متلازمة ”القلب المكسور“: أنا حزين يا بومبا وقلبي زعلان!

كتبت: يارا كمال

عارفين انتوا جو حسن مصطفى في مسرحية ”العيال كبرت“، و”قلبي .. قلبي .. قلبي“، بغض النظر عن إن ”رمضان السكري“ كان بيتسلبط، بس ممكن حد بسبب ضغط جامد نتيجة حدث شديد  يصيبه حاجة شبيهة بالأزمة القلبية، اسمها ”متلازمة القلب المكسور“. عارفين لما حد يقول لك فلان ده قلبه اتكسر؟

متلازمة القلب المكسور عبارة عن فشل في عضلة القلب  بيحصل معاه اضطراب في ضخ القلب للدم وممكن انقباضاته تكون أقوى شوية، والفشل ده بيكون شديد بس مؤقت وبيتعالج عادي. وزي الأزمة القلبية، المريض بيحس بوجع في صدره وضيق تنفّس، بس الفرق بين متلازمة القلب المكسور والأزمة القلبية إن الأزمة القلبية بيكون فيها انسداد كلي أو شبه كلي في شريان تاجي. في متلازمة القلب المكسور، الشرايين التاجية مابتبقاش مسدودة، بس تدفق الدم ممكن يقل في شرايين القلب.

ممكن متلازمة القلب المكسور تحصل لو حصل حدث مادي أو عاطفي شديد زي موت حد بتحبه، أو حد عرف إنه مريض بمرض خطير أو واحد أفلس مثلًا، أو حد انفصل عن زوجته، أو اتعرّض لحادثة، أو حتى حد عمل له حفلة مفاجأة عشان عيد ميلاده. على فكرة، فيه دراسة اتنشرت في (European Heart Journal) مارس اللي فات، بتقول إن الأحداث السعيدة والمشاعر الإيجابية ممكن تسبب المتلازمة دي برضه. كمان فيه عقارات بتسبب الحالة دي زي الإيبفرين أو الأدرينالين، وده لعلاج للحساسية الشديدة أو لنوبات الربو الحادة، وزي الدولوكستين اللي اللي بيعالج مشاكل الأعصاب اللي بتصيب مرضى السكر، أو بيعالج الاكتئاب، والفينلافاكسين اللي بيعالج الاكتئاب برضه، والليفوثيروكسين اللي بياخدوه الناس اللي الغدة الدرقية عندهم مش شغّالة كويس.

تقريبًا اللي بيسبب المتلازمة دي هو رد فعل القلب تجاه اندفاع هرمونات التوتر.

المشكلة دي أول مرة تتعرف أو يتبلّغ عنها كان سنة 1990 في اليابان، وسموها (Takotsubo cardiomyopathy)، اللي هو الفخ اللي بيتعمل للأخطبوط واللي يشبه الزلعة كده، وده لإن نتيجة المتلازمة دي البطين الأيسر بينتفخ وبيبقى شبه الفخ ده.

عمومًا المتلازمة دي نادرًا ما بتبقى قاتلة، وأغلب اللي بيصابوا بيها بيخفّوا منها على طول، ومابيبقاش ليها آثار طويلة المدى، بس ده لا يمنع إن ممكن يكون ليها مضاعفات زي اضطراب نبض القلب، وضغط الدم الواطي، وتراكم السوايل على الرئتين (pulmonary edema).

عشان الطبيب يعرف يفرّق بين المتلازمة والأزمة القلبية بيحتاج يعمل الفحص البدني العادي، ويعرف تاريخك، ويا ترى أنت حسيت قبل كده بأعراض أمراض القلب، وهل اتعرضت لضغط شديد قبل ما تحس بأعراضها. كمان هيحتاج رسم قلب (Electrocardiogram)عشان يشوف لو أي حاجة مختلفة في ضربات القلب وتركيبه، وأشعة إكس على الصدر و تخطيط صدى القلب، اللي بنسميه إيكو على القلب (Echocardiogram)، عشان يعرف إذا كان القلب متضخّم أو فيه أي شكل يدل على متلازمة القلب المكسور.

وكمان تحاليل الدم بتبيّن لو فيه إنزيمات معينة زيادة في الدم واللي بيدل على إصابة المريض بالمتلازمة. ده غير إن صورة الأوعية التاجية بتساعد في التشخيص، لإنه في المتلازمة دي زي ما قلنا مفيش شرايين تاجية بتكون مسدودة، على عكس الأزمات القلبية.

وعشان احنا جنس لطيف وسينتيمنتال خالص، الستات بيكونوا أكثر عُرضة للمتلازمة دي من الرجالة بكتير، يعني معظم الستات اللي فوق الخمسين عُرضة ليها، فلو المدام قالت لك ”ليه مابقتش تفاجئني زي زمان؟“ ما تفكرش تسمع كلامها، لإنها ممكن تفرفر في إيدك.

المصادر:

nhlbi.nih  mayoclinic.org   mayoclinic.org2

mayoclinic.org6   mayoclinic.org3   mayoclinic.org4

mayoclinic.org5  health.harvard   livescience