كتب: أحمد حسين
كلمة التنمر يمكن تكون كلمة جديدة على مسامعنا لكن الفعل نفسه أكيد قابلناه في حياتنا، خصوصًا وإحنا أطفال في تعاملنا مع الأطفال اللي كانوا أقوى أو أكبر أو أكثر عنفًا مننا. لكننا وقتها كنا بنقول عليه افترى أو رخامة أو هزار تقيل، فماكناش نعرف إن له كلمة عالمية بتوصفه كفعل بيحصل ما بين اتنين أو أكتر، وده اللي هنتكلم عنه هنا.
تعريف التنمر ومحاولة فهمه
التنمر هو إن شخص أو أكتر يتسببوا في أذى أو ضرر لشخص آخر غالبًا بيكون أضعف منهم عن قصد، سواء عن طريق الاعتداء اللفظي أو الجسدي أو العاطفي أو التهديد بالتعرض للأذى. غالبًا اللي بيتعرضوا للتنمر بيحسوا بالخوف وماببقدروش يردّوا. ويمكن ده السبب إن ماحدش بيُقدم على التنمر إلا لو كان شخص عنيف ولا يلقى بالًا بمشاعر الآخرين.
ده فكرني زمان بموقف غريب جدًا أنا شخصيا حضرته في المدرسة. زميل معايا في نفس السنة أخته جاية تاخده وتروّح، وهو في الطريق ليها لقى طفل أصغر منه بيلعب كورة، فقرر يقرب منه ويضربه برجله ويشتمه، فالولد خاف جدًا وبص له لفترة وماقدرش يرد. وأنا كمان ماقدرتش أعمل حاجة علشان أولًا هو يعرفني فيعني بتقي شره، ثانيًا علشان ماليش في الخناق وده شبه بلطجي، بس الفكرة بقى إن أخته ضحكت وقالت له: “بطّل رخامة إنت على طول كده”.. وبس.
وده اللي خلّى وقع كلمة التنمر أضعف عندنا، زي بعض البلاد الأخرى اللي مابتقولش عليه لفظ تنمر (Bullying) وبتطلق عليه مسميات تانية بتقلل من حجم المشكلة اللي بيسببها. عكس الولايات المتحدة اللي بتسميه بالاسم ده من فترة طويلة؛ فهنلاقي هناك قوانين ضد التنمر في الـ50 ولاية، وثانيًا إن الأولاد عندهم وعي وعارفين إيه هو التنمر، رغم عدم قدرتهم على وقفه، وده اللي مخليها مثلًا من أكتر البلاد اللي منتشر فيها، لأنه متعرّف.
مافيش أي مبرر أو منطق يخلي طفل يستحق يتعرض للمضايقة عبر سلوكيات غير مقبولة ومدمرة صحيًا ونفسيًا. مش أفضل شيء إننا نبص للتنمر على إنه جزء مؤسف من علاقة البشر ببعضهم لكن هنعمل إيه، مش لازم نستكين ونتقبله، لأنه مؤذي جدًا، مؤذي للشخص اللي بيتنمر واللي بيتم التنمر عليه كمان. إزاي؟ هنعرف سوا في المقال.
أنواع التنمر وأشكاله المختلفة
التنمر له أنواع كتير، أشهرها التنمر المدرسي والتنمر الإلكتروني (اللي البعض بيطلق عليها البلطجة الإلكترونية) والتنمر في العمل، والتنمر على ذوي الاحتياجات الخاصة والتنمر على المختلفين في الجنس والميول الجنسية واللون والدين والعِرق، وكل ما كان الشخص مختلف ويتبع أقلية ما، كل ما كان التنمر عليه أسهل.
أفعال كتير ممكن تدل على التنمر، زي التحرش اللفظي سواء وجهًا لوجه أو عبر التليفون أو الإنترنت، والضرب وشد الشعر، والإغاظة والسخرية، ونشر الشائعات والإخافة والترهيب، وكمان النبذ أو الاستبعاد من الألعاب والأنشطة الاجتماعية. للأفعال دي آثار بتظهر على الطفل اللي تعرص للتنمر.
إزاي أعرف إن ابني بيتعرض للتنمر؟
في بعض العلامات اللي قد تدل على إن الابن أو البنت بيتعرضوا للتنمر في المدرسة ومنها:
- عدم الرغبة في إنه يروح المدرسة.
- الشعور بالإرهاق والصداع أغلب الوقت.
- عدم الراحة.
- القلق.
- العنف تجاه العائلة أو نفسه.
- التبول غير الإرادي.
- الاستيقاظ من النوم في وقت متأخر.
- إنه يضيّع أو يبوظ مقتنياته.
أعمل إيه لو ابني اتعرّض للتنمر؟
لو شكّيت إن ابنك أو بنتك بيتعرضوا للتنمر، حاول ماتتجاهلش الموضوع واتكلم معاهم بهدوء، اشرح له إن التنمر والبلطجة حاجات غير مقبولة، وإنه مش المفروض يتحمله لأي سبب. وبعدها روح المدرسة واتكلم مع أحد المدرسين المسؤولين عن الفصل علشان تقدر تفهم الحكاية وتحلّها. وحاول برضه إنك تكون هادي رغم شعورك بالغضب والعاطفة تجاه ابنك، وبعد أسبوعين روح المدرسة تاني وشوف المدرس عمل إيه في الحكاية واتصرف إزاي.
أما بخصوص الولد، فحاول تعلمه إنه يدافع عن نفسه من غير ما يؤذي غيره، وبعدين حاول تشوف حالته النفسية اتحسنت ولا لأ، لو لسه مفيش تحسّن حاول تروح بيه لطبيب نفسي متخصص للأطفال، علشان يقدر يتعامل معاه في المرحلة دي.
اعرف أكتر| إزاي أحمي طفلي من التحرش الجنسي؟
أعمل إيه بقى لو ابني هو المتنمر؟
ده سؤال مهم جدًا، علشان المتنمر دايمًا، خصوصًا لو طفل، بيُعتبر شرير وبيتقابل بهجوم دائم بسبب تنمره. الطفل المتنمر بيحصل له نفس أعراض المُتنمّر عليه، من قلق وتشوهات نفسية والأمر ممكن يوصل للأفكار الانتحارية كمان. الموضوع يبدو غريب لكنه حقيقي وعشان كده لما تعرف إن ابنك متنمر ماتتجاهلش الموضوع برضه، أو تعاقبه عشان تصرفاته وبعدها تسيبه خلاص.
لازم تتكلم معاه عشان تفهم أو تحاول تفهم منه ليه بيعمل كده مع زمايله. واسأله هل بيمر بفترة صعبة في حياته؟ واسأله عن إذا كان حاسس بإنه مُتجاهل أو ماحدش مهتم بيه، وهل بيقلد حد تاني، أو في حد سواء من زمايله أو من عيلته بيعامله كده، هل ده بيحسسه إنه قوي؟ وتساعده يعرف إزاي يعبّر عن نفسه ويحكي لك لما يعمل حاجة زي دي أو يحس بإنه عايز يعمل كده.
وعلى الجانب الآخر، لازم تفهمه إن السلوك ده غير مقبول، وإنه مش من حقه يتعمل كده مع زمايله بأي شكل من الأشكال، وتشجعه يكون ألطف مع زمايله وأصدقائه، ويحاول يركز على إنه ينمّي علاقته بالناس بدل ما يتنمر عليهم فيبعدوا عنه، ويشوف الموضوع من منظور مختلف سوي وبنّاء ليه قبل أي حد.
اعرف أكتر| اضطراب فرط الحركة ونقص الانتباه .. بين المرض والميزة التطورية!
المصادر: bbc kidshealth pacerkidsagainstbullying
