العادة السرية؛ المسكوت عنه المرغوب فيه!
كتب: أحمد حسين
-1-
في المدرسة، كنا قاعدين كأي مجموعة طلبة مفيش وراهم أي حاجة غير إنهم يتكلموا في أي حاجة في الدنيا غير الدراسة. مواضيع بتجيب مواضيع، من الكورة للأفلام والغنا والعلاقات العاطفية الفاشل معظمها والأفلام السيكو سيكو.. للعادة السرية. الموضوع انطلق من هنا، وكل واحد قال اللي يعرفه ومر بيه من هنا، معظمنا وقتها كان بنتكلم عن الموضوع بتباهي صبياني والبعض كانوا بيتكلموا بنوع من الإنكار ماعدا واحد منهم كان ساكت والموضوع مش على هواه، حكى إنه سمع إن العادة السرية مضرة وبتسبب أمراض، ذكر كتير منها لحد ما قال: ”بلاش كل ده.. إنتوا عارفين إنها بتسبب عمى؟“ ، ساعتها بس يمكن ركزنا في كلامه اللي خلى بعض مننا يخاف فعلًا .
-2-
في قصص مختلفة لبنات كتير عانت لفترات طويلة من قلق شديد بسبب النوع ده من الممارسة سواء كان حصل بالصدفة في شكل أقرب لاكتشاف جسمها، أو عن طريق معرفة سطحية من كلام هنا وهناك بتتداوله البنات بينها وبعضها، مع تكرار بعضهن للفعل أو الممارسة دي بيحصل لهم حالة قلق وأحيانًا بتوصل لشك البنت في إنها كده تسببت لنفسها في فقد عذريتها أو لأ؟ وبعضهن بيروحوا يكشفوا عند دكتور نسا بالفعل.
إيه هي العادة السرية Secret habit ؟
العادة السرية أو الـ Masturbation أو الاستمناء كلها كلمات لفعل واحد بيحصل فيه إثارة ذاتية للأعضاء التناسلية للوصول لأعلى نقطة في النشوة الجنسية أو ”الذروة الجنسية – Sexual climax“. ده بيحصل إزاي؟ بيحصل عن طريق تحفيز القضيب عند الرجل أو البظر عند المرأة عن طريق اللمس أو المداعبة أو التدليك. بعض الناس ممكن تستخدم أشياء خارجية (المخدات وبعض الألعاب الجنسية) للوصول للنشوة الجنسية.
مين اللي بيمارس العادة السرية؟ في الغالب كل الناس تقريبًا تعرضوا للممارسة دي ولو لمرة واحدة. في إحصائية اتعملت في الولايات المتحدة الأمريكية بتقول إن 95% من الرجال و89% من النساء مارسوا العادة السرية في حياتهم على الأقل مره واحدة في حياتهم.
الموضوع بيبدأ غالبًا مع بداية المراهقة، المرحلة دي بتزيد فيها رغبتك ومحاولاتك لاستكشاف جسمك، فتبدأ تلمس بعض الأجزاء فيه اللي من ضمنها الأعضاء التناسلية، ولأن المنطقة دي حساسة بطبيعة الحال لعدد الموصّلات العصبية العظيم فيها، فممكن تحصل استجابة سريعة أحيانًا لفعل اللمس ده، ساعتها الموصّلات العصبية دي بتبعت إشارات للمخ إنه يفرز هرمونات زي ”الدوبامين“ أو ما يطلق عليه هرمون السعادة، واللي بيقلل جدًا من التوتر والعصبية. كمان بيتم إفراز هرمونات زي ”الإندروفين“ اللي بيعمل تأثير أشبه بتأثير المورفين في الجسم بيقلل الألم.
العادة السرية ممكن تتسبب في العمى أو العقم فعلًا؟
الأطباء في العالم كله تقريبًا بيعتبروا العادة السرية شيء طبيعي جدًا، وإنه الناس بتعملها في سن المراهقة بشكل طبيعي ومفيش منه أي خطر عليهم، يعني من الأخر، العادة السرية مابتجيبش عقم ولا عمى ولا بتأثر على الذاكرة بأي شكل من الأشكال.
بالنسبة لسؤال: هل للعادة السرية تأثير على البنات من ناحية العذرية وغيره، فالإجابة إنه طالما كانت الممارسة خارجية يعني التلامس بيحصل بين الإيدين والبظر (من الأعضاء التناسلية الخارجية عند الأنثى)، يبقى مفيش أي خطر على غشاء البكارة. الخطر ممكن يكون خطر على غشاء البكارة تحديدًا لو حصل اختراق عميق للمهبل، وده مش هيحصل غالبًا إلا باستخدام أداة أو أي من الألعاب الجنسية.
طبيًا بعض الأطباء بيشوفوا إن ممارسة العادة السرية على العكس من اعتقاد كتير من الناس لها فوائد، فإلى جانب فكرة تحقيق شعور المتعة الجنسية، فهي بتخليك تتعرف على جسمك بشكل أوضح وتتعرف كمان على مواطن الإثارة فيه وتفهم احتياجاتك بشكل أفضل وده أمر إيجابي خاصةً للمتزوجين.
لو وصلت للإدمان.. الموضوع مش هيكون أمان!
إدمان العادة السرية (Compulsive Masturbation) هو اضطراب نفسي يصيب الإنسان نتيجة لممارسة العادة السرية بشكل مكثف جدًا لدرجة إن الأمر يوصل للإدمان. الحقيقة إنه مفيش عدد معين من المرات ممكن تقول عندها إن الشخص ده مدمن، هي في النهاية بتتحدد على حسب قدرة كل شخص لكن بيكون ليها سلوكيات خاصة تعرفك إن الموضوع وصل للإدمان.
تعرف منين إن العادة السرية أصبحت إدمان؟
لما تلاقي إنها بتأثر على تلات حاجات:
أولًا حياتك الجنسية مع شريكك بأنك ماتحسش بالمتعة من الممارسة الجنسية الطبيعية ويقتصر الشعور بيها فقط عند ممارسة العادة السرية.
ثانيًا في حياتك اليومية لما تحس إنك بتحتاج تمارسها أكتر من مرة على مدار اليوم.
ثالثًا في أثناء عملك لو حسيت إنك بتحتاج تمارسها أثناء العمل. ساعتها لازم تعرف إن الأمر اتطور معاك ودخل في الحيز المرضي اللي يلزمه استشارة دكتور.
بعض الناس زمان _ما قبل الستينات_ ربطوا بين العادة السرية والجنون كطريقة لمنع ولادهم من إنهم يمارسوها فكانوا بيقولوا إنها بتصيب الإنسان بالجنون. والحقيقة إنها ممكن تكون نتيجة للجنون مش سبب فيه، بمعنى إيه؟ في ناس بيكونوا وصلوا لمرحلة خطرة من الاضطراب العقلي لدرجة إنهم بيمارسوا العادة السرية عشان يشعروا بالنشوة الجنسية الناتجة عنها لكن بشكل علني وهو حواليه ناس عادي دون إدراك منهم للنقطة دي، ودي حالة متقدمة من الاضطراب النفسي تستدعي تدخل الطبيب فورًا.
هل إدمان العادة السرية ممكن يسبب أي مشاكل نفسية؟
هي كلمة إدمان بشكل عام يعني تعتبر مشكلة عظيمة في حد ذاتها، وطبعًا في ظل انتشار المعلومات المغلوطة ما بيننا الموضوع بيكون أصعب، وفي ناس الأمر بيوصل بيهم إنه يؤثر على سلوكهم الاجتماعي بسبب شعورهم بالذنب والعار من ارتكابهم لشيء مش بس هيسبب لهم متاعب صحية لكن كمان بيخليهم يوصلوا لدرجات عالية من الإحباط واحتقار النفس وتقلب المزاج وصولًا للاكتئاب أحيانًا.
في ضرر تاني من الناحية النفسية اتكلم عنها بعض الأطباء، وهو إن أحيانًا الشخص اللي بيمارس العادة السرية بيوصل لمرحلة تخيّل أشياء غير طبيعية، زي تخيّل سيناريوهات مرتبط بالعنف والاغتصاب أو الممارسة السادية أو المازوخية أو خيالات تكون مرتبطة بالأهل والمحارم بشكل عام. ساعتها الموضوع ممكن يكون مؤثر سلبيًا على نفسية الشخص لشعوره إنه أصبح منحرف بشكلٍ ما يعني، والحل للشخص ده إنه يحاول يتوقف تماما عن النوع ده من التخيلات وما يتماداش فيها تجنبًا لحدوثمشاكل تانية أكبر.
طيب هل الموضوع بيكون مؤثر على العلاقة الجنسية بشكل عام؟
بشكل واضح لأ، بالعكس، في أطباء بيقولوا إنه العادة السرية بتأثر بشكل إيجابي في العلاقة الجنسية إلا لو الموضوع وصل للإدمان أو بقى يؤثر على العلاقة ما بين الراجل والست وبيخلي في صعوبة في التواصل بين الجنسين لأنه في طرف فيهم مش بيكون راضي أو بيشبع احتياجاته أثناء الممارسة بالشكل ده، فالعلاقة _باختصار_ بتبوظ في النهاية.
تعمل إيه لو حسيت إنك مُصاب بإدمان العادة السرية؟
- حاول تشغل نفسك معظم الوقت، ركّز على هواياتك، يعني ارسم أو اكتب أو اقرأ أو اعزف موسيقى. حاول كمان تلعب رياضة. لو ماكنتش بتحب كل ده فحاول تطوّع بوقتك في أي شيء ممكن يكون مفيد ليك بشكل عام.
- اخرج من قوقعتك. غالبًا اللي بيتم تشخيصهم بإدمان العادة السرية بيميلوا أكتر للعزلة والوحدة، فحاول توسّع دايرة علاقاتك قدر المستطاع، علشان بدل ما تبقى قاعد في مكان مغلق طول الوقت، تبقى في مكان أكثر براح وقادر تكون فيه مع ناس تانية.
- لو بتتفرج على الأفلام الإباحية فحاول تبعد عنها، أو تقلل منها على قد ما تقدر، لأنها بالتأكيد بتحفز رغبتك في ممارسة العادة السرية.
- حاول إنك ماتكونش قاسي في الحكم على نفسك، يعني حاول تخرج نفسك من الحيز الضيق بتاع إنه ده عار أو غيره، الموضوع أبسط من كده بكتير.
- الموضوع مش هيأثر عليك جسديًا، يعني لا هيجيب لك عقم ولا سرعة قذف ولا عمى ولا جنون ولا أي حاجة خالص.
- لو حسيت إنك فعلًا مش قادر تعمل أي حاجة من دول، فالأفضل إنك تستشير الطبيب.
بما إن العادة السرية، أصبحت حاليًا مش سرية أوي يعني، فلازم الأب والأم يكونوا عارفين إزاي يتعاملوا مع ولادهم بشكل صحيح. أولًا مايحسسهمش إنهم بيعملوا حاجة شديدة الخطورة عليهم، يعني لا يحاول يفتي لا طبيًا ولا دينيًا ولا إجتماعيًا ولا أي حاجة، كل اللي عليك بس إنك تنصحه بإنه مايوصلش لمرحلة الإدمان، وتحاول تفهمه كل شيء عن الجنس عمومًا، علشان يكوّن فكرة صحيّة وصحيحة عن الموضوع ككل. حاول برضه ماتعاقبهوش بشكل عنيف، لأن الموضوع بيترسّخ جوا عقلة بذكرى سيئة.
إذا كنت شايف إنك كولي أمر مش عارف تتعامل مع ابنك أو بنتك، فالأفضل إنك تستشير طبيب نفسي علشان يحاول هو ينصحه أو يتعامل معاه بشكل عقلاني، لأن الموضوع من الأساس مش محتاج أي عنف خالص، علشان دماغه ما تبوظش ولا نفسيته تتشوه، فينتج هو كمان جيل على نفس الشاكلة، ونفضل نلف ورا بعض في الدايرة المفرغة دي.
المصادر: webmd webmd ncbi.nlm.nih ncbi.nlm.nih harvardprostateknowledge tandfonline albahethon wikihow
