قمرالدين .. أبو قرش بقى بقرشين!
كتبت: يارا كمال
صديقتي مها اللي معانا في الموقع سألتني: إيه اللي يخلي المشمش لما يتجفف لفته توصل لحاجة وتلاتين جنيه؟ أظن الموضوع مالوش دعوة بالتجفيف، قد ما له دعوة بفكرة العرض والطلب، وإنه عشان مطلوب، فسعره يغلى. وفيه سؤال وجيه برضه سأله أحمد أمين: يا ترى ليه المشمش لما بيتجفف بيسموه قمرالدين؟ دخل الإسلام مثلًا؟
هو إيه الفرق بين إن الفاكهة تبقى مجففة وإنها تبقى عادية؟
كريستينا ستارك، أخصائية التغذية بجامعة كورنيل، بتقول إنه بشكل عام الفرق الأساسي هو إن إخراج جزء من الميه من الفاكهة من خلال التجفيف بيركّز جواها المواد المغذّية والسعرات الحرارية، يعني فيها عيب وميزة. يعني لو أنت بتبذل مجهود ومحتاج سعرات حرارية كتير تقدر تخزنها في جسمك، هيبقى تجفيف الفاكهة ميزة بالنسبة لك، بس لو بتحاول تخس، هيبقى عيب.
ده غير إن فيه عناصر مغذية في الفاكهة بتبقى حسّاسة للحرارة المستخدمة في عملية التجفيف زي فيتامين سي مثلًا. وعمومًا بيفضّل إنك تاكل كوباتين من الفاكهة الطازة في اليوم، ويفضّل لو كانت أنواع متنوعة من الفاكهة، ونص كوباية من الفاكهة المجففة تساوي كوباية من الفاكهة العادية. ظبّطها أنت بقى.
يعني مثلًا بالنسبة للمشمش، الكوباية منه طازة ومتقطّع أنصاص فيها 86% ميه، وفيها 74 سعر حراري، أما الكوباية من قمر الدين أو المشمش المجفف بيبقى فيها 76% ميه و212 سعر حراري. ده الكلام ده وهو متجفف بس، مش محطوط له حاجة، ومع العلم إن قمر الدين بيتحط له سكر أو شراب جلوكوز، واخد لي بالك.
بس برضه المشمش الطازة بيبقى فيه 3.1 جرام ألياف، في حين إن المجفف فيه 6.5 جرام، والطازة فيه 0.6 جرام ملليجرام حديد والمجفف فيه 2.35 ملليجرام. وعلى الجانب الآخر، الطازة فيه 15.5 ملليجرام فيتامين سي والمجفف فيه 0.8 ملليجرام بس، عشان الحرارة اللي بتستخدم في التجفيف زي ما قلنا.
طيب بشكل عام بقى المشمش مفيد في إيه؟
المشمش فيه فيتامين أ، وصحيح الفيتامين أ مهم للرؤية الطبيعية، لكن هو كمان مهم لأداء الجهاز المناعي والتكاثر والحفاظ على صحة الجلد والأسنان والهيكل العظمي والأنسجة الرخوة. كمان المشمش مصدر مهم للبوتاسيوم واللي بيحافظ على توازن السوايل في جسمنا وبيساعد في وظيفة العضلات وتنظيم ضربات القلب، وبيحسّن الهضم وقوة العضم.
الحصول على كميات كافية من البوتاسيوم كل يوم بيساعد في الحفاظ على ضغط دم طبيعي وبيقلل خطر الإصابة بالسكتة الدماغية. المفروض في المتوسط الشخص البالغ يحصل على 4700 ملليجرام من البوتاسيوم في اليوم، وكوباية مشمش متقطّع شرايح بتمدنا بـ 427 ملليجرام بوتاسيوم من احتياجنا اليومي.
بالنسبة بقى للألياف، فالمشمش غني بالألياف القابلة للذوبان، اللي بتحافظ على مستويات صحيّة من الجلوكوز والكوليسترول في الدم. ومن المحبّذ إن الستات اللي عمرهم 50 سنة أو أقل ياخدوا 25 جرام من الألياف في اليوم، والرجالة اللي في السن ده برضه، ياخدوا 38 جرام في اليوم.
يعني شقاك ما راحش هدر يا أبو العيال أهوه، وقمر الدين طلع مفيد، بس طبعًا مانقدرش ننسى المشاكل الصحية اللي هتجيلك نتيجة الفلوس الكتير اللي دفعتها في قمر الدين وكل تحابيش رمضان.
المصادر: nytimes medicaldaily
