ده فيه أوميجا 3 .. والله؟ طيب!
كتبت: يارا كمال
لما بتفرج على الإعلانات وبشوفهم بيقولوا الشامبو ده بزيت الكوكو واوا واللي بيساعد على إطالة الشعر، والأكلة اللي بتحتوي على حبوب المش عارف إيه مسئولة عن انتعاش الذاكرة، وبحس إنه بيتضحك عليا بمصطلحات غريبة، وإنهم بيألفوا كلام ياكلوا بعقل أمثالي بيه حلاوة. من المواد اللي كانت بتتذكر كتير برضه الكام سنة اللي فاتوا الأوميجا 3. بس لما شفتهم بيتكلموا عنه في البرامج الطبية وفي الجرايد، قلت أكيد ده شيء حقيقي.
إيه هو الأوميجا 3 ؟
الأوميجا 3 هي مجموعة من الأحماض الدهنية اللي جسم الإنسان بيحتاجها بس مايقدرش يصنعها بنفسه، ولازم ياخدها من الأكل. ليه بيحتاجها بقى؟ لإنها جزء لا يتجزأ من غشاء الخلايا في الجسم، ولإنها بتأثّر على وظيفة مستقبلات الخلايا اللي في الغشاء ده. الأحماض دي هي نقطة البداية في صناعة الهرمونات اللي بتنظّم تجلط الدم وتقلص واسترخاء جدران الشرايين والالتهاب.
الأوميجا 3 بتساعد في تجنب مرض القلب والسكتة الدماغية، كمان بتساعد نبضات القلب على إنها تبقى منتظمة، وبتقلل ضغط الدم وبتخفف الالتهاب، وليها دور في تحسين تصلب الشرايين. زائد إنها بتلعب دور حاسم في وظايف المخ وأداؤه وفي الذاكرة، والنمو الطبيعي. الأوميجا 3 بتزوّد مستوى الكوليسترول الكويس في الدم.
وكمان بتساعد على التحكم في مرض الذئبة (وده مرض مزمن، بيهاجم فيه الجهاز المناعي أنسجة وأعضاء جسم المريض) والإكزيما والتهاب المفاصل الروماتويدي، زائد إنها بتلعب دور في الحماية من السرطان.
كمان الأطفال اللي مابيحصلوش من أمهاتهم أثناء الحمل على الأوميجا 3، بيتعرّضوا لخطر الإصابة بمشاكل في الأعصاب وفي النظر. ده غير إنها بتزوّد مستوى الكالسيوم في العضم وبتقويه. الأوميجا 3 كمان بتحسّن من أعراض الاكتئاب والشيزوفيرنيا.
فيه دراسة اتعملت على 42 ست، توصلت لإن الستات اللي أخدوا مكملات غذائية بتحتوي على زيوت السمك، آلام الدورة الشهرية عندهم كانت أقل.
من أعراض نقص الأوميجا 3: الإجهاد والذاكرة الضعيفة والجلد الجاف ومشاكل القلب والتقلبات المزاجية أو الاكتئاب والدورة الدموية الضعيفة.
لكن مع ذلك فيه ناس ماينفعش ياخدوا أوميجا 3 كتير زي الناس اللي عندهم اضطرابات في النزيف أو بياخدوا أدوية سيولة الدم زي أقراص الأسبوسيد، عشان الجرعات الكبيرة من الأوميجا 3 ممكن تزوّد خطر النزيف. كمان الناس اللي مصابين بمرض السكر نوع 2، المفروض ماياخدوش مكملات غذائية بتحتوي على زيوت الأسماك إلا تحت إشراف الدكتور.
دهون الأوميجا 3 هي عيلة من الدهون المتعددة غير المشبعة، بس الـ3 الأساسيين هما حمض الإيكوسابنتانويك (Eicosapentaenoic acid) (EPA) وحمض الدوكوساهيكسانويك (docosahexaenoic acid) (DHA)، ودول بيبقوا موجودين في الأسماك بشكل أساسي، وحمض ألفا لينوليك (ALA)، وده موجود في الزيوت النباتية والمكسرات وخصوصًا عين الجمل، وبذور الكتان وزيتها، والخضروات الورقية وبعض الدهون الحيوانية.
فالصراحة أنا تأكدت يعني إن الأوميجا 3 دي مش حاجة خرافية ولا هي حاجة خزعبلية يعرفها أبناء الطبقات الراقية بس.
المصادر:
