الكافيين والـPMS: هل فنجان القهوة بيزود أعراض الدورة الشهرية؟!
كتبت: مها طـه
في واحدة من الجلسات بيني وبين صديقاتي، كان الكلام كله عن الشغل والتعب والاحساس الدائم بالارهاق، وطبعًا طالما في شغل وصحيان بدري يبقى في قهوة ونسكافيه، وهنا ظهر تعليق من صديقة، بإننا لازم نحاول نقلل من استهلاكنا للكافيين شوية وخصوصًا في وقت ما قبل الدورة الشهرية ، لأننا كدة بنزود من القلق والألم الشهري المتعلق بالـPMS.
الـPMS وعلاقتها بتناول الكافيين
الـPMS هو اختصار لـ”Premenstrual syndrome” أو متلازمة ما قبل الحيض، ودي عبارة عن مجموعة من الأعراض العاطفية والجسدية اللي بتصيب السيدات في فترة من أسبوع لأسبوعين قبل بداية الدورة الشهرية، وغالبًا بتنتهي الأعراض دي بمجرد نزول دم الحيض.
الأعراض دي غالبًا بتكون في صورة ظهور حبوب وألم في الثدي والانتفاخ والإحساس بالإرهاق والتحسس والتغيرات المزاجية. وعلى عكس الشائع إن كل الستات بتمر بمرحلة الـPMS، فالحقيقة إن الحالة دي بتصيب نسبة ما بين 15 – 20 % بس من السيدات في سن الحيض.
اعرف أكتر| إيه هو السبب في الآلام الشديدة للدورة الشهرية؟
عشان تتشخص الإصابة بالمتلازمة دي، لازم يكون في نمط ثابت للأعراض العاطفية والجسدية اللي قولناها، ويتم تتبعها لمدة كذا شهر متتالي، والاهم إن الأعراض دي تكون بتأثر على السير الطبيعي لليوم عند المصابة بيها.
أسباب الإصابة بالـPMS مش معروفة لكن في بعض العوامل اللي ممكن تزود من حدة الأعراض، وبالتالي بينصح بتجنبها في الفترة دي، زي تناول الكحوليات والأكل المملح وأحيانًا السكر والأهم الكافيين بكل أشكاله، لأنهم بيأثروا على مستويات الهرمونات وبالتالي بيزودوا الأعراض.
لسنين طويلة كان الاعتقاد السائد عن الكافيين إنه الحل المثالي لتخطي الإرهاق الناتج عن الـPMS، وبالتالي كانت السيدات في الفترة دي بيزودوا من استهلاكهن للكافيين عشان يقدروا يتخطوا المرحلة، لكن في الوقت ده طلعت دراسات وأبحاث كتير بتقول إنه الكافيين بدل ما يحل الأمور بيزودها.
فنجان القهوة برئ من كل الاتهامات
وفضل الاعتقاد ده سائد لحد سنة 2016. لما ظهرت دراسة عن العلاقة بين متلازمة ما قبل الحيض واستهلاك الكافيين، وقالت إن مفيش علاقة مباشرة ما بين استهلاك الكافيين وظهور أعراض الاصابة بالـPMS. الدراسة دي تمت على 3600 ست في جامعة ماساتشوستس وتم نشرها في ” American Journal of Clinical Nutrition”.
الدراسة دي تمت على مدار 14 سنة، كان فيها بيتم عمل متابعة لنمط استهلاك السيدات المشاركات في التجربة للكافيين، واللي كلهن مش بيعانوا من الـPMS، وكان السؤال يا ترى استهلاك الكافيين ممكن يؤدي للإصابة بمتلازمة ما قبل الحيض أصلًا؟ في الدراسة تم وضع عوامل تانية قد تكون مؤثرة في الاعتبار زي الوزن والسن والتدخين وغيرها، ووجدوا طبقًا للعوامل دي إن مفيش أي علاقة ما بين الكافيين وأعراض الـPMS.
وعلى الرغم من نتيجة الدراسة دي، الكلية الأمريكية لأطباء أمراض النساء والتوليد (ACOG) بتوصي السيدات اللي بيعانوا من متلازمة ما قبل الحيض PMS إنهم يتجنبوا تناول الكافيين في الوقت ده، وخصوصًا إنه عادةً في الوقت ده بيزيد استهلاك السيدات زي ما قولنا في محاولة للتغلب على الإرهاق.
التوصية دي جاءت بناءًا على أبحاث ودراسات تانية بتقول إن الكافيين بيؤثر على الدورة الشهرية في العموم، ولقوا إن في علاقة ما بين زيادة استهلاك الكافيين وقصر دورة الطمث. وفقًا للمعدل الطبيعي، المفروض إن الطمث أو الدورة الشهرية تستمر لمدة 28 يوم، وزيادة الكافيين ممكن تقللها لـ24 يوم.
السبب في ده نابع من تأثير الكافيين كقابض للأوعية الدموية بشكل عام، والأوعية الدموية المتصلة بالرحم بشكل خاص، وده بيخليه يقلل من تدفق الدم في الرحم وبالتالي يقصر فترة الدورة الشهرية نفسها، وعلى الرغم من إن ده مالوش تأثير صحي خطير إلا إن الإسراف في تناول الكافيين بشكل عام ممكن يمثل خطر على الصحة.
اعرف أكتر| هذه الكمية من المواد الطبيعية كفيلة بقتلك!
في النهاية، لو أنتِ من مدمنات القهوة والشاي والكافيين بشكل عام، نحب نقولك إنه الاستهلاك المعتدل لأي مادة في الدنيا هو الحل الأفضل، فلو مش بتعاني من أعراض الـPMS تقدري تستهلكي المعدل الطبيعي كل يوم من غير قلق.
أما لو كنتي من المصابات بالـPMS، فمن الأفضل تقللي من استهلاكك على الأقل في فترة الأسبوع اللي قبل الدورة الشهرية، ولمواجهة الإرهاق ممكن تزودي من كمية الأكل الغني بالحديد زي: اللحوم الحمراء والتونة والعدس الخضراوات الورقية.
مع كل التمنيات بفترة PMS لطيفة من غير تقلبات مزاجية حادة وأعراض قوية ومجموعة من المسكنات اللي ضررها أكبر من نفعها، واللي هنتكلم عنها في مقال جديد وبالتفصيل.. استنونا : )
المصادر: womenshealthl umass livestrong helloclue acog ncbi
