خناقة على قهوة الكواكب: والسما بتنور ألوان عندكم؟
كتب: حسين مجدي القزاز
*خناقة على قهوة الكواكب*
في عالم موازي كواكب المجموعة الشمسية قاعدين علي قهوة مجرة درب التبانة “milky way” وبيتفرجوا علي مباراة من كرة قدم المجرات.
الأرض: شوفت؟؟ زي ما قولتلك مجرتنا هتكسب الماتش، إنت فاكرني أي كلام يا ابني ده أنا السما عندي بتنور ألوان.
عطارد: ياراااااجل؟؟ بتتكلم جد؟ حصل إزاي ده؟!
الأرض: لأ دي صعبة عليك (بيطلع دخان عوادم من البايب بتاعه)
المريخ: يا عم عطارد سيبك منه، ما أنا كمان السما عندى بتنور ألوان. وأنت يا عم الأرض بطل تشتغل عطارد ولا عشان عبيط قصدي صغير يعني .
عطارد: إيه ده إيه ده إيه ده؟؟ إنت بتشتغلني يا أرض؟
المريخ: وأقولك ع الكبيرة بقي زحل وأورانوس كمان عندهم السما بتنور ألوان.
عطارد : طب واشمعنا أنا ؟؟ أنا هاقول للشمس عليكم.
المريخ: قولها يا سيدي هي أصلا عارفة.
السما بتنور ألوان
مجموعتنا الشمسية فيها كتير من عجايب الطبيعة اللي بتخطف الأنظار في كل مكان سواء كان على الأرض أو في الميه أو في السماء والفضاء كمان. من أجمل الظواهر دي بقى ظاهرة “الشفق القطبي” الأضواء الملونة اللي بتظهر كإنها بتتحرك بتموجات في السما عند القطبين الشمالي والجنوبي، وبتسحرنا بجمالها وروعتها في سماء كوكبنا.. كوكب الأٍض.
إيه هي الظاهرة دي؟ وليه موجودة؟ وإشمعنى بتبقي موجودة عند القطبين بس؟ هنعرف سوا.
العالم “جاليليو جاليلي” جالنا عشان يجاوب لنا علي الأسئلة دي، وهو واحد من أعظم العلماء في مجال الفلك والفيزيا. جاليليو أطلق علي الظاهره دي اسم الـ”Aurora Borealis”، وهي كلمة لاتينية بمعنى فجر الشمال (dawn of the North) وبتتسمى بالعربي الشفق القطبي. لكن جاليليو أطلق الاسم على الظاهرة وبس، وماقدرش يفسرها.
طيب نحب نشكر الأستاذ جاليليو علي مجهوداته هنا، واستنينا شوية على ما حد ييجي يفسر الظاهرة دي.. شوية كتير! وفعلا ظهر العالم النرويجي “كريستيان بيركلاند”، وهو اللي قدر يفسر ظاهرة الشفق القطبي في السبعينات، حيث إنه كان متخصص في مجال الفيزياء وكرس جزء كبير من حياته لتفسير الشفق القطبي أو الـaurora، وجدير بالذكر إنه اترشح لجائزة نوبل 7 مرات!
جولة عن الشمس
لكن قبل ما نعرف إيه الظاهرة دي، خلينا نروح في جولة سريعة للشمس نعرف بعض المعلومات عنها. الشمس زي ما إحنا عارفين درجة حرارتها عالية جدا، وبيبقي موجود بداخلها معادن سائلة وصلبة. في نواة الشمس درجة الحرارة بتوصل لـ14 مليون درجة، وده بيخليها تخرج طاقة وإشعاعات بتتسمى “solar wind”، والموجات دي بتخرج من الـsun spots أو ما يسمي بالبقع الشمسية، والبقع الشمسية دي بتنتشر في كل اتجاه وومنهم الاتجاه اللي ناحية كوكبنا.
وبما إننا جبنا سيرة كوكبنا.. خلونا برضه نعرف شوية حاجات مهمة عنه بتأثر على ظاهرة الشفق القطبي. كوكب الأرض بيتكون من عدة طبقات درجات حرارتها مختلفة من أول السطح، أو ما يعرف بالقشرة الأرضية اللي بنعيش عليها، لحد مركز الأرض، واللي فيه معادن سائلة درجة حرارتها عالية جدا جدا، وبسبب ده بتكوّن مجال مغناطيسي حوالين كوكب الأرض. المجال ده اسمه “magnetosphere”، وده اللي بيحمي الأرض من الإشعاعات والموجات اللي جاية من الشمس.
نرجع تاني لسؤالنا.. إزاي بتحصل الظاهرة؟
المجال المغناطيسي للأرض بيبقي قوي من الجوانب، وبيضعف ناحية القطبين، وده بيسمح لبعض الالكترونات والأيونات وغيرهم اللي بييجوا بداخل الـ”solar wind”، اللي بتنطلق من البقع الشمسية، إنها تعدي وتقرب في اتجاه الأرض من ناحية القطبين، لكنها بتقابل في طريقها غازات في طبقات الجو، فبتخبط في ذراتها، وساعتها عن طريق إثارة الغازات بيظهر لينا الشفق القطبي بالجمال بتاعه. مدهش مش كده؟
طب هل فيه أكتر من لون للشفق القطبي؟
طبعا، في ألوان مختلفة للشفق القطبي، وده بيختلف علي حسب الارتفاع وعلي حسب نوع الغاز اللي بيشع الألوان.. خلونا نشوف
اللون الأحمر:
الأحمر بيعبر عن غاز الأكسجين، وده معناه إن الالكترونات اصطدمت بغاز الأكسجين الخاص بالأرض علي ارتفاع 150 ميل أو أكتر.
اللون الأخضر:
بيعبر عن غاز الاكسجين برضه، لكن علي ارتفاع أقل من 150 ميل.
اللون الأزرق:
معناه إن غاز النيتروجين هو اللي بيشع اللون، وده بيكون علي ارتفاع 60 ميل أو أقل من سطح الأرض.
اللون البنفسجي والأرجواني:
وده بيمثل غاز النيتروجين برضه، لكن علي ارتفاعات أعلى من 60 ميل من سطح الأرض.
هل ظاهرة الـaurora بتحصل على كواكب تانية غير الأرض؟
أيوه طبعا، مش شفتوا المريخ فضح الدنيا في الخناقة اللي فوق إزاي. خلينا نشوف جمال الظاهرة علي الكواكب التانية بقى..
Jupiter المشترى
Saturn زحل
Uranus اورانوس
*تكملة الخناقة*
الشمس: مين ضايق عطارد؟
المريخ: الأرض هوا اللي ضايق عطارد مش أنا، إيه ده هو راح فين؟
المصادر: how stuff work ,earthsky ,physics.org , nasa
