اختفاء الكروموسوم Y: هل الرجالة هتنقرض في المستقبل؟
كتبت: مها طــه
بعد تخرجي من الكلية اشتغلت مُدرسة لعلم الأحياء، ووقتها كنا بندرس في المنهج علم الوراثة بالتالي بنتكلم عن الكرموسومات، وكانت الجملة الشهيرة، إن الكروموسوم X هو الكروموسوم اللازم للحياة، بينما الكرموسوم Y يعتبر مُحدِد للجنس فقط، بمعنى تاني إن الكروموسوم Y مش مهم أوي وده حقيقي لكن إزاي الكلام ده؟
الكروموسوم Y رمز الذكورة
أول ما بتيجي سيرة الكروموسوم Y، على طول بييجي في دماغنا الرجالة، الكروموسوم Y هو رمز الذكورة، وهو السبب في تواجد شركائنا على الأرض من الذكور، وده لأنه بيحتوي على جين مهم جدًا وهو “SRY” اللي بيحدد نوع الجنين ما بعد الأسبوع السادس من الحمل، وفي حالة وجود الكروموسوم Y، بيتطور الجنين عشان يبقى ذكر، أما لو الكروموسوم Y مش موجود، فالجنين بيتطور عشان يبقى أنثى.
الكروموسوم Y أصغر حجمًا من الكروموسوم X، وكان تفسير ده لفترة طويلة راجع لإنه شايل عدد قليل أوي من الجينات بالمقارنة مع الكروموسوم X اللازم للحياة، واللي من غيره لا يمكن إنسان أو حتى حيوان يعيش. حاليًا بقى العلماء اكتشفوا إن الكروموسوم Y بيتراجع حجمه بسرعة، وإنه لو استمر على المعدل ده، غالبًا هيختفي تمامًا!
هل ده معناه إن الرجالة هتنقرض؟ قبل ما نخاف على مصير الرجالة، خلينا نقول إن عشان الكروموسوم Y يختفي تمامًا محتاج حوالي 4.6 مليون سنة، تنفسنا الصعداء صح، خلينا نقول إنه حتى لو يبدو إن ده مدة طويلة، إلا إنها مش كده بالمقارنة بعمر الحياة على الأرض اللي بيمتد لحوالي 3.5 مليار سنة.
اعرف أكتر| ”التوالد البكري“ من النهاردة مافيش رجالة!
من حوالي 166 مليون سنة، ومع وجود الثدييات الأولى على الأرض، كانت النسخة المبكرة من الكروموسوم Y في نفس حجم الكروموسوم X ، وكان عليها نفس عدد الجينات كمان. لكن الكروموسوم Y يعتبر فيه عيب أساسي، وعلى عكس كل الكروموسومات التانية، اللي موجود منها نسختين في كل خلية من خلايا الجسم، الكروموسوم Y له نسخة واحدة بس بتتنقل من الأب لأولاده الذكور، ومنهم لأولادهم الذكور وهكذا.
الكلام ده معناه إن الجينات اللي كانت موجودة على الكرموسوم Y لا يمكن تدخل في عملية إعادة التركيب الوراثي، أو اختلاط الجينات اللي جاية من الأم مع اللي من الأب، وده على مدار الأجيال المتعاقبة بيساعد في القضاء على الطفرات الوراثية الضارة. بسبب فقدان الكروموسوم Y للميزة دي، الجينات تدهورت من جيل لجيل بمرور الوقت، لحد ما في النهاية فقد الكرموسوم Y عدد كبير جدًا من جيناته.
الكروموسوم Y ومحاولات البقاء والصمود
وعلى الرغم من كل ده، أظهر بحث جديد إن الكروموسوم Y طور آليات مقنعة عشان “يفرمل” شوية من عملية فقدان الجينات دي، ويبطئ معدلها، وبالتالي يطول من الوقت المفترض قبل اختفاء الكرموسوم ككل.
مثلًا في دراسة دنماركية نُشرت في دورية “PLoS Genetics” العلمية، تم دراسة التسلسل الجيني الموجود على الكروموسوم Y في 62 رجل مختلفين، فكشفت عن إنه معرض لعمليات إعادة تركيب وراثي كبيرة، بشكل يسمح بالحصول على نسخ متعددة من الجينات اللي بتساهم في الحفاظ على صحة ووظيفة الحيوانات المنوية وتقليل فقدان الجينات.
لو فاكرين إن الكلام ده في الإنسان بس فالحقيقة إنه لأ، الحيوانات كمان (الثدييات وبعض الحيوانات التانية) اللي بتحتوي على الكروموسوم Y اخدت نفس الطريق، وبدأ فيها الكروموسوم Y بمحاولة حماية جيناته وتضخيم عددها، بحيث تلعب دور حاسم في إنتاج الحيوانات المنوية، وبالتالي في تنظيم نسبة الجنس في الأجيال الجديدة، عشان الذكور يبقوا تقريبًا قد الإناث، وبيظهر ده بوضوح في القوارض.
اعرف أكتر| 10 حقائق علمية حيوية عن الحيوانات المنوية!
مؤخرًا بقى، ومع تواجد عدد من الأدلة اللي بتشير للزيادة والتضخيم في عدد الجينات ده، بدأ العلماء في مجال علم الأحياء الجزيئي وعلم التطور، يقولوا إن زيادة عدد النسخ الجينية ده، ما هو إلا دليل على الانتخاب الطبيعي اللي اتكلم عنه داروين من سنين طويلة.
رجوعًا بقى لسؤالنا.. هل الكروموسوم Y فعلًا هيختفي ؟
الحقيقة إن المجتمع العلمي حاليًا منقسم، عملاء بيقولوا إن الآلية اللي استخدمها الكروموسوم Y للدفاع عن نفسه تعتبر عظيمة ورائعة وهتنقذه من مصيره المتوقع، في حين إنه على الناحية التانية علماء غيرهم بيقولوا إن ده لا يتعدى كونه عملية تأخير لمصير محتوم، وفي النهاية مهما حصل، الكروموسوم Y هيختفي من الوجود.
هل اختفاء الكروموسوم Y معناه بالضرورة اختفاء الرجالة؟
الحقيقة إن حتى لو اختفى الكروموسوم Y من البشر كلهم، فده مش معناه إن الرجالة هتنقرض، لأن حتى الأنواع التانية من الثدييات زي الفأر الشوكي الياباني اللي اختفى منها بالفعل الكروموسوم Y، مازالت فيها إناث وذكور عادي جدًا. طب إزاي؟
في الحالات دي، بيتنقل الجين الأساسي “SRY” اللي اتكلمنا عنه في أول المقال، ويبقى موجود على كروموسوم تاني، وده معناه إن الأنواع دي هتفضل تنتج إناث وذكور عادي جدًا من غير ما نحتاج للكروموسوم Y خالص. لكن للأسف الكرموسوم الجديد اللي هيحدد الجنس بعد ما اتنقل له الجين، هيبدأ هو كمان يدخل نفس الدورة بتاعة Y، ويتحلل لنفس بالتدريج.
الشئ المثير للاهتمام في البشر هو إنه حتى لو كان الكروموسوم Y مطلوب لإتمام عملية التكاثر في البشر بشكل طبيعي، إلا إن كتير من الجينات – القليلة أصلًا – اللي شايلها مش ضرورية خالص في حالة استخدام تقنيات الأنجاب المساعدة زي الحقن المجهري وأطفال الأنابيب وغيرهم، وده معناه إن مع تطور الهندسة الوراثية ممكن نعوض وظيفة الكروموسوم Y تمامًا، لدرجة إن بعض العلماء بيعتقدوا غن في المستقبل البشر مش هيحتاجوا للجنس من اساسه بهدف الإنجاب.
ولذلك عزيزي/تي القارئ/ة مفيش أي داعي للقلق على نفسكم ولا اولادكم، لأنه حتى لو اختفى الكروموسوم Y هيفضل في ذكور عادي، وحتى لو وظيفته تأثرت او حاجة فالعلم هيكون تطور بشكل كبير، وحتى لو ما تطورش فالموضوع لسة قدامه 4.6 مليون سنة، يدينا ويديكم طولة العمر.
المصادر: ncbi link.springer academic annualreviews nlm ghr
