في الدايت خلي بالك من عضلاتك

كتبت: يارا كمال

سعادتك ممكن تكون في يوم من الأيام وقفت وقفة مع نفسك، بعد ما وقفت على الميزان واتصدمت في وزنك، ولقيت إن الموضوع لا يمكن السكوت عليه وقررت تعمل ريجيم أو دايت كما يطلقوا عليه حديثًا عشان تقلل وزنك.

طب إنت عارف إيه اللي هيقل في وزنك؟ يعني إيه الحاجة اللي لما تقل في جسمك، وزنك كله يقل؟

شوف. أنت لو هتستهلك سعرات حرارية أكتر من اللي أنت بتحصل عليه في الأكل، جسمك هيبدأ يسحب اللي يلزمه من مصدرين: دهون الجسم والعضلات. يعني لما بينقص وزنك (لو ماحسبناش الميه)، أغلب الوزن اللي هتفقده ده هيكون دهون، بس حوالي تلته أو أكتر بيكون عضلات.

إيه بقى المشكلة في فقدان العضلات ؟

المشكلة إن العضلات هي اللي بتحرق السعرات، فكل مايبقى عندك عضلات أقل، كل ما معدل التمثيل الغذائي يقل. ده عشان نحققه محتاجين نظام أكل فيه جرعة بروتين عالية ومعاه ممارسة تمرينات رياضية كتير.

الفكرة إن الأحماض الأمينية اللي موجودة في البروتين بتساعد النسيج العضلي إنه يحافظ على نفسه وينمو كمان. فيه دراسات كتير اقترحت إن الدايت اللي فيه سعرات حرارية قليلة بس فيه بروتين عالي، بيؤدي لفقدان أقل للعضلات من الدايت اللي فيه نفس السعرات بس ببروتين أقل.

علماء جامعة ماكماستر جمعوا 40 شاب عندهم زيادة في الوزن، واللي كان عندهم استعداد يلتزموا بنظام شديد لفقدان الوزن، وقسّموهم فريقين.

الفريقين بدأوا نظام غذائي قللوا فيه السعرات الحرارية بنسبة حوالي 40%. الفريق الأول كان نظامه الغذائي بيتكون من حوالي 15% بروتين، 35% دهون، و50% كربوهيدرات. أما الفريق التاني، فدول هياخدوا 15% دهون و35% بروتين، يعني حوالي 3 أضعاف اللي حصة البروتين الموصى بيها في التغذية عند أغلب الناس.

بعدين خلوا الفريقين يعملوا تمارين شديدة 6 أيام في الأسبوع، واستمروا على نظام الأكل ده والتمارين دي 4 أسابيع.

كل الرجالة في المجموعتين نزل وزنهم من خمسة كيلوجرام خمسة كيلو ونص كده في المتوسط، بس الفكرة بقى في تركيبة الوزن اللي فقدوه ده، يعني المجموعة اللي الدايت بتاعهم فيه نسبة بروتين عالية اكتسبوا ييجي 1.3 كيلوجرام عضلات، بس بما إن وزنهم نقص قد المجموعة التانية، فده معناه إنهم فقدوا دهون أكتر.

ده غير إن التمارين معروفة بإنها بتبني العضلات، فحتى المجموعة اللي بتاكل بروتين أقل، فقدت عضلات أقل بسبب التمارين.

المهم في آخر الشهر اللي عملوا فيه التجربة، المجموعتين فيصوا خالص، ومابقاش فيه أي حد عايز يكمّل، بسبب الدايت القاسي والتمارين الشديدة. وبالتالي الباحثين بيحاولوا يوصلوا لنظام واقعي أكتر ويقدر اللي ماشي عليه يكمل فيه، وكمان هيشتغلوا مع متطوعات من الإناث، ويجربوا معاهم برضه إعادة تقسيم عناصر الأكل.

يعني من الآخر لو نسبة البروتين اللي بتاخدها في أكلك أقل من 10% أو 15%، فأنت في الغالب محتاج تستبدل نسبة من السعرات الحرارية اللي بتاخدها من الدهون اللي بتتناولها في أكلك بسعرات حرارية بتاخدها من البروتين، ده غير إنك محتاج تمارين طبعًا.

ومن هنا، لازم نأكّد على فكرة إن هي مش مسألة عدد سعرات وخلاص، لإن فيه كذا حاجة لازم ناخدها في الاعتبار جنب العدد، وعشان تعرف معلومات أكتر، اقرا موضوعنا: احسب الكالوري بالكيلو يطلع لك الوزن في الساعة!

المصادر:  blogs.nytimes  sciencedaily