وحدات القياس: من دقيقة نيويورك للسنة الضوئية!
كتب: أحمد حسين
كل شيء في الدنيا وله مقياس أو اللي بنطلق عليه وحدة القياس. الوزن والطول والمسافة والارتفاع والسن والزمن وغيرهم ليهم وحدة قياس. كل وحدة قياس من دول ليها علاقة بالتانية بشكلٍ ما، يعني الوقت والمسافة، ليهم علاقة وثيقة ببعض، يعني مثلًا إنت بتتأخر على الشغل أو الجامعة علشان نزلت متأخر والمسافة كانت كبيرة وهكذا بقى.
في بعض المسافات والأوزان مثلًا، مابيتقاسوش بالكيلو والمتر والثانية لذلك خلال التاريخ والزمن، اخترعنا بعض الوحدات اللي تخلينا نقدر نقيس هذه المسافات والأوزان دي:
-السنة الضوئية:
السنة الضوئية وحدة قياس بتستخدم لقياس المسافة في الفضاء. بيتم تحديدها بالمسافة اللي يقدر شُعاع الضوء يسافر بيها في سنة واحدة (مسافة بتكون تقريبًا 9.46 مليار كيلومتر).
-الميل البحري:
الميل البحري بيساوي تقريبًا 1.15 ميل (1.85 كيلومتر). بيتم تحديدها عن طريق محيط الكرة الأرضية، وبتساوي دقيقة واحدة من خط العرض. بتستخدم في الملاحة الجوّية والبحرية.
-العُقدة:
العُقدة هي وحدة قياس السرعة بتساوي 1 ميل بحري في الساعة. في الأساس، البحّارة كانوا بيستخدموا عُقد الحبل في خطوط سجل السفينة (Log Lines)، وهي بكره كده فيها خيط علشان يقيسوا بيها سرعة السفينة عن طريق الميّه.
-فرلنج:
الفرلنج، وحدة قياس بتساوي 660 قدم أو 201.16 متر. الكلمة بتستخدم بشكل حر تمامًا، بمعنى ”حرث واحد“. وفي الأساس، هي بتشير إلى المسافة اللي يقدر يقطعها الثور في الحرث الواحد.
-الفدّان:
الفدّان بيساوي 43,560 قدم مُربع، يعني حوالي 4,046 متر مُربع. في الأساس، الفدان بيتوصف بيه المساحة اللي بيقطعها زوج من الثيران في الحرث اليومي.
-فترة الـ14 ليلة (Fortnight):
الفترة دي ببساطة هي فترة الأسبوعين. الكلمة مشتقة من الكلمة الإنجليزية القديمة (Feowertyne Niht)، واللي معناها 14 ليلة.
-اللحظة/لمح البصر (Jiffy):
الكلمة دي ليها معنى مزدوج. في الأساس هي وحدة قياس الزمن في الإلكترونيات والكمبيوترات والفيزياء. أما في بداية القرن الـ18، فكانت بتستخدم بين الحرامية بمعنى البرق.
-دستة الخبّاز (Baker’s Dozen):
دستة الخبّاز عددها 13، مش 12 زي الدستة العادية. في أنجلترا، وتحديدًا في القرون الوسطى، لما كان خبّاز يدي الباقي ناقص لأحد زباينه، كان ممكن يُعاقب بالضرب أو بإنه يدخل السجن. فعلشان يهربوا من الموضوع ده، كانوا بيضيفوا رغيف زيادة على الدستة. تقدروا تقولوا شيء كده زي ”خد بالباقي لبان“.
-دقيقة نيويورك (New York Minute):
دقيقة نيويورك هي اللحظة. ودي وحدة قياس اتعملت كتريقة أو سخرية بين الناس كده، عن الوقت اللي بيكون بين تحوّل لون الإشارة للاخضر، وبين إن سوّاق التاكسي اللي وراك يزمّر أو يدي كلاكس.
-الهز (Shake):
الهز أو الاهتزاز، هي وحدة قياس غير رسمية بتستخدم في الفيزياء، كوصف لقياس الـ10 نانوثانية. الوحدة القياسية دي في الأساس اشتُقت من الجملة اللي بتقول ”كهزتين من ذيل الخروف – in two shakes of a Lamb’s tail“. آه والله زي ما بقول لكم كده!
المصدر:
