ليه وإزاي؟

الستوب موشن: لما تحب تعمل “قصص الأنبياء” في البيت

كتب: أحمد حسين

وإحنا صغيرين كان في أشياء كتير بتميّز رمضان بالنسبة لنا عن باقي الشهور، بعيدًا عن الروحانيات لإننا كنا لسه صغيرين ومش مدركين أوي الموضوع ده، وبعيدًا عن الفرحة بإننا بنروّح بدري من المدرسة في رمضان على أيامي، كان في أشياء مميزه بتظهر على الخريطة التليفزيونية، زي الفوازير مثلًا أو بكّار (وده كان حدث في حد ذاته)، واللي كانوا بيبقىوا على الفطار أو بعده، أما قبل الفطار بساعة مثلًا، فكان بيتعرض ما كنت أعتبره مميز جدًا بالنسبة لي، وهو كارتون الصلصال بتاع قصص الأنبياء.

وقتها كارتون الصلصال ده كان شيء عجيب بالنسبة لي فعلًا، لأن معرفتي بالصلصال بدأت من وأنا في كي جي KG تقريبًا، وعارف إنه الصلصال ده مابيتحركش، هو بيتشكل بسهولة بس لا بيمشي ولا بيتكلم ولا بيدخل حروب مثلًا! فإيه اللي هيخلي الشيء اللي كنا بنعمل منه أشكال وإحنا في كي جي ده، يتحرك ويتعامل ويكأنه إنسان يعني. لحد ما أكبر واكتشف إن الموضوع له علاقة بطريقة تصوير اسمها (Stop Motion).

كارتون الصلصال بدأ تاريخه من سنة 1932 تقريبًا، واحد اسمه ”لويس كلارك كوك“ عمل فيلم كارتون صلصال اسمه (The little baker)، كان بيستخدم فيه طرق التحريك البدائية اللي كانت تعتبر مع ذلك نقلة في عالم التحريك وقتها.

لكن للأسف ظهرت في الفترة دي الكارتونات ثنائية الأبعاد (2D)، ومن ساعتها كل صُنّاع الأفلام اتجهوا لها، وبعدها كمان ظهرت الكارتونات ثلاثية الأبعاد (3D). طيب إزاي الصلصال قدر يكمّل؟ السبب كان في واحد اسمه ”ويل فينتون“، ظهر في أواخر الستينات وبدايات السبعينات، وأعاد إنتاج أفلام وكارتون الصلصال من تاني. وتطورت صناعة الأفلام بتقنية الستوب موشن (stop motion) وبإمكانيات وإنتاجات ضخمة وحديثة. ومن أشهرها أفلام زي: كورالين (Coraline – 2009)، ماري وماكس (Mary and Max – 2009)، والأمير الصغير (The little prince – 2015)، وكوبو والسلسلتان (Kubo and the two strings – 2016) وغيرها أفلام تانية كتير جدا.

اعرف أكتر| عشره أفلام قادرة علي زعزعة الاكتئاب قليلًا وترك انطباع جيد بداخلك

طيب إحنا محتاجين إيه علشان نعمل كارتون صلصال؟

  • مبدئيًا، لازم تختار صلصال يكون في من ضمن مكوناته زيت أو شمع، علشان ماينشفش لما تعرضه للهوا، ولا إنه يبقى مايع بدرجة كبيرة فتبقى مش قادر تحركه بشكل كويس ولا تثبته كمان.
  • لو في إمكانية إنك تعمل الأشكال/الشخصيات بالسلك وتخلط بيها الصلصال اعمل كده علشان الشخصيات تبقى حركتها صح، أما لو مفيش الإمكانية دي فلازم الصلصال يكون نوعه كويس علشان حركته تبقى كويسة ومايفرطش من بعضه.
  • بعد ما تعمل شخصية من الصلصال هتحتاج تلات حاجات: كاميرا وترايبود (حامل للكاميرا) وكمبيوتر.
    أول خطوة هتعملها إنك هتثبّت الترايبود في زاوية تكون موضّحة الشخصية اللي هتحركها، ولازم لازم الترايبود يكون متثبّت كويس علشان لازم الكادر بتاع الصورة يكون ثابت مش مهزوز.
  • الكاميرا المستخدمة ممكن تكون ديجيتال، أو كاميرا موبايل بس يكون عليه برنامج تحريك بطريقة الـStop motion، أو تكون كاميرا (DSLR) أو اللي إحنا بنقول عليها كاميرا بروفيشينال. ممكن تستخدم كاميرا فيديو لكن الموضوع ده هيكون صعب والكادرات غالبًا هتطلع مش مظبوط زي كادرات الصور. بعد ما تثبّت الكاميرا على الترايبود، هتوصلها بالكمبيوتر، اللي المفروض هتكون محمّل عليه برنامج Stop motion.
  • الخطوة اللي بعد كده، إنك هتحط الشخصية على سطح مستوي، ولازم تتأكد إنه مستوي علشان لو حركة من حركات الشخصية باظت هتضطر تعيد الفيديو من الأول تاني، لأن حركات الصلصال فيها تعسيف شوية، والسبب في ده إن حركة الشخصية لازم تكون بسيطة جدًا بين الكادرات، يعني كل كادر الشخصية مثلًا ترفع إيديها بزاوية بسيطة، وكل ما ترفع الإيد شوية خد لقطة (صوّر صورة عن طريق البرنامج اللي متوصلة بيه الكاميرا)، لحد ما الإيد تترفع للأخر خد أخر لقطة وابدأ بعدها مرحلة التحريك.

بعدها هتتبقى أسهل مرحلة، وفيها كل اللي عليك إنك تجمّع الصور ورا بعض بالترتيب. هتكون كل الصور دي متحمّلة على البرنامج بتاع الـStop motion، وساعتها الموضوع هيبقى سهل علشان إنت مش هتحتاج غير إنك تدي أمر للبرنامج إنه يرتب الصور ويحرّكها ورا بعضها، فهتبان على إنها فيديو لشخصية صلصال بتتحرك بالشكل اللي إنت علمته، أو في الحالة دي هيكون عبارة عن فيديو لشخصية صلصال بترفع إيديها وبتعمل باي باي مثلا.

كارتون الصلصال يبان بسيط، أو ممكن يتعمل بإمكانيات بسيطة وهو كده فعلًا، لكن صعوبته كلها في موضوع تحريك الشخصيات اللي معمولة من الصلصال وظبط الحركات دي، لأن الحركة لازم تبقى محسوبة بالمسطرة، وأي حركة غلط فعلًا هتبوّظ الفيديو كله. يمكن عشان كده ممتن بشكل شخصي جدًا لكل شخص ساهم في عمل كارتون قصص الأنبياء اللي من الصلصال ده، لأنهم أكيد تعبوا أوي فيه بالإمكانيات الضعيفة اللي كانت متاحة ليهم وقتها.


المصادر:  wikihow   abcnews

الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق