حيّ يرزق

محتار تجيب إيه لبلكونتك من معرض زهور الربيع؟ إحنا هنقولك

كتبت: مها طــه

بدايةً من يوم 21 مارس ولحد أول مايو بتستقبل حديقة الأورمان للنباتات معرض زهور الربيع كل سنة. وطبعًا مش محتاجين نوصف مدى جمال المكان بكل ما فيه من شجر وورد وبهجة مالية المكان وراسمة لوحة بأجمل ألوان الطبيعة والنباتات. بس تروح هناك تحتار وتتوه ويفضل لك بقى السؤال بتاع ممكن يا ترى اشتري إيه واعتني بيه إزاي؟

معرض زهور الربيع .. شوف الزهور واتعلم

في معرض الزهور، هتلاقي قدامك اختيارات كتير أوي، ولذلك لازم تكون من الأول عارف ومحدد إنت محتاج إيه وتسأل نفسك شوية أسئلة زي:

  • هل المكان اللي هتحط فيه الزرع داخلي “ظل” ولا خارجي “نور”؟
  • ولو خارجي هل هو جنينة ولا بلكونة؟
  • طب الميزانية بتاعتك هتكون في حدود قد إيه؟
  • وماتنساش كمان تفكر في هل هيكون عندك وقت للعناية بالنبات، ولا مشغول شوية وبالتالي محتاج نبات سهل الاعتناء بيه.
صورة من معرض الزهور – تصوير: أحمد حامد

بعد ما تسأل كل ده وتحدد، ييجي وقت إنك تاخد فكرة وتشتري بكره 😀 بس اللفة هتكون عندنا الأول مش في المعرض. هناخدك في جولة سريعة تقدر فيها تحدد اللي محتاجه بناءًا على إجابات أسئلتك فوق وبمنتهى البساطة من غير ما تتوه أو تحتار.

النباتات في المعرض بتتقسم لعدد من الأنواع على حسب الاحتياجات، ودي هنعرفها مع بعض حالا بالتفاصيل.

الزهور والورود:

ودي أنواعها كتيرة ومختلفة، لكن بيجمعها كلها حاجة واحدة بس، وهي عملية الإزهار نفسها. العملية دي مرهقة للنبات. وبالتالي بتستهلك طاقة كبيرة، وبتحتاج للري والعناية والتسميد عشان النبات ياخد كل العناصر اللي محتاج لها وبزيادة كمان عشان عملية الإثمار اللي بتحصل بعد كده. ده كله بيخلي عملية العناية بالنباتات الزهرية صعبة وخصوصًا لو شاريها لبلكونة مش جنينة.

زهور البيتونيا – تصوير: احمد حامد

وعلى الرغم من جمال الزهور إلا إن عمرها قصير بالكتير شهرين من دلوقتي ومش هتلاقيها لأنها نباتات موسمية. لذلك لو مش هتعرف تعتني بيها وبتحبها يبقى الأحسن إنك تشتري بوكيه جميل من أي مكان كل فترة، أما لو بتحبها وهتقدر تعتني بيها يبقى نسمع أم كلثوم في الخلفية و”شوف الزهور واتعلم بين الحبايب تتكلم”. من أشهر أنواع الزهور الموجودة في المعرض: الورد الناري والبيبي روز والجاردينا والبيتونيا.

أنواع مختلفة من الزهور منها البيبي روز والأحمر الناري على اليسار/ صورة: آية المرسي

النباتات الطبية والعطرية:

ودي من أجمل النباتات الموجودة في المعرض، هتلاقيها حواليك في كل مكان هناك، ولو أنت من أنصار النباتات المستديمة اللي بتعيش مدد طويلة – مع العناية بيها طبعًا من ري وتسميد– يبقى الأنسب ليك هو النباتات الطبية والعطرية. أما عن فوايدها فحدث ولا حرج، ودي قائمة بأشهر أنواع النباتات الطبية والعطرية في المعرض:

  • نبات اللوري: وده طبعًا لا يخلو منه مطبخ مصري، وبيستخدم كنوع من البهارات اللي بتضاف عشان تدي ريحة وطعم قوي، والزيت المستخرج من ثمار نبات اللوري (الغار) بيستخدم في صناعة الصابون الطبيعي.
  • النعناع: غني عن التعريف. ليه أنواع مختلفة في المعرض زي النعناع البلدي والنعناع السعودي والسوري وروح النعناع. وطبعًا لو اتكلمنا عن فوايده فهو من أقوى النباتات العطرية من حيث قوة الرائحة، ده غير إن له استخدامات في المطبخ عن طريق دخوله في عدد من الوصفات الشهيرة. بالإضافة لاستخداماته الطبية في حالات مختلفة، منها: اضطرابات المرارة وتسكين المغص المعوي وآلام الحيض وطرد الغازات.

    نعناع – – تصوير: آية المرسي
  • الريحان: من النباتات الجميلة اللي بتستخدم كتير في عدد من وصفات الأكل نظرًا لريحته الحلوة وبالذات مع صلصة المكرونة، وبالإضافة لكده فالريحان ممكن يكون مفيد في حالات طبية معينة في حالة إضافته للأكل أو أكله بشكل مباشر، زي تقليل التشنجات وفتح الشهية، ده غير إنه طارد للريح ومفيد في حالات المغص وعسر الهضم، ومدر للبول.
    أما خارجيًا ممكن استخدام خلاصة الريحان في علاج حب الشباب وتخفيف أثر لسعات الحشرات ولدغات التعابين والتهابات الجلد، ولو بتعاني من مشكلة مع الناموس فزيت الريحان ممكن يبقى حل كويس جدًا عشان تبعد عنك الناموس.

    الريحان – تصوير: آية المرسي
  • اللافندر: وده من أجمل النباتات العطرية من حيث الشكل والريحة طبعًا. من أشهر استخدامات اللافندر استخدامه في مجالات التجميل والعناية بالبشرة، ده غير استخداماته في بعض المخبوزات والأغذية. زيت اللافندر له خصائص مضادة للالتهابات وبيساهم في تقليل آثار الحروق ولسعات الحشرات، ده غير استخداماته المحتملة في تقليل التوتر والأرق وعدم الشعور بالراحة عن طريق استخدامه في المساج وغيره.
  • نبات العِطر أو العطرشان: وده من أجمل النباتات العطرية الموجودة في المعرض، العطرشان (الجيرانيوم) له أثر في تقليل الالتهابات وتسكين الألم عن طريق تناوله زي الشاي، ده غير بعض الخصائص المضادة للجراثيم والمطهرة، وبيخفف من أعراض التهاب الجيوب الأنفية.

    عطرشان (جيرانيوم) – تصوير: أحمد حامد
  • الزعتر: وده طبعًا من أجمل المنكهات الموجودة في معظم المطابخ وبالذات مع وصفات المكرونة المختلفة. ده غير إن له أثر محتمل في تقليل الضغط، وفي تحسين المناعة، وأحيانًا بيستخدم زيت الزعتر المستخرج من الأوراق في حالات علاج السعال (الكحة).

الصبارات:

النوع التالت والأخير في مقالنا هنا هو الصبار. طبعًا الصبار من أكثر النباتات المعروفة بإنها بتحتاج لعناية أقل شوية وممكن تتسقي كل 3 أيام لأسبوع _حسب حاجة التربة_ لو في الصيف، وكل 10 أيام أو أكتر في الشتاء. وطبعًا أشهر استخدامات الصبار بتيجي مع صبار الألوفيرا اللي بيستخدم في العناية بالشعر والبشرة.

الصبارات ليها أنواع كتير أوي المعروف منها لحد دلوقتي حوالي 1750 نوع، وبتتنوع أشكالها وألوانها، منها المزهر ومنها اللي له أشواك واضحة، لكنها في النهاية من أجمل النباتات اللي هتلاقيها في المعرض واللي ممكن تستحمل شوية الجو الحار وقلة المياه وتعيش معاك عمر طويل.

أشكال مختلفة لزرع الصبار/ صورة: أحمد حامد

الغريب بقى إن على الرغم من انتشار أنواع كتير من الصبارات في المعرض، إلا إن النوع الأكثر انتشارًا هناك وبيتباع على إنه صبار هو نبات “الفربيون أو شوكة المسيح”. وده واحد من أجمل النباتات الموجودة في المعرض، وبيشترك هو والصبار في كونهم من النباتات الشوكية المزهرة. وفي معتقدات شعبية بيعتقد البعض بإن الفربيون هو النبات اللي اتاخدت أشواكه عشان تتعمل تاج على راس المسيح في الأحداث اللي سبقت حادثة الصلب الشهيرة، ومن هنا جت تسمية “شوكة المسيح”.

نبات شوكة المسيح – تصوير: أحمد حامد
نبات شوكة المسيح – تصوير: أحمد حامد

طبعًا دي كلها نباتات محتاجة شمس وري وتسميد، عشان تقدر تكمل وتعيش معاك وبالذات المستديم منها. العناية بكل نبات بتكون على  حسب نوعه. فلازم وإنت بتشتري تسأل البيّاع عن سقاية الزرع أو عملية الري تكون كل قد إيه؟ كمان ممكن تعتمد في البيت على لمسك ورؤيتك للتربة، هل التربة رطبة ولا جافة والأوراق كذلك، وبكده تقدر تعرف هل النبات محتاج للري ولا لأ. كمان تسأله محتاج تسميد ولا لأ، ولو أه فتحط كمية قد إيه. وغالبا التسميد أمره سهل، بيكون شبه المكملات الغذائية بتدوبها مع مية الري بتاعت الزرع وإنت بتسقيه.

وطبعا كل النباتات اللي اتكلمنا عنها هنا نباتات خارجية محتاجة شمس، تنفع في جنينة أو في بلكونة.  لكن لو ده مش متاح، فعليك وعلى نباتات الظل، ودي هتلاقي فيها تنوعات كبيرة جدًا أشكال وألوان تقدر تختار منها اللي يعجبك وحسب ميزانيتك.

أسعار النباتات والورود في معرض الزهور بتتحدد حسب النوع والحجم وقصريات الزرع، وبتبدأ من أقل من عشرة جنيه ومعاك وإنت طالع. لما تروح المعرض هتستمتعوا بكل جمال الربيع وهتلاقي أنواع كتيييييييرة تانية غير اللي قلناها واللي تصلح لجنينة البيت والحدايق زي نباتات الأسوار وغيرها لحد مختلف أنواع الأشجار زي أشجار الموالح مثلا وأنواع النخيل المختلفة.

وماتنسوش لما تروحوا هنا تقولوا لنا اشتريتوا إيه، ولو عندكم أي سؤال ابعتوا لنا.


المصادر: organicfacts  gardeningknowhow medicalnewstoday  healthline medicalnewstoday gardeniapfaf  rhs

الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق