أغرب طرق تحرق بيهم 200 سعر حراري!
كتبت: مها طـه
”نسيانك ده عايزله إرادة وانا قلبي بيضعف كالعادة“ الجملة دي بالنسبة لي بتعبر عني بشدة في علاقتي بالأكل، الحقيقة دي مش مشكلتي لوحدي، إحنا كتير فعلًا، وطبعًا النصيحة اللي هيقولها لك أي خبير تغذية أو دكتور دايت، إنه عليك بالدايت والرياضة والرياضة والدايت، عشان تحافظ على رشاقتك.
الدايت ومحتاج إرادة أما الرياضة فدي محتاجة حاجات كتير، مكان ووقت وفلوس كمان، عشان أكيد شوارعنا مش مؤهلة لممارسة أي نوع من الرياضة فيها غالبًا، العلماء بقى قرروا يساعدونا بإنهم يقولوا لنا على 5 طرق غريبة تقدر تخسر بيهم 200 سعر حراري مرة واحدة.
الإنسان العادي في المتوسط بيحتاج حوالي 2000 سعر حراري في اليوم لو ست و2500 سعر حراري لو راجل، عشان جسمه يقدر يقوم بكل العمليات الحيوية بشكل طبيعي، وطبعًا عشان تقلل وزنك فحضرتك محتاج تقلل من سعراتك الحرارية، وده عن طريق أكل صحي سعراته أقل بالإضافة لحرق السعرات الحرارية دي بعد ما تدخل الجسم.
الـ200 سعر حراري محتاجين منك حوالي 20 دقيقة جري متواصل عشان يتحرقوا، لكن هنا بقى هنتعرف على طرق تانية غريبة شوية، ليه مثلًا ما نكلش لبانة لمدة 18 ساعة متواصلة! في الحقيقة اللبان بيحتوي على 10 سعرات حرارية في اللبانة الواحدة، ممكن تاخد كل ساعة لبانة جديدة، وبكدة نقدر نجدد الطعم ونحرق السعرات وإحنا قاعدين في مكاننا!
بتحبي مرطب الشفايف _زبدة الكاكاو زي ما بنقولها_ ، ممكن نستخدمها في حرق 200 سعر حراري، حطيه 1500 مرة وهو هيقوم بالواجب، ويا سلام بقى لو قبلها غسلت أسنانك حوالي 45 مرة، كل مرة لمدة دقيقتين، يبقى كدة حرقت 400 سعر، والسادة المتجوزين نحب نقولكم بشرى سعيدة، ساعة من ممارسة الجنس بتحرق حوالي 200 سعر حراري.
طب إيه رأيك تتفرج على التليفزيون؟ الحقيقة إنك لو فضلت تقلب ما بين القنوات لمدة ساعتين ونص فبكده إنت حرقت 200 سعر حراري، وبمناسبة التليفزيون، فلو اتفرجت على 4 حلقات من مسلسل كوميدي، ده كمان كفيل بحرق الـ200 سعر.
طب نيجي بقى لأكتر حاجة أنا شخصيًا بحبها: النوم، إيه رأيكم إن النوم لأكتر من 3 ساعات، هيحرق نفس العدد من السعرات تقريبًا، طب بلاش كل ده إيه رأيك تركب أول موجة مش في سكة الخسسان بقى مش الأموال، ارمي نفسك في البحر واستمتع بـ200 سعر حراري بيتحرقوا.
على ذكر البحر والمياه، شرب 8 كوبايات مياه في اليوم، كفيل بإنه يحرق 70 سعر حراري إضافي في اليوم، فلو فضلت 3 أيام ورا بعض تشرب كل يوم 8 كوبايات مياه، فأنت حرق الـ200 سعر، بس طبعًا ماتحاولش تشربهم كلهم في يوم واحد، مش هتخرج كده من الحمام حضرتك، كما إنك هتفقد الأملاح والمعادن اللي في جسمك.
طب فاكرين زمان لما كنا بنلعب نط الحبل، إيه رأيك تسترجع ذكريات الطفولة وتجيب حبل وتفضل تتنطط، الحقيقة 15 دقيقة من نط الحبل هيقوموا بمهمة حرق الـ200 سعر دول، ادخل بعدها الحمام، خد دش عميق وبالمرة استمتع بغناء أغنيتك المفضلة، غنيها 23 مرة، وبكدة تبقى حرقت 200 سعر تانيين، وطلعت كل مواهبك اللي ماحدش مقدرها.
أحد أحلام حياتي كانت هي إني اتعلم العزف على البيانو، والحقيقة زعلت أوي لما عرفت إن العزف على البيانو لمدة ساعة ونص هو كمان كفيل بحرق العدد ده من السعرات، بس لإني ماعرفتش أحقق الحلم ده، فقلت استخدم صوابعي في حاجة تانية، واكتب لكم عن كيفية حرق 200 سعر حراري، الحقيقة إنه كتابة حوالي 4800 كلمة على الكومبيوتر كفيل بحرق الـ200 سعر دول.
في الأخر خليني أقولكم إن الجسم السليم هو اللي فيه عدد قليل من الكيلوجرامات، بس مش أي كيلوجرامات، كيلوجرام الدهون هو المشكلة، لكن لو كيلوجرام عضلات فهو ده الطبيعي، فالمسألة نسبة وتناسب يعني الشخص اللي وزنه 70 كيلو منهم 10 دهون ده جسمه مليان ومحتاج دايت، أما اللي وزنه 100 وعنده 10 دهون فده طبيعي، وهنا لازم نقول إن كل كيلوجرام من الدهون عشان يتحرق، تقريبًا بيستهلك أكتر من 7000 سعر حراري، وده معناه إن الـ200 مازالوا قليلين لكن خليك فاكر إن كل الطرق اللي قولناها مش هتكلفك أي حاجة، وممكن كمان متبقاش محتاج تتحرك من مكانك عشان تعملها.
المصدر:
