The Calabash Nebula وجمالية النهايات!
كتب: حسين مجدي القزاز
_طالب بكلية علوم جامعة عين شمس قسم فيزياء وكيمياء.
The Calabash Nebula وجمالية النهايات!
بعيدًا عن الاستنتاجات والتوقعات والخرافات كمان اللي بتخص السنه الجديدة، لكن واضح إنها بادية بجمال واكتشافات مذهلة. في شهر فبراير بنشهد حاجة من أروع ما شافت البشرية. وهي مرحلة من مراحل موت نجم من النجوم اللي زي نجمنا (الشمس) في الحجم.
موت؟!! إنت بتبدأ معانا السنة بموت؟
في الواقع إحنا ممكن مانسميهاش موت بالمعني الحرفي وده هنعرفه في الأخر ولكن خلينا نشوف الصورة كده.
النجم الجميل ده وصل لمرحلة أبعد من نجمنا (الشمس) زمنيًا، بمعنى إنه أكبر في السن من الشمس، وبالفعل انفجر علشان ينهي حياته بالشكل اللي إحنا شايفينه ده، واللي يخلينا نتعجب قد إيه الخلق جميل حتي في النهايات!
الصوره دي اتاخدت يوم 3 فبراير للسنة دي بواسطة تليسكوب هابل الفضائي. الحاله دي للنجم ده نادرًا ما بيقدر العلماء يصوروها لإنها بتحصل في زي ما بيقولوا غمضة عين. الصورة اللي التقطها تليسكوب هابل من روعتها وجمال ألوانها ماتبينش خالص إنها لحظة لنهاية حياة نجم ولكن هي دي الحقيقة، واللي بيمثل جمال الحياة حرفيا.
طب إزاي حياة؟!
نهاية حياة نجم زي ده بيسبب بداية حياة نجوم تانية بشكل مباشر أو غير مباشر.
إزاي؟!
أقولك إزاي.. النجم بيتكون بفعل حاجات تانيه بتأثر عليه، وده الي قالت لنا عليه نظرية زي نظرية السديم واللي بتقول إن النجوم بتبدأ في البداية من سحب كونية أو سديم زي الصورة دي.
اعرف أكتر| السديم.. منه وإليه نعود!
طب السحب الكونية دي بتيجي منين؟
بتيجي من نجم منتهي زي النجم اللي إحنا شايفينه فوق بينفجر وبينشر الانفجار بتاعه والسحب والغازات والمعادن بتاعته في الفضاء علشان تشارك في تكوين نجوم جديدة، فبالفعل موت النجم ده بيشارك بشكل مباشر أو غير مباشر في تكوين نجوم تانية.
كمان الصورة بتاعت النجم المنفجر بتوضح المجال الواسع جدًا للانفجار وسرعة انتشاره اللي بتوصل لمليون كيلومتر في الساعه ودي سرعة مهولة.
نيجي معلومه تانيه مهمة؛ الانفجار بيبعد عننا بـ5000 سنه ضوئية. يعني إيه؟!
يعني اللي إحنا شايفينه دلوقتي ومنبهرين بيه حصل من 5000 سنة تقريبا 😃
إزاي بقى.. ده بيخلينا نرجع لنقطع مهمة جدًا وهي: يعني إيه سنة ضوئية؟ السنة الضوئية مش زمن ولكنها هي المسافة اللي بيقطعها الضوء في سنة، وده معناه علي سبيل المثال إني لو ببعد عنك بسنة ضوئية ونورت كشاف، إنت هتشوف النور بعد سنة كاملة، اللي هي الوقت اللازم لوصول الضوء ده ليك.
فخلونا نتخيل الانفجار كان ماسك كشاف وبينور من خمس ألاف سنة. يبقى الانفجار هيوصل لنا ضوءه امتى؟
صح بعد خمس آلاف سنه من الانفجار تقريبا اللي هوا دلوقتي.
أخيرًا، رغم إن الانفجار ده حصل من 5000 سنه ولكن لإن النجم ده قريب من الشمس عندنا في الحجم ونفس النوع تقريبا، فمن الممكن نعتبر إن اللي حصل بيمثل صورة أو زي بث مباشر للي ممكن يحصل في يوم من الأيام للنجم بتاعنا.
ودي كانت قصة الـThe Calabash Nebula، وده كان اسم الصورة اللي هابل خدها وإحنا شايفينها.
المصادر: scitechdaily
