أفضل خمسة أفلام عن الخيال العلمي
كتب: أحمد حسين
تقريبًا كده، معظم البشر بيحبوا السينما والأفلام سواء كانت أفلام أكشن أو دراما أو كوميدي أو خيال علمي، والأخيرة يمكن هي اللي هتثير فضولي هنا. الحقيقة أفلام الخيال العلمي أو الـSci-fi من نوعية الأفلام اللي بتكون غالبًا مبنية على نظريات علمية مثبتة أو غير مثبتة، وطبعًا بمساعدة السيناريو والإخراج وتقنيات التصوير والجرافيكس أو الـComputer-generated imagery) CGI) أو المشاهد المصممة كاملةً بالكمبيوتر، وكل التقنيات دي اللي أصبحت حاليًا متطورة جدًا، أصبح إنتاج الأفلام دي أسهل من قبل كده.
لكن المشكلة كانت زمان، قبل الجرافيكس والتصوير والتقنيات الحديثة دي، إزاي كان المخرجين بيقدروا يخرجوا الأفلام دي، وبجودة تخليك تصدق القصة اللي بتتعرض على الشاشة قدامك؟ الموضوع فعلًا ماكانش بسيط، وفي أفلام كتير أنتجت وكانت أي كلام ودي مالناش دعوة بيها، وأفلام أنتجت وكانت من أفضل أفلام الخيال العلمي قبل علو سهم التكنولوجيا في الأفلام بالشكل ده.
في المقال ده اخترت خمسة من قائمة أفضل عشرة أفلام عن الخيال العلمي اللي تم إنتاجها وإخراجها بدون مساعدة تقنيات التصوير الجديدة والـCGI:
1- كوكب القرود (Planet of the apes 1968)
تقريبًا معظم الناس اللي بتهتم شوية بالسينما هيبقوا عارفين الفيلم ده، ولو مش عارفينه هيبقوا عارفين الأجزاء الجديدة اللي أنتجت منه سنة 2001 وما تبعها. الفيلم في الأصل مأخوذ عن رواية بنفس الاسم للروائي الفرنسي ”بيير بول“. الفيلم باختصار بيتكلم عن رحلة 3 رواد فضاء هبطوا على كوكب غريب بتحكمه قرود ذكية جدًا وعنيفة وبتتكلم.
إيه الحلو في الفيلم بقى؟ الحلو فيه إنه كله تقريبًا من غير مؤثرات وتقنيات حديثة خالص، قوة الفيلم جاية من السيناريو المُحكم المُتماسك ومن إن تصميم موقع التصوير والديكور والأماكن والملابس كلها حسست المشاهدين فعلًا إن الممثلين في الفضاء. الفيلم اتكلف إنتاجه حوالي 6 مليون دولار سنة 1968.
2- حرب النجوم (Star wars 1977)
أشهر أفلام الخيال العلمي في العالم تقريبًا، واللي بدأ الملحمة اللي لازالت قائمة وآخر جزء منها كان اتعرض في ديسمبر 2015 كان الفيلم ده اللي تم إنتاجه 1977. الفيلم من تأليف وإخراج ”جورج لوكاس“ اللي واجه صعوبات كتير علشان ينتج الفيلم لأن الأستديو اللي كان هينتجه كان شايف إن الفيلم هيتكلف كتير أوي، فطلبوا من جورج إنه يقلل من مطالبه لكن جورج ماعجبهوش الكلام، راح عامل ماكيتات (مجسمات صغيرة) لسفن الفضاء اللي كان عاوز يستخدمها في الفيلم، وراعى جورج لوكاس كل التفاصيل علشان يطلع العمل متصدق، وفعلًا الفيلم عجب الجمهور والنُقاد جدًا وأصبح من أفضل أفلام الخيال العلمي في التاريخ.
https://www.youtube.com/watch?v=vP_1T4ilm8M
3- الكوكب المهجور (Forbidden planet 1956)
واحد من أفلام الحقبة الذهبية في الخمسينات. الفيلم ده يعتبر إعادة رواية آخر روايات شيكسبير ”العاصفة – The Tempest“، القصة بتدور في سفينة فضاء في القرن الواحد والعشرين، لما بيوصل أحد رواد الفضاء والمجموعة بتاعته لمكان ما علشان يتفقدوا حقيقة إن في فضائيين بيتواصلوا معانا. ولما بيوصلوا بيكتشفوا إن في مجموعة نجت من حادثة ما هناك راجل وبنته ومعاهم إنسان آلي، وطبعًا ظهور إنسان آلي في الوقت ده ماكانش شيء غريب أوي، بس برضه ماكانش مألوف! مع اختيار القائمين على الفيلم لأماكن مناسبة للتصوير وخلق جو شبيه جدًا لتخيل معظم الناس للفضاء، أصبح الفيلم من أهم أفلام الخيال العلمي اللي أنتجت في العصر الحديث.
4- الفضائي (Alien 1979)
طبعًا ده من أشهر أفلام الفضاء عمومًا، مزيج كده ما بين الرعب والخيال، وطبعًا مع التصميم العظيم لموقع التصوير وأزياء الممثلين، المشاهدين شافوا إن الموضوع فعلًا لو حصل في الحقيقة هيبقى شكله كده. القصة باختصار، مجموعة من رواد الفضاء بيسافروا علشان يحققوا في أمر ما، المهم إنه بتم مهاجمتهم من شيء غريب هما مش عارفينه، فبيرجعوا الأرض تاني ويفتكروا إن الكائن الفضائي ده إختفى، لكن المشكلة إن الكائن ده ماختفاش ولا حاجة، وهنا يبدأ الفيلم. العظمة بقى في إيه؟ إنه الكائن ده تم تصميمه كبدلة بالكامل عن طريق الفنان والنحات السويسري ”هانز رودولف جينجر“، لذلك كان الموضوع متصدق أكتر كمان من خِدع الجرافيكس والسي جي آي.
5- 2001: أوديسا الفضاء (2001: A Space Odyessey 1968)
تحفة ستانلي كيوبرك الخالدة. الفيلم اللي نافس في أربعة جوائز أوسكار وفاز بأفضل خِدع ومؤثرات. الفيلم في الأصل مقتبس عن قصة قصيرة للكاتب ”أرثر كلارك“. ليه الفيلم ده يعتبر تحفة وليه يفوز بجائزة أفضل خِدع ومؤثرات؟ الفيلم بيعتبر تحفة لأنه بعيدًا عن الحبكة العظيمة والسيناريو المحكم وأساليب المونتاج والإخراج المتقنة، الفيلم كل حاجة فيه مبنية، يعني الديكور كله مفيش فيه أي خدعة ولا جرافيكس، حتى المشاهد اللي كان فيها البطل بيتحرك في حيّز مليء بالألوان، كل دي ألوان حقيقية تم تصميمها مخصوص للمشهد ده في الفيلم. حتى الكمبيوتر اللي كان مُستخدم في الفيلم ”هال 9000“ تم بناءه بالكامل برضه. لذلك الفيلم بيعتبر دلوقتي من أفضل أفلام الخيال العلمي وأفضل الأفلام اللي تم إنتاجها عمومًا.
المصدر
