هجص بلدي

اكسترا كاتشب؟ لا شكرًا، يستحسن بلاش

كتب: أحمد حسين

الكاتشب من الأساسيات اللي صاحبت انتشار مطاعم الأكل السريع، تقريبًا كدة مفيش وجبة بتتقدم في المطاعم دي إلا ومعاها طبق البطاطس المحمرة المعتبر والكاتشب كجزء أساسي من الوجبة نفسها. ومع حب الأطفال الشديد للنوع ده من الوجبات وانتشار المطاعم اللي بتتنافس على تقديمها، بدأت تتغير فكرة الأهالي تجاه النوع ده من الأكل، وخصوصًا مع خروج الأم والأب للشغل يوميًا والحياة اللي بقت صعبة لدرجة لا تسمح بإننا نعمل أكل جديد كل يوم وبالتالي الوجبات السريعة أسهل حل.

صورة: iStock

ولذلك زاد معدل تناول الأطفال للكاتشب بشكل واضح، لكن بين فترة والتانية بتظهر وتنتشر تحذيرات عن أضرار الكاتشب، وطبعًا الكلام زادت عليه شوية تحابيش من اللي بنحبها دي وبالغ بعض الناس لدرجة إنهم وصفوا الكاتشاب بالطاعون اللي هيقضي على صحتنا وصحة أولادنا وربطوا ما بين تناول الكاتشب واصابة الأطفال بالتوحد. معقولة الكاتشب مضر للدرجة دي؟

اعرف أكتر| أواني الطهي: معادلة صعبة بين الصحة والراحة

علاقة الكاتشاب بالتوحُّد

بشكل واضح مفيش أي علاقة بين الكاتشب والتوحد، لأن التوحد في الأساس اضطراب بيصيب أجزاء معينة من المخ، وبالتالي بيعمل تأخر في بعض المهارات الخاصة بالتواصل/التخاطب، وبييب الأطفال من وقت الولادة وممكن يكتشف قبل ما الطفل يتم 3 سنين. كل مكونات الكاتشب لا يمكن يكون ليها علاقة باضطراب معقد بالشكل ده.

من ضمن العلامات اللي بتدل على التوحد مثلًا إن في أطفال رُضّع بيصابوا بالتوحد عند الولادة ولا يمكن طبعًأ يكون السبب إن الأم مثلًا أكلت كاتشب في فترة الحمل، وبعض الأطفال كمان بيتطور عندهم التوحد في سن مبكر أوي يمكن سنة أو أقل شوية وبيبقوا مش قادرين على التواصل والاستجابة للأصوات والاشارات وتعابير الوجه المختلفة، ولا يمكن يكونوا الأطفال دول أكلوا كاتشب في السن ده ولا حتى يعرفوه.

الجدير بالذكر كمان، إنه بالبحث عن العلاقة بين التوحد والكاتشب لقينا مقالات كتير بتتكلم عن حب بعض الأطفال المصابين بالتوحد للكاتشاب لدرجة إن بعضهم بيحط الكاتشب على كل أنواع الأكل المختلفة، وده طبعًا اسلوك مفيش خلاف على كونه مضر، لكنه برضة مش دليل كافي عشان نقول إن الكاتشب له علاقة بالتوحد.

الكاتشاب؛ ما بين مُحسنات الطعم والخل المعدّل جينيًا

وعشان نتطمن أكتر خلونا نتكلم أكتر عن المكونات الأساسية للكاتشب، وهي عبارة عن طماطم وثوم وبصل وخل صناعي ومُحسنات طعم وملح. جميل، إيه بقى ممكن يبقى مضر في كل الحاجات دي؟

أولًا: مُحسنات الطعم، ودي غالبًا بتكون سكر سائل، وتحديدًا سكر فراكتوز، وغالبًا بيكون بكميات كبيرة جدًا (High-fructose corn syrup). بالمناسبة، سكر الفراكتوز برضة بيدخل في صناعة المياه الغازية بسبب طعمه الحلو، فهل تناوله بكميات كبيرة مضر للصحة؟

طبعًا معروف إن تناول أي حاجة تقريبًا بكميات كبيرة أكيد مش هيكون مفيد. بعض التقارير اللي اتكلمت عن الكاتشب تناولت فكرة إن الكاتشاب بيحتوي على نسبة عالية جدًا من سكر الفراكتوز، وتناوله بكميات كبيرة مضر بالصحة، ويتسبب في الإصابة بأمراض خطيرة زي السمنة المفرطة، والسكر، وارتفاع مستويات الدهون وبعض الأمراض التانية اللي ممكن تؤدي في النهاية لخطر الإصابة بأمراض القلب.

كمية السكر في عبوة الكاتشب – صورة: YouTube

وعشان كل اللي فات ده، حذرت الجمعية الأمريكية للقلب من تناول السكر (الفراكتوز) بكمية أكبر من 6 ملاعق شاي للسيدات و9 للرجال. والمشكلة هنا تكمن في إننا مش عارفين بالضبط كمية الفراكتوز اللي بتتحط في مكونات زجاجات/أكياس الكاتشب.

اعرف أكتر|الملون الغذائي E120: وفيها إيه لما ناخده من الحشرات؟!

ثانيًا: الخل المُعدّل جينيًا، واللي تسبب في جدل كبير سنة 2014، لما رفعت سيدة أمريكية قضية على واحدة من الشركات المشهورة جدًا في صناعة الكاتشب عشان بيستخدموا الخل المعدل جينيًا ضمن مكونات الكاتشب، وبالمناسبة استخدام المواد الغذائية والفاكهة والخضراوات المعدلة جينيًا يعتبر أمر قانوني ومفيش عقوبة لاستخدامه طالما كان بضوابط محددة وبعد الموافقة عليه من الجهات المختصة بعد الخضوع لعدد من الاختبارات.

على مدار أكتر من 15 سنة، استهلك عدد كبير من البشر ملايين المحاصيل والمواد الغذائية اللي تم تعديلها جينيًا، من غير ما يكون في أي آثار ضارة (أو قضايا قانونية تتعلق بصحة الإنسان). لكن، في دراسة نُشرت سنة 1999 أشارت لإن ممكن يكون في بعض الأدلة غير المؤكدة عن إن الغذاء المُعدّل وراثيًا ممكن يكون سام، لكن ولحد اللحظة دي مظهرش أي كلام يأكد الأدلة دي.

الكاتشاب؛ مش بيقدم.. بس ممكن يأخّر

على الرغم من إن منظمة الأدوية والأغذية الأمريكية (FDA) ولحد دلوقتي مصدرش عنها أي تحذير مباشر من تناول الكاتشب، إلا إن كتير من المواقع الطبية حذرت من تناوله بكميات كبيرة مش بس عشان اللي قوناه عن سكر الفراكتوز لكن كمان لأن الكاتشب عادةً مرتبط بالوجبات السريعة اللي هي أصلًا خطيرة وبتحتوي على كميات كبيرة من الزيوت المهدرجة والدهون وممكن تؤدي لمشاكل صحية خطيرة.

صورة: shutterstock

اعرف أكتر| إدمان الوجبات السريعة .. سيب الساندوتش اللي في إيدك وركز معايا

في النهاية، الكاتشب مالوش أي فوايد غذائية بالمرة، لأنه لا بيحتوي على بروتينات ولا فيتامينات ولا معادن مفيدة للجسم، وبالتالي أكله مش هيضيف للجسم أي شئ مفيد، لكن وفي نفس الوقت الكتير منه ممكن يكون مضر وبالذات لو مع أكل أصلًا مضر، ممكن نخاف من الكاتشب ونقلل منه لكن مفيش أي داعي للرعب وتصديق الاشاعات.


المصادر: mayoclinic  drhyman  ncbi  webmd  ncbi

الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق