5 معلومات غريبة عن “جمبري المانتس” الملون القاتل!

كتبت: مها طــه

بعد نجاحي في آخر سنة في الكلية، قرر مجموعة من أصدقائي يحتلفوا بيا، وكان الاحتفال إنهم خدوني على مطعم سمك وجمبري “فظيييع” من وجهة نظرهم طبعًا، لأني وللأسف بوظت عليهم الاحتفال والخروجة أول ما عرفوا إني ممكن آكل أي حاجة في الدنيا إلا السمك والجمبري.

طبعًا اللي بقوله ده قد يثير تساؤلات واحتجاجات البعض، لكن إحنا موجودين يا جماعة والأكل أذواق وكده، فبلاش نضايق بعض. وبحكم دراستي لعلم الحيوان، وفي محاولة لإرضاء محبي الجمبري اللي حقيقي بشوفه كائن مش جميل خالص من حيث الشكل حتى، قررت أعرفكم على نوع تاني خالص من الجمبري لكنه جميل جدًا ومبهر جدًا ومخيف جدًا جدًا.

اعرف أكتر| حيوانات مش فوتوشوب

جمبري المانتس .. القاتل الجميل

صفات زي القاتل والجميل عادةً صعب ترتبط بكائن زي الجمبري، لكنها موجودة في الـ”Mantis Shrimp” جمبري فرس النبي،  اللي لا هو من أنواع الجمبري ولا من أنواع فرس النبي. الكلام يلخبط صح، لكن صدقني عزيزي القارئ لسة هتشوف مفاجآت كتير مع هذا الكائن العجيب.

• جمبري المانتس مش جمبري

بينتمي لشعبة مفصليات الأرجل وبالطبع هو من القشريات لكنه في التصنيف بيتحط تحت فئة خاصة بيه اسمها “فميات الأرجل – Stomatopod” والمعروف منه لحد دلوقتي حوالي 500 نوع. النوع ده بيعيش بين الصخور وفي الشعاب المرجانية في قاع المحيط الهادي والهندي، وبيعتبر واحد من الكائنات العدوانية بشدة، وبيساعده على كدة وجود زوائد في رجليه الأمامية عند منطقة الصدر، واللي بيستخدمها في صراعاته مع الكائنات التانية.

• هجوم أسرع من الطلقة

مبدئيًا طول جمبري المانتس في الأغلب حوالي 10 سم، لكن في بعض الأنواع القليلة منه بتوصل لحوالي 38 سم، لكنه مع ذلك ممكن تعتبره واحد من أقوى الحيوانات في العالم. فاكرين الزوائد اللي اتكلمنا عليها، الزوائد دي شبه الكورة، وبيستخدمها الجمبري في ضرب الفرائس بقوة تعادل قوة رصاصة خارجة من بندقية عيار 22!

الزوائد اللي بيستخدمها الجمبري في الضرب بتعمل بشكل شبه القوس والسهم، قوتين عكس بعض في اتجاهين مختلفين بينتج عنهم اندفاع للزوائد دي بسرعة 80 كم/الساعة، وبقوة تصل لـ2500 ضعف وزن الجمبري، يعني لو الإنسان بمتوسط وزنه قدر يوصل للقوة والسرعة دي في قبضته ممكن يكسر الفولاذ بسهولة.

القوة المذهلة دي مهمة جدًا عشان جمبري المانتس يقدر يتعامل مع الفرائس اللي معظمها جسمها بيكون متغطي بصدفة أو هيكل خارجي قوي زي سرطانات البحر والمحارات وغيرها.

• هيكل مقاوم للصدمات

وعشان الجمبري يقدر يضرب بالقوة دي وفي نفس الوقت الزوائد ما تتكسرش، بيتمتع بتركيب جزيئي من نوع خاص ومختلف تمامًا عن أي حيوان تاني على وجه الأرض، التركيب ده اسمه ” bouligand”، وده بيمنع الشقوق الصغيرة اللي بتحصل نتيجة الاحتكاك والضرب من إنها تتوسع وتبقى كسر واضح، وده طبعًا بيسمح له يضرب زي ما يضرب لكن عمره ما يتكسر.

• صاحب الرؤية السوبر

بجانب ألوانه المدهشة، فهذا الجمبري صاحب العيون الملونة البارزة مش بس بيتمتع بعيون مميزة من حيث الشكل، لكنها كمان مميزة من حيث إنها صاحبة رؤية قوية جدًا. كل عين من عيونه بتحتوي على 12 نوع من مستقبلات الضوء اللي بتقدر تحدد كتير من طيف الألوان.

وعشان نفهم أكتر خلينا نقارنه بالإنسان، عين الإنسان بتحتوي على 3 أنواع بس من مستقبلات الضوء الحساسة لرؤية اللون الأحمر والأزرق والأخضر بس، تخيلوا بقى إن كل الألوان اللي بنشوفها دي بنقدر نميزها بتلات أنواع بس، يبقى هو بيشوف إيه؟!

اعرف أكتر| عمى الألوان: ليه الأهلى والاتحاد السكندري لابسين زي بعض؟!!

الحقيقة جمبري المانتس زيه زي كل القشريات، مابيقدرش يفرق أوي بين درجات الألوان المختلفة، ومش مهتم بالخناقة ما بين البينك الفاتح والأبيض العاجي دي خالص، لكن برضه ده لا يمنع إن قدرات الرؤية عنده مختلفة ومذهلة.

عين جمبري المانتس بتشتغل شبه القمر الصناعي، بتنقل كل المعلومات البصرية الموجودة حواليه في البيئة بسرعة للمخ، فيشوفها من غير ما المخ يحتاج يعمل معالجة للصور دي، وبالتالي هو بيستجيب بسرعة جدًا مع اللي شايفه، ده غير طبعًا إن عينهم البارزة والمتحركة بتسمع بمجال رؤية أوسع من كائنات تانية كتير، وده برضة بيساعده يبقى صياد ممتاز.

• جمبري المانتس أقدم من الديناصورات على الأرض

“فميات الأرجل” اللي بينتمي ليها جمبري المانتس، تطورت بشكل مستقل عن الأنواع التانية من القشريات من حوالي 400 مليون سنة، يعني قبل ظهور الديناصورات بحوالي 170 سنة، ومن وقتها ولحد دلوقتي، فضل جمبري المانتس يتطور بشكل مستقل وفريد من نوعه، واحتفظ لنفسه بكتير من الخصائص المميزة اللي خلته يحتل مكانة خاصة جدًا في قائمة الحيوانات الأكثر غرابة على وجه الأرض.

دول مجرد 5 معلومات مثيرة للاهتمام  من وسط معلومات غيرها أكتر وأكتر عن كائن بديع الشكل قوي البنية زي جمبري المانتس واللي أكيد هنتكلم عنهم في مقالات جاية.

المصادر:  factslegend  amnh  ranker mantisshrimp  aqua  thesprucepets