10 كورسات علمية مدهشة أون لاين ومجانًا

كتبت : مها طه

العلم والمعرفة هي الحاجة اللي بيسعى ليها الإنسان طول الوقت، اكتساب الخبرات بالنسبة لأي حد هو الأساس عشان نحقق أهدافنا، وإنت رايح تقدم لوظيفة بيسألوك على خبراتك، وإنت بتتعامل فى الحياة لازم يكون عندك مهارات وعلم عشان تفهم كل حاجة، طبعًا حاليًا التعليم بقى ممل جدًا، خصوصًا فى عصر الإنترنت والسوشيال ميديا اللي من خلالهم تقدر توصل للمعلومة وإنت قاعد مكانك، والبركة فى عمهم كلهم ”جوجل“ ربنا يخليهولنا يارب. هنا بقى هنقدم لكم 10 كورسات علمية مدهشة جدًا الحقيقة، وأونلاين يعني وإنت قاعد فى مكانك وكمان مجانية.

الكورسات دي مُقدمة من edx.org، وهي عبارة عن سلسلة من المحاضرات اللطيفة جدًا والمسلية فى نفس الوقت، واللي هتمدك بقدر كبير من المعلومات ومجموعة كاملة من المواد العلمية المدهشة، فإذا كنت شغوف بالمعرفة وبتحب العلوم، فأنا متأكدة إنه على الأقل فى واحد من الكورسات دي هيشبع شغفك، أما لو مش بتحب العلوم، فالكورسات دي كفيلة تخليك تغير وجهة نظرك عنها.

1.تشريح الإنسان:

عمرك فكرت يعني إيه جلطة؟ سألت نفسك ليه فى ناس كتير فى العالم يمكن مئات الآلاف من البشر بيموتوا سنويًا بسبب جلطة، لو حابب تتعرف أكتر وتفهم عن جسم الإنسان من الناحية التشريحية، هتلاقى فى الكورس ده، وصف تشريحي للجلطة، مُقدم فى شكل فيديوهات و محاضرات، بيقوم بيها مجموعة من الأساتذة الزائرين. ادخل على اللينك من هنا:
https://www.edx.org/course/human-anatomy-hkpolyux-ana101x-0#!

2. من جودارد لأبوللو: تاريخ الصواريخ، الجزء الأول:

كلنا تقريبًا عارفين أول ناس مشيوا على القمر، لكن الحقيقة إن معظمنا مايعرفش عن الرواد فى التاريخ الحديث فى عالم الصواريخ، وإزاي عبقريتهم جذبت انتباه الجيش الألماني، ولو إنت محتاج أو مهتم تعرف أكتر عن كل مداخل علم الصواريخ، هتلاقي فى الكورس ده كل اللى محتاجه. https://www.edx.org/course/goddard-apollo-history-rockets-part-1-ieeex-atg1-x-0#!

3. أعظم أسرار الكون التى لم تُحل

كلنا ومع إثبات كلام آينشتاين عن وجود موجات الجاذبية، ومع كل تغيير بيحصل فى علم الفيزياء الفلكية، وبيتبعه تغير فى علم الفلك، بنبدأ نحاول نفهم بشكل أوضح، وضعنا فى الكون، وإزاي الكون من حوالينا ماشي، إيه هو قوانينه، والحقيقة إنه بالذات علم الفلك، واكتشاف الكون بيُعتبر من أكتر الحاجات اللى بتستهوي عدد كبير من الناس، لو إنت منهم، وحابب تعرف أكتر عن أسرار هذا الكون الفسيح، وألغازه اللى لسه ملهاش حل، أنصحك بشدة بالكورس ده.
https://www.edx.org/course/greatest-unsolved-mysteries-universe-anux-anu-astro1x-2

4. مُقدمة فى علم الكومبيوتر

طبعًا مش محتاجين نتكلم عن أهمية الكومبيوتر فى حياتنا، حياتك كلها الكومبيوتر بيحتل جزء مهم جدًا منها، فى الشغل فى البيت، وحتى لما مر بمراحل تطور، عملنا سمارت فون أو الهاتف الذكي اللي من خلاله بتقدر تدخل على النت بكل سهولة وماتقدرش تستغنى عنه في أغلب الوقت، الكورس ده فيه مبادئ العلم ده، عشان تقدر تتعامل مع الجهاز الأهم فى حياتك وتفهمه. https://www.edx.org/course/introduction-computer-science-harvardx-cs50x

5. علم السعادة:

كلنا في حالة بحث طول الوقت عن السعادة، السعادة دلوقتي بقي ليها علم، بمساعدة مجموعة من أساتذة الطب النفسي، تم تطوير الكورس ده، عشان يخلينا نقدر نتعامل مع الحياة بشكل أفضل، ونحاول نحصل على السعادة، من خلال تعاملنا مع الأشخاص والأحداث حوالينا، وعلى فكرة ده مش كورس تنمية بشرية، ده فعليًا كورس علمي قايم على علم النفس، وعلم المخ والأعصاب، أنصحكم بيه. https://www.edx.org/course/science-happiness-uc-berkeleyx-gg101x-2#!

6. الفيزياء الفلكية: استكشاف الكواكب الخارجية

علم الفلك والفيزياء الفلكية من أكتر العلوم المثيرة فى هذا الكون، محاولات فهم الكون أصلًا مستمرة طول الوقت وكل يوم فيها جدد بنكتشفه، الكورس ده هيخليك تقدر تستكشف حدود هذا الفضاء العملاق فى الكون الواسع، اللى عمال يتمدد بينا ده، ومن خلاله هتقدر تعرف سلوك العوالم الغريبة البعيدة عننا، ومحاولة استكشافها.
https://www.edx.org/course/astrophysics-exploring-exoplanets-anux-anu-astro2x-1#!

7. إنكار تغير المناخ

فى الحقيقة وبالرغم من تصديق المجتمع العلمي كله بشكل كبير لظاهرة تغيُر المناخ، واللي بقت فى جهود كبيرة لتفاديها أو على الأقل تقليل آثارها الكبيرة، لكن في بعض الحملات هتحاول تضللك من ناحية الموضوع ده، ويقولولك إن ده مجرد كلام وراه أغراض، الكورس ده هيسلّحك بالمنطق العلمي، اللى يخليك تفهم عن المناخ، وتغيراته اللى حصلت أو ممكن تحصل.
https://www.edx.org/course/making-sense-climate-science-denial-uqx-denial101x-0#!

8. كلية الجبر وحل المسائل:

لو حضرتك من الأشخاص اللي بيحبوا الجبر والرياضيات، وبتستمتع بحل المسائل الصعبة، ولأن حل مسائل الرياضيات من أفضل الممارسات العقلية ولأنك برضه ممكن تنساها، فلو محتاج كورس فى الجبر على المستوى الجامعي، أوعدك إنك فى الكورس ده هتلاقي اللي تحبه وزيادة، استمتعوا يا عشاق الرياضيات.
https://www.edx.org/course/college-algebra-problem-solving-asux-mat1179. كيمياء الحياة:

إزاي يعني كيمياء الحياة، إزاي علم الكيمياء بيتحول لعلم أحياء؟، السؤال ده من أهم الأسئلة فى العالم لكن الإجابة عليه هى اللى بتكشف عن أصل الحياة على الأرض ويمكن كمان فى الكواكب التانية والمجموعة الشمسية، الكورس ده هيساعدك تفهم الطريق اللى مشي فيه العلماء عشان يوصلوا لفهم الرابط العمثير بين الكيمياء وعلم الأحياء، أنصحكم بيه لأنه مُدهش فعلًا إنك تعرف إن كلنا عبارة عن شوية تفاعلات كيميائية. https://www.edx.org/course/chemistry-life-kyotoux-001x-1#!

10. مُقدمة فى سلوك الحيوان:

البشر فى الاساس هما قمة التطور الحيواني، والحقيقة إن محاولة الفهم الأعمق للسلوك الحيواني، هو اللي بيوصلنا لفهم السلوك البشري لأنه من الناحية التصنيفية الإنسان بيتم تصنيفه على قمة مملكة الحيوان من حيث التطور، السلوك الحيواني هو اللي بيفسر التواصل والتعاطف بين الحيوانات، وكمان التصرفات الدفاعية والهجومية، وبيجاوب على الأسئلة اللي من نوع، هل الرئيسيات بس هي اللى عندها مجتمعات، ولا كمان الطيور والكائنات البحرية؟، ليه الحيوان المعين بيعمل السلوك ده فى اللحظة دى ومش فى أى لحظة تانية؟ وهكذا، الكورس ده جميل لفهم الطبيعة بشكل أكبر.
https://www.edx.org/course/introduction-animal-behaviour-wageningenx-ab101x

المصدر

iflscience.com- free online courses