5 خرافات شائعة حول الفضاء!
كتب: أحمد حسين
في الوقت اللي هوليوود بدأت تنتج فيه أفلام كتير عن الفضاء تقول فيها إننا لازم نسيب _أو هنسيب بمعنى أدق_ الأرض يوما ما في المستقبل، وناسا بتعمل بوسترات لرحلات الفضاء المستقبلة، لسه في عدد كبير من البشر مايعرفوش معلومات كتير عن الفضاء، وبيتعاملوا معاه كمجهول! وعليه كان لازم نعرف عن الفضاء أكتر مش لأي شيء إلا إننا نبقى عارفين المكان اللي يقال إننا هنعيش فيه في يوم من الأيام يعني، ده أقل واجب!
في المقال ده هنعرض أكتر 5 خرافات بيتم تداولها من الناس عن الفضاء:
1- حزام الكويكبات ده خطر
حزام الكويكبات دي منطقة بتقع مابين كوكبي المريخ والمشترى، وبتدور فيها كمية كبيرة من الكويكبات الصغيرة اللي بتتكون من الصخور والمعادن. الحزام ده تقريبًا في كل فيلم المفروض إن أحداثه بتدور في الفضاء يوقع له على الأقل سفينة أو اتنين. الحقيقة إن الحزام ده بعيد جدًا عننا وتقريبًا مهجور تمامًا. الحزام ده بيبعد عن الشمس بحوالي من 300 إلى 500 مليون كيلومتر عن الشمس، وكل الصخور اللي فيه دي يا دوب بس تقدر تعمل إحتكاك بسيط مع القمر مش أكتر.
2- الفضاء برد جدًا على فكرة؛ تقّل وإنت طالع!
من الحاجات الغريبة المتداولة برضه _أو اللي بتيجي في دماغ البشر لما بيتم ذكر الفضاء قدامهم_ هو إن الفضاء ده أكيد برد، وإنه رواد الفضاء اللي بيطلعوا فوق دول بيلبسوا بدل تقيلة علشان تحميهم من البرد. والحقيقة إن الكلام ده كله غلط، فالفضاء ممكن يكون برد أو حَر على حسب إنت موجود فين، أكتر مكان برد في الكون بتوصل درجة حرارته لـ(-234) درجة مئوية، وأكتر مكان حَر ممكن يوصل لـ(121) درجة مئوية بالقرب من الأرض.
3- السلاح النووي مش ممكن يدمر الكويكبات
بما إننا بنفكر في إن الكويكبات دي ممكن تنزل علينا من السما وتدمرنا كلنا، فإحنا عندنا مخاوف يعني تخص بعض سيناريوهات نهاية العالم وكده، فهل بكل الأسلحة النووية اللي عندنا دي هنقدر نحمي نفسنا؟ أيوه، الأسلحة النووية هتقدر تحمينا. الكويكبات دي في الأصل عبارة عن مجموعة من الأشكال الغير متجانسة من الصخور، فأي خبطة قوية فيها هتدمرها تمامًا، فلو فكرت تهوّب ناحية كوكب الأرض هتتفرتك *بصوت اللمبي* !
4- حظك هذا اليوم.. برج الدلو!
كل اللي اتفرج على مسرحية ”العيال كبرت“ أكيد فاكر المشهد اللي سعيد صالح كان بيحاول يوصل فيه رسالة لحسن مصطفى عن طريق قرايته لجزء حظك هذا اليوم في الجرنال، لما كان بيقول له: ”الدِلو الدِلو الدِلو الدِلو، الراجل الدِلو يحب الدِلو“.
أهُوه ده بالظبط اللي بيحاول بعض الناس اللي بيكتبوا الجزء ده إنهم يعملوه، مش أكتر من إنهم بيوصلوا رسائل عشوائية للبشر وبيلعبوا بقى على إحتمالية إنها تحصل. الحقيقة إن العلماء حاولوا يعرفوا حظك هذا اليوم ويقروا البخت والطالع عن طريق النجوم والكواكب وفشلوا فشل ذريع، وقالوا إن الكواكب والنجوم والقمر مابيأثروش على حياتنا خالص.
5- سور الصين العظيم هو الحاجة الوحيدة اللي عملها الإنسان وتقدر تشوفها من الفضاء!
ناس كتير في العالم معتقدين إن سور الصين العظيم هو الحاجة الوحيدة اللي عملها الإنسان وممكن نشوفها من الفضاء، وفي عالمنا العربي ناس كتير مقتنعين نفس الاقتناع ده بس على الكعبة بقى، وحكايات بقى لم يستدل على صدقها من عدمه عن رواد الفضاء اللي بيتحوّلوا للإسلام لما بيشوفوا الكعبة وهما جايين من القمر وكده!
والحقيقة إنه ده برضه له علاقة بإنت واقف فين في الفضاء، يعني لو إنت أحد رواد الفضاء اللي موجودين في وكالة الفضاء الدولية فأنت هتشوف حاجات كتير عملها الإنسان على الأرض مش سور الصين العظيم والكعبة بس. ولو إنت بقى موجود على القمر فإنت في الحقيقة مش هتشوف أي حاجة خالص عملها الإنسان على الأرض، كل اللي هتشوفه شكل الأرض الخارجي مش أكتر.
المصدر
