نوّرها

الهوس الاكتئابي: طريق السعادة والحزن رايح جاي!

كتب: أحمد حسين

كتير مننا بيعانوا من تقلبات المزاج الاعتيادية بتاعت كل يوم. لكن في فرق بين إنك تسوق على سرعة عالية وإنك تطير بالعربية، وتقريبا ده الفرق بين تقلب المواج العادي وبين الهوس الاكتئابي أو الاكتئاب ثنائي القطب(Bipolar Depression) زي ما بيطلق عليه حاليًا. بس هو ليه هوس وإيه علاقته بالاكتئاب؟!

إيه هو الهوس الاكتئابي؟

الهوس الاكتئابي ، هو مرض نفسي بينقل المصاب بيه من قمة السعادة إلى أسفل درجات الحزن، من حب المغامرة والحياة إلى الشعور باللامبالاة وفقدان الشغف، وكل ده على خط نفسي واحد ماشي رايح جاي، يعني كوكتيل مشاعر عكس بعض تمامًا، والهوس أو الجنون هو أعلى درجاته.

الهوس الاكتئابي من الأمراض النفسية المُعقدة. ممكن يصاب الشخص بيه بسبب خطأ وراثي في الجينات أو حتى أسباب تانية اجتماعية أدت لتغيّر كيمياء المخ. الهوس بيختلف عن التغيرات المزاجية (Mood Swings)، لأن التغيرات المزاجية ممكن تحصل بشكل طبيعي ولأسباب كتير، لكن لما بتزيد عن حدّها وتنتقل من الهوس أو حالة الهيبرة الشديدة لحالة الاكتئاب السريري، يبقى ده معناه إن الشخص ده مصاب بالهوس الاكتئابي.

الانتقالات اللي بتحصل بين المشاعر المختلفة دي مش لازم تكون سريعة، يعني ممكن يفضل الشخص مكتئب يوم أو شهر أو سنة، وفجأة يبقى في قمة السعادة، يعني الفكرة إن التغيرات مابتكونش يومية مثلًا لكنها بتكون حادة جدًا، فممكن الانتقال من حالة السعادة إلى الحزن يحصل في ثواني.

في الأغلب المرض ده بيصيب البشر من سن 15 لسن 24، وبعد كده بيكون من الصعب الإصابة بيه، لحد ما يوصلوا 65 سنة، ودي المرحلة العمرية اللي الإصابة بالمرض فيها بتكون شبه مستحيلة. مرض الهوس الاكتئابي مش منتشر بدرجة كبيرة، يعني بيصيب تقريبًا 1% من سكان الكوكب مش أكتر.

أعراض الهوس الاكتئابي كتير، وكل حالة وليها أعراضها

نبدأ بالهوس:

  • الإحساس بالفرحة المفرطة أو النشوة
  • فرط التفاؤل
  • فرط الثقة بالنفس
  • انفعالات عصبية وتصرفات عدوانية
  • إسراف في صرف الأموال بشكل غير طبيعي
  • رغبة شديدة في العمل بقوة
  • رغبة جنسية شديدة ممكن تؤدي لانحراف جنسي ما
  • قلة الحاجة للنوم

أما بقى أعراض مرحلة الاكتئاب فهي:

  • الحزن الشديد
  • اليأس وانعدام الأمل
  • الأفكار الانتحارية أو الإقدام بالفعل على الانتحار
  • الشعور الدائم بالذنب
  • اضطرابات النوم والشهية
  • الإرهاق الشديد
  • مشاكل في التركيز
  • قلق وعصبية دائمين
  • آلام مزمنة

طبعًا كل الأعراض دي، بتؤدي بشكل مباشر، لحدوث مشاكل كتير في حياة المصاب بالهوس الاكتئابي، منها مشاكل مع الأصدقاء والأقارب، ومشاكل مع العمل أو الدراسة، ومشاكل مع نفسه بالأساس، لأنه بيكون أفكار عنيفة تجاهها.

الهوس الاكتئابي نوعين

الهوس الاكتئابي له نوعين، نوع اسمه ”الهوس الاكتئابي 1“ والمصاب بالنوع ده بيعاني من التغيرات والانتقالات المزاجية دي على فترات ممتدة، أما النوع التاني ”الهوس الاكتئابي 2“ فالمصاب بيه بيعاني من نوبة هوس خفيفة اسمها (Hypomania)، وهي بتتشابه في أمور كتير مع نوبة الهوس العادية، يعني نفس الأعراض بس بتكون أكثر اعتدالًا، وممكن تستمر لعدة أيام وماتكونش خطيرة أساسًا.

في مرض شبيه بالهوس الاكتئابي أو الاضطراب ثنائي القطب ولكنه أقل خطورة منه بكتير اسمه ”اضطراب المزاج الدوري – Cyclothymia“ وفيه نفس الأعراض، بس الفرق إن اللحظات دي سواء في القمة أو الحضيض بتكون أقل خطورة من الهوس الاكتئابي.

نوبات الهوس الاكتئابي ممكن تكون بسيطة، وممكن تكون حادة، لو فضلت حادة لفترة طويلة، ممكن تؤدي للاضطراب النفسي الشامل أو الذهان (Psychosis)، بمعنى الانفصال المطلق عن الواقع، وممكن كمان في بعض الأحيان يوصل لهلاوس، يعني سماع أصوات ورؤية أشياء مش موجودة، وممكن يوصل لأوهام، ودرجات من الإيمان القوي بأشياء مش حقيقية.

طبعًا الأفضل لما أي شخص يلاحظ الأعراض دي سواء على نفسه أو على حد قريب منه، إنه يساعده يروح لطبيب نفسي، لأن الموضوع كل ما بيتساب من غير علاج، كل ما كان أخطر، والطبيب النفسي ضرورة في الأوقات دي، لأن المرض ده ممكن يستمر طول الحياة، لذلك لازم يتم علاجه سواء عن طريق تناول الأدوية المضادة للاكتئاب، أو عن طريق الجلسات العلاجية مع الطبيب النفسي.


المصادر: webmd  webmd  rcpsych

الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق