، فعشان كده لازم تخلوا بالكم من الكلام اللي فوق اللي إحنا ذكرناه.
المصدر: mayoclinic webmd mayoclinic2 ncbi.nlm.nih.gov msu.edu webmd2
