.
نوّرها

البيوبلاستيك: مش كل حاجة أولها «بيو» تبقى حلوة!

كتبت: يارا كمال

شفت قبل كده صور لأمعاء الأسماك والطيور البحرية وهي محشية صفايح مياه غازية وأكياس بلاستيك وورق شوكولاتة؟ حاجة بشعة. المشكلة إن البلاستيك مابيتحللش وبالتالي هيفضل موجود، وللأسف مابنستغناش عنه.

كل سنة، الولايات المتحدة بتنتج 34 مليون طن من المخلفات البلاستيكية، و7% منها بس هي اللي بيتم تدويرها. في 2010، 8 مليون طن من المخلفات البلاستيكية انتهي بيها المطاف من الدول الساحلية للمحيط. وفي المحيط الهادي الشمالي، السمك بياكل 24 ألف طن بلاستيك كل سنة.

البيوبلاستيك
صورة: الإنترنت

اعرف أكتر عن: كائنات بتقرقش البلاستيك أو العكس!

طب نعمل إيه؟

بسيطة. إحنا نعمل بلاستيك بيتحلل. هأأو .. قديمة. اتعملت عادي. فين بقى المشكلة؟ أنا أقول لك عشان الموضوع كبير.

سمعت قبل كده عن حاجة اسمها «بيوبلاستيك»؟! طبعًا إحنا أي حاجة بتبدأ بـ«بيو» بتبقى سمعتها كويسة عندنا باعتبارها صديقة للبيئة، زي الـ«Biofuel» كده – اللي هو الوقود الحيوي-، بس في الحقيقة، مش بالضرورة إن ده اللي يحصل.

المفترض إن البيوبلاستيك صديق للبيئة لإنه قابل للتحلل، وأثناء عملية التصنيع بيصدر عنه غازات احتباس حراري أقل من اللي بتطلع من عملية تصنيع البلاستيك التقليدي. كمان البيوبلاستيك مفيهوش (bisphenol A (BPA، ودي المادة الكيماوية اللي بيقال إنها بتسبب اضطرابات هرمونية، واللي بتحتوي عليها بعض البلاستيكات التقليدية.

البيوبلاستيك هو البلاستيك المستمد من النباتات، في حين إن أغلب البلاستيكات بتبدأ من المنتجات الثانوية الكيماوية لتكرير البترول واللي بتتحوّل لمجموعة متنوعة من البلاستيكات من خلال عمليات كيماوية بتكوّن سلاسل جزيئية اسمها البوليمرات، وهي اللي بتدّي البلاستيك الهيكل بتاعه.

صورة: biofuelsdigest

أما البيوبلاستيك، فممكن يتعمل من سكر القصب والذرة ومن المنتجات الثانوية للنباتات زي لحاء الخشب وقشور الذرة. وشركة «بيبسي» بتحاول تدمج كمان قشور البطاطس والبرتقان في صناعة البيوبلاستيك. التبن كمان مصدر هايل للبيوبلاستيك، لإنه بينمو في أي حتة وبسرعة وبيقاوم الجفاف، زائد إنه مش مصدر طعام أساسي، وبالتالي استخدامه مش هيأثر عن مواردنا الغذائية ولا على سعر الأكل.

البيوبلاستيك أنواع ومش كله زي بعض

البيوبلاستيك ظهر من عقود فاتت، لما «هنري فورد» عمل أجزاء من قطع غيار العربية موديل تي من زيوت الذرة وفول الصويا. فيه أنواع من البيوبلاستيك بتختلف في مدى قابليتها للتحلل. فيه نوع اسمه «عديد حمض اللبنيك -أو اللاكتيك» (polylactic acid (PLA، وده بيكلف المصنّع حوالي 20% أكتر من البلاستيك المعتمد على البترول.

النوع التاني اسمه (polyhydroxyalkanoate (PHA، وبيتحلل بسهولة أكتر بس تمنه أغلى بأكتر من ضعف تمن البلاستيك العادي. النوعين دول من البيوبلاستيك بيتعملوا من سكر الدرة المتخمر، والاتنين ميزتهم إننا لو اتخلصنا منهم بطريقة سليمة، هيتحللوا ومش هيفضلوا موجودين آلاف السنين في مقالب الزبالة ويبقى مصيرهم في الآخر المحيط، ثم بطون الأسماك. وفيه شركات بتحاول تعمل عديد حمض اللبنيك من التبن والبطاطس والطحالب.

كمان شركة كوكاكولا عاملة مشروع اسمه «PlantBottle» قايم على إنهم يعملوا الأزايز البلاستيك بتاعتهم اعتمادًا على النباتات بنسبة 30%. الأزايز دي بتبقى معمولة من بولي إيثيلين تيرفثالات (polyethylene terephthalate (PET، وهو نفس نوع البلاستيك اللي بينتج اعتمادًا على البترول، لكن 30% منه بيبقى جاي من إيثانول السكر البرازيلي.

صورة: packagingnews

أحادي إيثيلين الجليكول اللي بينتج عن العملية دي مابيغيّرش التركيبة الكيماوية النهائية للبلاستيك. بالرغم من إن البلاستيك ده مصنوع جزئيًا من مصدر متجدد بدل الوقود الحفري، لكن الأزايز دي مابتتحللش.

وفيه باحثين من جامعة هارفارد طوّروا بيوبلاستيك قابل للتحلل بعزل مادة اسمها «كيتوزان» من قشر الجمبري وبروتين الفيبروين اللي موجود في الحرير، والنوع ده بيتحلل بوضعه في السماد بحيث ينتج سماد غني بالنيتروجين. النوع ده بقى بيتحلل بشكل كامل وخلال أسابيع ومش غالي.

اعرف أكتر عن: دودة الريد ويجلر قد تربيها في غرفة نومك! كيف ولماذا؟ 

بالنسبة بقى للـPHA، فبالرغم من إنه غالي أوي زي ما قلنا، إلا إنه بيستحمل الحرارة العالية وممكن يتحلل ويرجع للطبيعة. بس لو مقلب الزبالة مش متهوي، مش هيتحلل زيه زي البلاستيك العادي. فيه أنواع مابتتحللش أصلًا بشكل كامل، والعملية نفسها بتاخد سنين، وكمان التحلل بينتج مواد كيماوية سامة.

فيه أنواع تانية بتتحلل لما بتتحوّل لسماد، وده في الغالب هيحتاج عمليات صناعية لتحويله. وتحليل البيوبلاستيك بيطلّع ميثان، وده غاز من غازات الاحتباس الحراري مضر أكتر من ثاني أكسيد الكربون، يعني اللي خدناه باليمين في عمليات الصناعة، بنرجعه بالشمال في تحلل البيوبلاستيك.

فيه مشكلة كمان الـPLA مانقدرش نفرقه عن البلاستيك العادي، فلما نيجي نعمل لهم تدوير الاتنين مع بعض، الجودة بتاعتهم هتقل، وبالتالي لازم نفصلهم عشان نقلل التلف اللي هيحصل في النوعين. أحيانًا بيفكّروا يعملوا للبيوبلاستيك لون مميز عشان يفرزوه عن البلاستيك العادي أثناء التدوير، وأحيانًا بيدّوا البيوبلاستيك لأماكن بعينيها بحيث تعتمد بشكل كامل عليه، وبالتالي لما ييجوا يدوّروا البلاستيك منها، يتعاملوا على إنه كله بيوبلاستيك زي مستشفيات أو فنادق أو كافيتريات معينة.

هي محاولة للهروب من المشاكل اللي بتسببها البلاستيكات للبيئة، وطبعًا هو بيقلل استهلاكنا للبترول، بس زي ما قلنا هو مابيتحللش بالسهولة اللي احنا متخيلينها.


المصادر:  howstuffworks  time  harvard.edu  howstuffworks2 nationalgeographic

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى