للمرة الأولى: مريضة بالسكري تستغنى عن الأنسولين!
كتبت: مها طــه
مرض السكري يُعتبر واحد من أكتر الأمراض اللي بتهدد البشر على مستوى العالم، وبيصاب بيه ملايين الأشخاص في العالم كله، ولأن له أسباب مختلفة، وكمان أنواع مختلفة، وده اللي بيخلي علاجه صعب، لأنه غالبًا بينتج عن تلف ما في البنكرياس بيمنعه من إنتاج الأنسولين اللازم للجسم.
لكن الحقيقة كل يوم العلم بيطلع بأبحاث جديدة، الهدف الوحيد منها هو الوصول لعلاج لمرض السكري، واللي بالطبع هيكون بمثابة إنقاذ لحياة ملايين الأشخاص حول العالم، اللي ممكن السكري ومضاعفاته يتسببوا في وفاتهم، وخصوصًا في ظل أنظمة غذائية وأسلوب حياة بعيد تمام البعد عن الحفاظ على الصحة.
أمل جديد في علاج مرض السكري
أحدث هذه الأبحاث قام بيه أطباء معهد أبحاث السكري التابع لجامعة ميامي، واللي نجحوا فيه في علاج مريضة بالسكري، بتعاني من سكر الدم العالي من خلال طريقة فريدة من نوعها في العلاج، وبالفعل المريضة توقفت تمامًا عن استعمال حقن الأنسولين أو أي نوع تاني من الأدوية لعلاج مرض السكري.
الطريقة الجديدة اللي اعتمد عليها الأطباء لعلاج مرض السكري بيتم فيها حقن خلايا جزر لانجرهانس (مجموعة صغيرة من خلايا البنكرياس بتحتوي على خلايا بيتا المسئولة عن إفراز الأنسولين) داخل جسم المريضة اللي بيعاني من مرض السكري من النوع الأول.
«ويندي بينكوك»، سيدة تبلغ من العمر 43 سنة، مصابة بمرض السكري من النوع الأول من وهي عندها 17 سنة، لكن حاليًا ومع تجربة العلاج الجديد ده عليها، توقفت تمامًا عن استعمال الأنسولين، بعد ما كانت مضطرة إنها تاخد الجرعة يوميًا لضبط مستوى السكر في دمها، لأن حقن الانسولين هي الحل الوحيد المعروف للتعامل مع مرض السكري من النوع الأول، وده طبعًا قبل الاكتشاف الجديد ده.
ويندي بعد فترة من الرفض قررت إنها تعمل العملية اللي هيتم من خلالها حقنها بخلايا جزر لانجرهانس، وبعد الجراحة اكتشف الأطباء إن جسمها كان بينتج الأنسولين بشكل طبيعي، وده معناه إنها ماكنتش محتاجة علاج من أي نوع، وحاليًا ويندي بقت حرة تاكل اللي تحبه بعد سنوات طويلة من الحرمان بسبب السكري، لكن طبعًا في النهاية برضة بيظل أحد أهم مسببات مرض السكري هو أسلوب الحياة والأكل الخاطئ.
العلاقة بين الجهاز المناعي و مرض السكري
الجهاز المناعي غالبًا بيكون هو السبب في مشكلة السكري ، حيث إن الجهاز المناعي بالأساس دوره هو حماية الجسم عن طريق مكافحة الفيروسات والبكتيريا اللي بتصيب الجسم. لكن أحيانًا بيحصل خلل ما يخلي الجهاز المناعي بدل ما يهاجم الفيروسات والبكتيريا دي بيهاجم الخلايا اللي بتنتج الأنسولين في الجسم، وده بيؤدي لانخفاض إنتاجه في الجسم.
خلايا جزر لانجرهانس هي الخلايا المسئولة عن إنتاج الأنسولين في الجسم ولما بتتلف الخلايا دي، بيتوقف إنتاج الأنسولين، وطبعًأ الأنسولين هو المسئول عن خفض مستوى السكر في الدم. الأنسولين بيفصل السكر من الدم ويبعته للخلايا المسئولة عن عمليات التمثيل الغذائي (الأيض). لما بيحصل خلل في إنتاج الانسولين، السكر بترتفع مستوياته في الدم ويبدأ يتراكم بكميات كبيرة ويسبب أنواع كتير من المشاكل في الجسم، وممكن المضاعفات دي تكون سبب في الوفاة كمان.
جزر لانجرهانس
الطريقة الجديدة في العلاج دي اعتمدت على حقن خلايا جزر لانجرهانس في جسم المريضة وتحديدًا في غشاء الأمعاء (Omentum). وغشاء الأمعاء ده عبارة عن نسيج بيلف حوالين كل الأعضاء الموجودة في البطن، وتم حقنه بالخلايا دي عن طريق سقالات قابلة للتحلل داخل الجسم. إنتاج السقالة دي بيتم عن طريق خلط دم المريض مع إنزيم الثرومبين، واللي بيستخدم أصلأً للسيطرة على النزيف في العمليات الجراحية لأنه بيحفز تجلط الدم.
لما بيختلط الثورمبين مع خلايا الدم، بتتشكل مادة هلامية شبه الجيلي، المادة دي بتبقى بمثابة السقالة اللي بيتحقن فيها خلايا جزر لانجرهانس، وبتحميها من إنها تموت أو يتم رفضها داخل الجسم. الجيل ده بيتحلل جوا الجسم وبيتم امتصاصه، وبتتبقى الخلايا اللي بتقدر تحصل على الأكسجين والمواد الغذائية المطلوبة عشان تقدر تقوم بوظيفتها السليمة، وبعد شوية، بتقدر الخلايا دي تنتج الأنسولين من تلقاء نفسها، ويبدأ مستوى السكر ينخفض في الدم.
بجانب العملية دي، بيتم إعطاء المريضة علاج عشان يقلل من مقاومة الجسم فيتقبل وجود خلايا لانجرهانش الجديدة فيه لأطول فترة ممكنة. وصرّح دكتور “كاميلو ريكوردي” مدير المعهد والأستاذ بجامعة ميامي، إن ما توصلوا له لا يعتبر علاج، لكنه خطوة كبيرة جدًا في سبيل علاج الناس اللي بيعانوا من مرض السكري وبيضطروا يتعايشوا مع وجوده طول حياتهم، بالذات مرضى النوع الأول منه.
اعرفوا كمان عن استخدام تقنية النانو في علاج مرض السكري من هنا.
