الودان بتطرقع في الغويط
كتبت: يارا كمال
احنا داخلين على الصيف أهوه، ربنا يسوقه بالسلامة، وهتيجي بقى أيام المصايف والعوم والبلبطة، وأنت وأصحابك تقعدوا تتنافسوا مين اللي هيغوّط في البحر أكتر. بعد ما تعمل العملة دي وتنزل في عمق كبير شوية، بتحس إن ودنك بتوجعك وإنها بتعمل صوت طرقعة خفيفة كده. يا ترى يا عمهم إيه سبب الوجع وصوت الطرقعة ده عبارة عن إيه؟
تعالى ناخد رحلة سريعة كده، جوه ودانك في حاجة اسمها القناة السمعية، في آخر القناة دي طبلة الأذن، ودي عبارة عن حتة جلد رفيعة مشدودة في نهاية القناة زي ما الطبلة بتبقى مشدودة كده. الناحية التانية من الطبلة بيبقى فيه مساحة فاضية ومجوفة ومليانة هوا، اسمها الأذن الوسطى. المفروض إن الهوا اللي موجود في القناة السمعية يبقى ليه نفس ضغط الهوا اللي موجود في الأذن الوسطى، وبالتالي طبلة الأذن يبقى عليها نفس الضغط من الناحيتين وده طبعًا وضع مريح جدًا ليها لإنها مش مشدودة في أي اتجاه.
عشان الأذن الوسطى تفضل محافظة على ضغط الهوا فيها، فيه قناة اسمها قناة استكايوس (Eustachian tube)، ودي بتوصل الأذن الوسطى بالحلق. الهوا يقدر يدخل ويخرج من القناة دي، بحيث إن ضغط الهوا اللي جوا الأذن الوسطى يبقى مساوي لضغط الهوا الخارجي.
أنت لما بتعوم على عمق، بيبقى عندك كمان ضغط الميه. ضغط الهوا على سطح البحر بيساوي 1.034 كيلوجرام في السنتيمتر. كل ما نغوّط متر في الميه الضغط بيزيد 0.099 كيلوجرام في السنتيمتر. يعني لو نزلنا حوالي 3 متر في الميه، ضغط الميه هيكون حوالي 0.302 كيلوجرام في السنتيمتر، يعني لو زودنا عليه ضغط الهوا، هيبقى 1.336 كيلوجرام في السنتيمتر.
لو قناة استاكيوس اتقفلت أو ضاقت لأي سبب، هتبقى الأذن الوسطى عاملة زي أوضة مقفولة. المفروض إن ضغط الهوا اللي في الأذن الوسطى بيساوي 1.034 كيلوجرام في السنتيمتر، اللي هو الضغط عند سطح البحر. لو أنت بتعوم في منطقة غويطة (يعني مثلًا لو بتعوم في بيسين في الجزء العميق بتاع 3 متر)، فالميه تبقى بتضغط على القناة السمعية بـ 1.336 كيلوجرام في السنتيمتر، يعني طبلة الأذن بتتقوّس لجوة بسبب فرق الضغط. وعشان طبلة الأذن مليانة أعصاب، التقوّس ده بيسبب ألم.
حل المشكلة إنك تحاول تعادل الضغط اللي بره جسمك وجوه الأذن الوسطى. لو ابتديت تحس بألم في ودانك، سد مناخيرك وحاول تدخّل النفس لجوه. ساعتها هتحس إن ودانك بتعمل صوت طرقعة خفيف كده وإن الألم بيروح لأنك بكده إنت بتزوّد ضغط الهوا في الرئتين والحلق، وبعدين الهوا يدخل من قناة أستاكيوس للأذن الوسطى ويعادل الضغط.
لما تطلع بقى على السطح، الأذن الوسطى هيبقى الضغط فيها زيادة، ساعتها قناة أستاكيوس هتطلّع الهوا وتخفف الضغط لوحدها. لو ده ماحصلش، حاول تتاوب عشان ده هيفتح قناة أستاكيوس.
الكلام ده نقدر نطبقه على فرق الضغط اللي بيحصل لما بتطلع أو تنزل في أسانسير سريع أو لما تركب طيارة ولما تنزل منها. وأنت طالع الضغط بيقل، فقناة أستاكيوس هتظبط الضغط لوحدها، وأنت نازل، الضغط هيزيد، فحاول تدخّل النفس لجوه أو تتاوب أو تمضغ لبان.
اأخيرًا، ستمتعوا بغوص وطيران سعيد.
المصدر
