صحة الأظافر: إيه اللي ممكن تقوله ضوافرك عن صحتك؟! – بالصور
كتبا: أحمد حسين ومها طــه
الأظافر من أكتر الحاجات اللي بيختلف فيها رأي الستات عن الرجالة. يعني تلاقي الستات بتطولها وتهتم بيها، ده غير المهووسات بقى بألوان المانكير المختلفة. في حين بقى إن الرجالة بيشوفوا إنها شئ زايد في الجسم لازم نقصه أول بأول عشان مايبقاش شكلها وحش وتلم قاذورات تحتها. لكن سواء كنا رجالة أو ستات فأغلبنا مش بياخد بالنا من التغييرات اللي بتحصل في الأظافر واللي ممكن تبقى مؤشر لمرض خطير.
ضوافرنا عبارة عن مجموعة من الخلايا الميتة اللي بتنمو من جزء في طرف الصباع اسمه ”مصفوفة الظفر – Nail Matrix“، واللي بيبدأ من تحت البشرة مباشرةً (المنطقة البيضاء الموجودة في قاعدة الأظافر). طول الوقت الأظافر بتنمو وبتتأثر بعوامل مختلفة، وكل ما تتقص ترجع مصفوفة الظفر تنتج الطبقات الرقيقة من الأظافر الجديدة.
عميلة النمو دي طبيعية، لكن بمجرد ما نلاحظ حاجة مختلفة لازم نقف عندها، لأن معناها إن في شئ ما اتغير، وقد يكون ده مؤشر لحالة صحية معينة، زي ما هنشوف في الحالات دي:
– خطوط بو
هي خطوط عرضية بتمتد من جانب الظفر للجانب التاني. ظهور الخطوط دي معناه إن مصفوفة الأظافر توقفت عن إنتاج الخلايا الجديدة نتيجة لعدم وصول تغذية مناسبة ليها من الدم، وده معناه إن الجسم محتاج للمواد الغذائية الموجودة في الدم عشان يعمل حاجة أكبر/أهم من مجرد إنتاج خلايا جديدة للأظافر، زي مثلًا إنه بيحاول يحافظ على خلاياه الأساسية من الموت. ممكن يكون ظهور الخطوط دي علامة لمرض ”الفشل الكلوي –Acute kidney failure“.
– حفر الأظافر
عبارة عن حُفر صغيرة بتظهر على سطح الأظافر. الحُفر دي غالبًا بترتبط بالإصابة بأمراض جلدية زي الصدفية (أماكن في الجلد فيها احمرار وانتفاخ عن بقية الجلد) أو ”الطفح الجلدي –Eczema“، وهو التهاب بيظهر على سطح الجلد من الخارج في شكل خطوط حمراء بشكل واضح. كله ده بيؤثر على مصفوفة الأظافر ويخليها تنتج خلايا جديدة مضطربة لذلك بتظهر الحُفر على سطح الأظافر.
الأظافر الزرقاء
تغير لون الاظافر إلى الأزرق ممكن يحصل لأسباب كتيرة، منها مثلًا احتباس الدم بسبب الكدمات أو الحرارة المنخفظة (البرودة الشديدة). وفي الحالة دي مش بتوصل كميات كافية من الأكسجين للأطراف عن طريق الدم. الدم المحتوي على كميات أكسجين قليلة غالبًا بيكون لونه غامق ومايل للزرقة، عشان كده الضفر بيكون لونه أزرق.
أحيانًا بتحصل الحالة دي بشكل طبيعي في أوقات البرد القارس. لكن في أوقات تانية ممكن اعتبارها علامة لأمراض مختلفة ليها علاقة بالرئة زي الربو أو انتفاخ الرئة، أو مرض تاني اسمه ”مرض رينو –Raynaud’s disease“، وهو عبارة عن اضطرابات وعائية بتسبب تلون الأظافر.
الأظافر الصفراء
ممكن الاصفرار ده يحصل كنتيجة لـ”التهاب الظفر الفطري –Fungal nail infection”، واللي بيحصل كنتيجة لعدم الاعتناء بنظافة الأظافر أو إصابتها أو ضعف المناعة، أو بسبب أمراض تانية زي مرض السكر وغيره. لكن اصفرار الأظافر في بعض الحالات مالوش أي دلالة، فـ 77% تقريبًا من البشر أصحاب البشرة السمراء أظافرهم لونها أصفر.
الأظافر الشاحبة
ودي حالة فيها الأظافر بتكون فاتحة أوي عن لونها الطبيعي وشاحبة، لكن خطورتها تكمن في إنها ممكن تبقى علامة مبكرة لمرض خطير زي فقر الدم (الأنيميا) أو فشل القلب الاحتقاني “Congestive heart failure” أو مرض في الكبد أو كعلامة من علامات سوء التغذية.
الأظافر البيضاء
لو كانت الأظافر بتتميز بشكل معين فيه الأظافر في الغالب بيضاء لكن حواف الأظافر لونها أغمق، فده ممكن يكون مؤشر على الإصابة بمشاكل في الكبد، زي التهاب الكبد الفيروسي (زي الموجود في الصورة). أما لو كانت في خطوط بيضاء أفقية، فده ممكن يكون ناتج عن خبطة قوية شوية أو الإصابة بمرض خطير مصاحب له ارتفاع في درجة الحرارة زي الحمى القرمزية والالتهاب الرئوي.
أظافر جافة أو متشققة أو هشة
النوع ده من المشاكل ممكن يكون بسبب نمط الحياة، يعني مثلًا الناس اللي بتتعرض طول الوقت للمياه (غسيل أطباق وأعمال مطبخ وتنظيف – سباحة أو غيرهم) أو الناس اللي بتستخدم مزيل طلاء أظافر بشكل متكرر أو بتتعرض لمواد كيميائية زي منتجات التنظيف أو عايشين في منطقة منخفضة الرطوبة.
التشققات والتصدعات دي ممكن كمان تكون لأسباب تانية أكتر خطورة زي الإصابة بالفطريات أو مرض الغدة الدرقية وخصوصًا قصور الغدة الدرقية. كمان التشققات دي ممكن تكون بسبب نقص في فيتامين A و B و C.
اعرف أكتر|عن الفيتامينات: أكله كله غذا وفيتامين
تعجر الأصابع
ودي حالة بغض النظر عن اسمها بتحصل فيها زيادة في سماكة الجلد الموجود تحت أظافر الأيادي أو الأقدام، وغالبًا بتكون مصاحبة لعدد من الأمراض اللي معظمها بيسبب عدم وصول كمية كافية من الاكسجين من الدم لتغذية الأظافر زي أمراض القلب وأمراض الرئة، ده غير إنها ممكن تبقى من أعراض الإصابة بأمراض الكبد والجهاز الهضمي. لكن كمان لازم نقول إن الحالة دي ممكن تكون مجرد وراثة في عائلة معينة، وتتنقل بين أفرادها بالوراثة ومن غير ما يكون ليها دلالة على مرض معين من اللي فاتوا.
أظافر المعلقة
ودي حالة فيها الأظافر بتنحني لأعلى شوية بالذات عند الحواف وبتاخد شكل يشبه المعلقة كده. وفي الأغلب دي علامة على فقر الدم الناتج عن نقص الحديد أو نقص في تصبغ الدم بسبب زيادة امتصاص الحديد، وأحيانًا ممكن تبقى علامة ومؤشر للإصابة بأمراض القلب أو قصور الغدة الدرقية.
انتفاخ حول الأظافر
أما بقى لو كان الظفر طبيعي لكن المنطقة المحيطة بيه تبدو حمراء/ملتهبة ومنتفخة فده اسمه “التهاب طية الظفر”، وده بيحصل نتيجة الإصابة بمرض الذئبة الحمراء أو أي مرض من أمراض المناعة الذاتية. ده غير إن أحيانًا ممكن تحصل نفس الحالة كنتيجة للعدوى اللي بتسبب التهاب واحمرار.
نخر الأظافر
دي اللي إحنا بنقول عليها “قرقضة الضوافر” وفي الأغلب بتكون عادة قديمة من الطفولة، لكنها ممكن علامة على الإصابة بالقلق المفرط، ده غير إن العادة دي مرتبطة بالاصابة باضطراب الوسواس القهري، لو حاسس إنك بتعمل ده بدون سيطرة منك ومش قادر تبطل يبقى من الأفضل إنك تستشير طبيب.
اعرف أكتر| ما بين المرض العقلي والعصبي والنفسي
الأظافر مش هي الأساس
مش كل الحالات اللي قولناها تفسيرها الوحيد هو الإصابة بالأمراض الخطيرة دي كلها، وارد جدًا يكون معظم الحالات دي ناتجة عن حاجات عادية زي العادات الغلط أو حتى بسبب خبطات أو طريقة تعامل غلط مننا. وهنا لازم نقول إن كتير من تشوهات الأظافر دي غير ضارة أصلًا ومش كل حد أظافره بيضايبقى عندي التهاب كبدي. ومع ذلك، لو حسيت بأي حالة من اللي فاتت أو غيرها لازم تتأكد من السبب وراها وتستشير طبيب من باب التأكد، ولو لا قدر الله في حاجة نلحقها من البداية.
المصادر: aad health.clevelandclinic mayoclinic nhlbi.nih.gov nhs
