حبيبي ”سكر“ مر طعم الهوى: عن مرض السكري نتحدث!
كتبت : مها طه
الفنان فارس كرم كان بيقول في أغنيته ”أكل الحلو بيحلى لي والحلو كله قبالي، يلعن أبو السكري“، وبما إن موضوعنا عن مرض السكر، فأنا مقدرة أزمة إن يبقى طبق الرز باللبن على يمينك وبعبع السكر على شمالك، وعليه معلش يا جماعة مضطرين مع بعض نيجي على نفسنا في الحلو شوية.
السكري أو مرض السكر يعتبر من أكتر الأمراض المألوفة والشائعة عندنا لدرجة ممكن تخلي بعض الناس تستهين بيه، وناس تانية على الجانب الآخر ما تحاولش تعرف أكتر عنه بشكل دقيق وتكتفي بالمعلومات المتداولة بين الناس وخلاص، رغم إن مرض السكر من الأمراض المرتبطة بسلوكياتنا الغذائية واستهلاكنا اليومي للأكل والشرب وده اللي هنحاول نتناوله النهاردة عملًا بمبدأ الوقاية خير من العلاج.
مرض السكري مرض أيضي … يعني إيه ”أيضي“؟!
مرض السكر بيُصنف كمرض أيضي، بمعنى إنه مرض مُتعلق بعملية التمثيل الغذائى، بينتُج عن خلل فى التفاعلات الكيميائية _اللي بتحصل فى جسمنا_ المسئولة عن عملية التمثيل الغذائي دي، واللي بتشتغل على المواد الغذائية اللي بتدخل الجسم عن طريق الإنزيمات بهدف الحصول منها على الطاقه اللازمة لكل العمليات الحيوية.
مرض السكر معناه ارتفاع نسبة السكر فى الدم لمدة طويلة، أشهر أعراضه كثرة التبول، الشعور بالعطش و الجوع. إهمال مرض السكر ممكن يؤدي لأعراض خطيره زي الدخول فى غيبوبه سكر، إذا زاد إهمال مرض السكر على المدى الطويل، ده ممكن يؤدى لأمراض القلب والأوعية الدموية والسكتة الدماغية والفشل الكلوي المُزمن وقُرح القدم واحتمالية فقدان البصر.
إيه دور ”الأنسولين“ في تنظيم مستوى السكر في الدم؟
قبل ما نفهم أسباب مرض السكر لازم نعرف إزاى الجسم السليم بينظم مستوى السكر فى الدم ويحافظ عليه فى معدلاته الطبيعى (80 لـ120 مجم لكل 100مللي دم).
الإنسان فى أكله بيدخل لجسمه مواد كتيرة (كربوهيدرات، دهون، بروتينات و غيرها)، بيبدأ كل جزء فى الجهاز الهضمي بهضم مواد معينة وتخزينها أو حرقها على حسب حاجة الجسم. جسم الإنسان بيستخدم السكر فى الدم كمصدر للطاقة.
البنكرياس هو العضو المسئول عن إفراز هرمون ”الإنسولين“، وهو الهرمون المسئول عن التمثيل الغذائي للكربوهيدرات والدهون عن طريق امتصاص سكر الدم ”الجلوكوز“ من الدم والعضلات والهيكل العظمى والأنسجة الدهنية، وهو اللي بيقوم بتخزين الدهون فى الجسم بدال ما يستخدمها كمصدر للطاقة فى الجسم، بالإضافة إلى أنه بيمنع إنتاج الجلوكوز من الكبد.
الجزء الموجود فى البنكرياس والمسئول عن إفراز ”الإنسولين“ خلايا اسمها ”خلايا بيتا“، ودي موجودة فى جزء يُسمى بـ”جزر لانجرهانز“.
إيه هى أنواع مرض السكر؟
الأول خلينا نقول ببساطة إن مرض السكر سببه الرئيسي إما إن البنكرياس لا يُنتج الإنسولين بشكل كافي أو إن خلايا الجسم لا تستجيب للإنسولين المُنتج.
مرض السكري له 3 أنواع:
1. النوع الأول – Type 1 Diabetes: بينتُج عنه فشل ”خلايا بيتـا“ الموجودة فى البنكرياس فى إنتاج الإنسولين. المرضى المصابين بالنوع ده بيعتمدوا بشكل أساسي على جرعات الإنسولين عن طريق الحقن. النوع ده بيكون سببه وراثي ناتج عن خلل في إنتاج جين الإنسولين أو بيكون ناتج عن خلل في الجهاز المناعي للجسم، بحيث تبدأ خلايا الجسم المناعية تهاجم خلايا الجسم وتتعامل معاها كأنها أجسام غريبة.
2. النوع التاني – Type 2 Diabetes: النوع اللي فيه خلايا جسم المريض بترفض الاستجابة لتأثير الإنسولين اللى بيفرزه البنكرياس بشكل طبيعي، والمرضى المصابين بالنوع ده لا يعتمدوا على جرعات إنسولين خارجيه لكن بيتم علاجهم بأنواع من الأدويه اللى بتحفز استجابة الخلايا للإنسولين.
مع تطور النوع ده من المرض ممكن يبدأ إفراز الإنسولين يقل فعليًا، وفي الحالة دي بيضطر يلجأ المريض لجرعات الإنسولين. السبب الرئيسى فى الإصابه بالنوع ده هو زيادة الوزن بشكل كبير، والعادات الغذائية الخاطئة _أكل السكريات والدهون والكربوهيدرات بكميات كبيرة_ وقلة الحركة والرياضة.
3. سكر الحمل: وهو ارتفاع مستوى السكر فى الدم عند سيدة حامل لكنها قبل الحمل كانت غير مصابة بالمرض، وغالبًا بيتم الشفاء منه بمجرد الولادة.
المشروبات الغازية عدوك الأخطر!
فى سنة 2014 تقريبًا كان عدد المصابين بمرض السكر على مستوى العالم حوالى 387 مليون شخص، 90% منهم مصابين بالنوع التانى. وفي خلال السنتين دول وصل عدد المصابين بيه لـ422 مليون مصاب، أغلبهم من البلاد النامية.
السكر مرض يمكن التعايش معاه عن طريق أخذ جرعات الإنسولين أو الأدوية بانتظام _على حسب نوع السكر_ وممارسة الرياضة والالتزام بنظام غذائي صحي متوازن. طبقًا لدراسة قامت بيها ”الكلية الإمبريالية فى لندن“، شُرب علبة واحدة فى اليوم من أي مشروب غازي بتزود احتمالية الإصابة بمرض السكر من النوع التاني بنسبة 22% !
وبالتالي بدأ العلماء فى اعتبار المشروبات الغازية أحد الأسباب الرئيسية _بالإضافة لزيادة الوزن وقلة الحركة_ للإصابة بمرض السكر، كما إن احتمالات الإصابه بالنوع الثانى من مرض السكر بتزيد مع التقدم فى العمر.
عمرك سمعت عن شخص أُصيب بالسكر بسبب ”الحزن“؟
الحقيقة إنه مش بس الحزن ممكن يكون سبب للإصابة بالسكر_النوع الثاني_، أى نوع من أنواع الضغط العصبي ممكن تؤدي للإصابة بمرض السكر لأن الجسم فى حالات الضغط العصبي بيفرز هرمونات بتزود من مستوى السكر فى الدم عشان يقدر يوفر الطاقة اللى محتاجها الجسم فى الحالات دي _عشان تتخانق مثلًا أو عشان تقدر تهرب من مكان فى خطر مُعين على حسب الموقف بقى_.
الجسم السليم بيبقى عنده طرق للحفاظ على المعدلات الطبيعية للسكر فى الدم ، إنما فى الأشخاص اللي عندهم استعداد للإصابة أصلًا بمرض السكر فممكن يرتفع مستوى السكر عن الحد الطبيعي، وبالتالي يُصاب بمرض السكر.
العلم كل يوم بيحاول يوصل لاكتشافات كتيرة تفيد فى علاج مرض السكر أو القضاء عليه بشكل نهائي سواء عن طريق عمليات زراعة البنكرياس أو غيرها من الطرق اللى بيكتشفها العلماء، وطبعًا كل ما كان التقدم فى الأبحاث دي أكبر، كل ما كان من الممكن شفاء عدد أكبر من مرضى السكر واللى بيعانوا من الأعراض اللي ممكن يؤدي ليها المرض ده.
المصادر: who pancreapedia books.google thelancet medicalnewstoday webmd
